تاسې د وېبسایټ داسې بڼه ګورئ چې یوازې متن لري او لږ انټرنېټ کاروي. که غواړئ عکسونه او ویډیوګانې وګورئ، نو د وېبسایټ اصلي (لومړنۍ) بڼې ته ورشئ.
د وېبسایټ اصلي بڼې ته مې وروله
د وېبسایټ دې بڼې په اړه چې ډېر انټرنېټ نه مصرفوي نور معلومات دلته موندلای شئ.
په خوست او پکتيکا ولايتونو کې د زلزله ځپلو لپاره له ۲ زرو زيات کورونه جوړېږي
د طالبانو حکومت وايي د لنډ مهالو سرپناو پرځای اوس په خوست او پکتیکا ولايتونو کې زلزله ځپلو کورنیو لپاره دایمي کورونه ودانوي چې ژوند چاره کې ورسره مرسته وشي.
د طالبانو په حکومت کې له بېړنیو پېښو سره د مبارزې وزارت ویلي ۲۲۰۰ کورونه به سملاسي په خوست او پکتیکا کې جوړ شي.
د دغه وزارت ویاند حسیب الله شیخاني وايي، د جاپاني انجنیرانو یوه ډله چې د زلزله ځپلو سیمو پېژندنه کې تجربه او تخصص لري سیمې ته د ارزونې لپاره تللې ده.
ښاغلي شیخاني بي بي سي ته وویل، د ارزونې او سروې ټیمونه هغو سیمو ته تللي دي چې د خلکو کورونه پکې په بشپړ ډول ویجاړ شوي، ښايي هماغه سیمه او یا بل مناسب ځای کې ورته د کورونو جوړولو غم وخوړل شي.
نوموړی وايي سملاسي د پکتیکا په برمل کې د زرو کورونو د جوړېدو چاره عملا پیل شوې، په سپېره، ژړوکې او ګیان کې هم له ارزونې وروسته د کورونو جوړولو چارې پیلېږي.
طالب چارواکو ویلي که په زلزله ځپلو سیمو کې د ګواښ کومه کچه وموندل شي ښايي په نورو سیمو لکه څنګ لوري ولایت لوګر کې د زرګونو کورنیو لپاره مجهز ښارګوټي جوړ شي چې په وینا یې د روغتونونو او ښونځيو په ګډون د ژوند ټولې اسانتياوې به پکې وي.
د جاپاني انجنیرانو د ارزونې سره د ای او اېم مرستندویه سازمان د کډوالو سره لاس نیوي کې همکاري کوي.
پکتیکا او خوست کې دمګړۍ زرګونه کورنۍ پر بېدیا او یا هم د نورو خلکو په کورونو کې ژوند کوي، دا هغه کورنۍ دي چې په جولای میاشت کې یوې مرګونې زلزلې یې کورونه او کلي ویجاړ کړل.
د پکتیکا او خوست ولايتونو کې په دغو زلزلو کې شاوخوا زر تنه ووژل شول او څه نا څه ۳۰۰۰ نور یې ټپیان کړل.