په هند کې د اورګاډي خونړۍ پېښه؛ د اړونده وزیرانو او د اورګاډي د چارو مسولینو د استعفا غوښتنه شوې
د عکس سرچینه، Reuters
د هند په ختیځ اوډیشا ایالت کې د اورګاډي له یوې خونړۍ پېښې وروسته په دغه هېواد کې د وزیرانو او د اورګاډي د چارو اړونده مسولینو د استعفا غوښتنه شوې ده.
چارواکي وايي، د دې پېښې په اړه پلټنې پیل شوې دي.
هند کې یاده پېښه تېره جمعه شپه وشوه، چې شاوخوا ۳۰۰ کسانو په کې خپل ژوند له لاسه ورکړ.
د اورګاډي چارو اړوند وزیر اشوینی ویشنا وايي، څېړنې به دا په ډاګه کړي چې ایا د سیګنالونو ترمنځ ګډوډي رامنځ ته شوې وه یا انساني تېروتنه وه او یا هم کوم بل څه د پېښې لامل شوي دي.
د عکس سرچینه، EPA
په دې خونړۍ پېښه کې دوه مسافر وړونکي اورګاډي او یو بار وړونکی اورګاډی سره ټکر شوي وو.
د هند ریل ګاډو ادارې مسوولین وايي، ټکر شوي ګاډي کورومانډیل اېکسپرېس او هاوړه اېکسپرېس نومېږي.
د هند اورګاډي پټلۍ چارواکي وايي، د چټک سرعت له امله د اورګاډو څو خونې وېجاړې شوې دي.
د دغو چارواکو په وینا، پر پټلیو د ټکر شویو اورګاډو پاتي شوني څنډې ته شوي دي.
هند د نړۍ له هغو هېوادونو یو دی، چې د ریل ګاډو خورا ستره شبکه لري.
هند کې د اورګاډو دا ټکر په روانه پېړۍ کې تر ټولو خونړۍ پېښه ګڼل کېږي.
د هند لومړي وزیر نریندرا مودي پرون ژمنه وکړه، چې په دې پېښه کې ښکېلو کسانو ته به سخته سزا ورکړي.
دې لیکنه کې له social media راخیستل شوي مواد شته. له ښودلو وړاندې یې ستاسې اجازه پکار ده، ځکه ښایيکوکیز یا بله تکنالوژي پکې کارول شوې وي. کولی شئ له اجازې مخکې د social media site پالیسي ولولئ. د دې لپاره غوښتنه ومنئ او مخکې لاړ شئ
د پوسټ X پای
همدارنګه د طالبانو حکومت هم هند کې د اورګادي پېښې په اړه خواشیني ښودلې ده.
د طالبانو د بهرنیو چارو وزارت په خپله ټویټر پاڼه لیکلي چې د یادې پېښې په اړه خپله خواشیني ښيي.
''د هند جمهوریت په ختیځ اودیشا ایالت کې د اورګاډو د ټکر له امله چې سلګونو کسانو په کې ژوند له لاسه ورکړی او ټپیان شوي دي، خواشیني یوو او د قربانیانو او ټپیانو له کورنیو سره خپله خواخوږي شریکوو. ''
له دې مخکې د افغانستان پخواني ولسمشر حامد کرزي هم پر دغه پېښه له هند سره خواخوږي ښودلې وه.
