پر کندوز ښار او څو ولسوالیو د طالبانو بریدونه؛ د دفاع وزارت سرپرست سیمې ته رسېدلی

له کندوز ولایته رپوټونه وایي، وسله والو طالبانو تېره شپه پر کندوز ښار، امام صاحب، چار درې او علي اباد ولسوالیو له څو اړخونو بریدونه کړي دي. د افغانستان د ملي دفاع وزارت وایي، پر کندوز ښار یې د طالبانو لوی برید په شا تمبولی دی او په جګړه کې یې ۵۰ طالب وسلوال وژلي او ۶۰ نور ټپیان شوي دي.

خو وسلوال طالبان پر کندوز ښار د کوم لوی برید خبره ردوي او وایي، یوازې د ښار په تلوکه سیمه کې یې یو برید کې ۸ افغان امنیتي سرتېري وژلي دي.

له دې رپوټونو سره سم د افغانستان د دفاع وزارت سرپرست اسدالله خالد هم نن سې شنبه کندوز ښار ته رسېدلی دی او هلته یې له افغان ځواکونو سره کتلي دي.

د افغانستان د ملي دفاع وزارت پر فېسبوک پاڼه لیکل شوي چې طالبانو تېره شپه د کندوز ښار پر بېلابېلو سیمو بریدونه پیل کړل، خو د افغان ځواکونو لخوا په شا وتمبول شول.

یاد وزارت وایي، د افغان پوځ ځوابي برید کې له هوایي ځواکه هم کار واخیستل شو او لسګونو طالب وسله والو ته مرګژوبله اوښتې.

اعلامیه زیاتوي چې کندوز ولایت کې د وضعیت د لا ښه کنترول لپاره د افغان ځانګړو ځواکونو قطعې سرتېري هم سیمې ته استول شوي دي.

خو طالبان نه مني چې ګواکې دې ډلې دې پر کندوز ښار کوم لوی برید کړی وي. د دې ډلې ویاند ذبیح الله مجاهد د دفاع وزارت څرګندونې تش تبلیغات بولي.

د طالبانو یوه جلا اعلامیه کې ادعا شوې ده چې نن سې شنبه د کندوز ولایت علي اباد ولسوالۍ او عاق مسجد سیمو کې په هوایي بمبار کې ولسي خلک وژل شوي دي.

کندهار کې هم افغان پولیس وژل شوي:

بله خوا د افغانستان په سویلي کندهار ولایت کې ځاي چارواکي وایي، معروف ولسوالۍ کې د وسلوالو یوه نفوذي برید کي لږ تر لږه ۵ پوله ساتي سرتیري وژل شوي او ۷ نور ټپیان دي. ویل کېږي چې برید کوونکي درې تنه وو او همدې پوسته کي پولیس وو.

د کندهار د پولیسو ویاند جمال ناصر بارکزی وایي، د پولیسو په ځوابي ډزو کي دوه برید کوونکي وژل شوي او یو بل په تېښته بریالی شوی.

خو یوې باوري سرچیني بي بی سي ته ویلي چي معروف ولسوالۍ کي د وسلوالو طالبانو برید کي لږ تر لږه ۱۴ افغان سرتیري وژل شوي او ۱۸ نور ټپیان دي .

وسلوال طالبان وایي د دوي د ۳ نفوذي کسانو په برید کي د څلورو قومندانانو په ګډون اتلس حکومتي سرتیري وژل شوي دي .

بل لور د زابل میزانه ولسوالۍ کې د سړک غاړې ماین چاودنه کې لږ تر لږه ۴ ولسي کسان وژل شوي او ۹ نور ټپیان دي.