عمران خان: د افغان سولې له بهیره شا ته کېدل به لویه تېروتنه وي

د پاکستان لومړي وزیر عمران خان ویلي، په دوحه کې روان بین الافغاني مذاکرات به له ګڼو ستونزو سره مخ وي، خو دا بهیر د افغانستان د کشالې د حل لپاره یو لوی فرصت دی، او درول یا ختمول به یې یوه لویه تېروتنه وي.

عمران خان د واشنګټن پوسټ ورځپاڼې لپاره خپله سرمقاله کې ویلي، افغانستان سولې ته نږدې شوی دی، خو که نړیواله ټولنه په بیړه له دې هېواده ووځي نو دا به هوښیاري نه وي.

د پاکستان لومړی وزیر وایي، د سولې خبرو کې ښکېلې غاړې باید د دې بهیر بشپړېدو لپاره داسې کوم مهالوېش یا ضرب الاجل ونه ټاکي چې له حقیقته لېرې وي.

نوموړی وایي، افغان حکومت طالبان د یو سیاسي حقیقت په توګه منلي دي، او اوس باید طالبان هم په تېرو شلو کالو کې په افغانستان کې شوې لاسته راوړنې ومني.

د پاکستان لومړی وزیر داسې مهال دا څرګندونې کوي چې په دوحه کې د افغان دولت او طالبانو د مرکچي پلاو ترمنځ د بین الافغاني مذاکراتو مقدماتي ناستې شوې دي، خو اصلي خبرې لا هم نه دي پیل.

افغانستان کې وضعیت پر پاکستان مخامخ اغېز لري

عمران خان یو ځل بیا ټینګار کړی چې هېواد یې د افغانستان روانې جګړې له کبله بې شمېره قربانۍ ورکړې دي، او افغانستان کې وضعیت پر پاکستان هم اغېز کوي.

دی زیاتوي چې په افغانستان کې سیاسي ثبات د بهرنیانو لخوا پر افغانانو نشي ور تپل کېدلای، او تل پاتې سوله یوازې د افغانانو د خپلمنخي جوړجاړي له لارې راتلی شي.

په قطر کې د سولې خبرو سره هم مهاله په سیمه ییزه کچه د ملاتړ ترلاسه کولو، په تېره بیا د افغانستان او پاکستان د اړیکو ښه کولو لپاره هم هڅې روانې دي.

ټاکل شوې د افغانستان د ملي مصالحې د عالي شورا مشر عبدالله عبدالله د دوشنبې په ورځ د یوه پلاوي په مشرۍ اسلام اباد ته رسمي سفر وکړي.

دغه راز تمه ده چې د پاکستان لومړی وزیر عمران خان به هم په نږدې راتلونکي کې کابل ته سفر کوي.

عمران خان د جمعې پر ورځ افغان ولسمشر محمد اشرف غني سره د تیلیفوني‌ خبرو پر مهال افغانستان کې د اوربند ملاتړ څرګند کړی و.