د مشرانو جرګې په ننۍ غونډه کې د ډپلوماتیکو او او قونسلي چارو کارکوونکو د قانون د وړاندې شوې طرحې په اړه بحث وکړ
د افغانستان مشرانو جرګې د ډېپلوماتیکو او قونسلي چارو کارکوونکو د قانون طرحه تصویب کړه.
د جرګې غړو د رایو په اکثریت پرېکړه وکړه، چې د دوه ګونو تابعیت لرونکي کسان باید په قونسلي او ډېپلوماتیکو دندو و نه ګومارل شي.
د مشرانو جرګې په ننۍ غونډه کې د ډپلوماتیکو او او قونسلي چارو کارکوونکو د قانون د وړاندې شوې طرحې په اړه بحث وکړ.
لومړی د قانون مادې ولوستل شوې او بیا پرې د غونډې ګډونوالو خپلې نیوکې او وړاندیزونه څرګند کړل. د دغې جرګې د نړیوالو چارو کمیسون غړې نجیبې حسیني د قانون مادې ولوستې.
د نړیوالو چارو کمیسون د دوه ګونو تابعیت لرونکو ډېپلوماتانو او قونسلي کارکوونکو په اړه وړاندیز کړی و، چې دوی ته باید پنځه کاله وخت ورکړل شي. دغه ټکی د جرګې د ډېری غړو تر نیوکو لاندې راغی.
مشرانو جرګې د رایو په اکثریت په دې پرېکړه وکړه، چې د دوه ګوني تابعیت لرونکي کسان مشرانو جرګې ته د ډېپلوماتانو او قونسلي مامورینو په توګه د منلو وړ نه دي.
تر دې وړاندې ولسي جرګې هم په دې اړه ورته پرېکړه کړې وه. د دغه قانون طرحه په ټوله کې له یوې مخالفې رایې پرته د جرګې ټولو ګډونوالو ومنله.
دغه قانون درې فصله او اته مادې لري، چې د دواړه جرګو تر منلو وروسته به ولسمشر ته د توشېح لپاره استول کیږي.
