तपाईँ अहिले हाम्रो वेबसाइटको थोरै डेटा प्रयोग हुने ‘टेक्स्ट-ओन्ली’ साइटमा हुनुहुन्छ। सबै तस्बिर र भिडिओसहित मूल वेबसाइटमा जान यहाँ क्लिक गर्नुहोस्।
मूल वेबसाइट तथा पूरा संस्करणमा जानुहोस्।
हाम्रो वेबसाइटको थोरै डेटा प्रयोग हुने संस्करणबारे थप जान्नुहोस्।
भेनेजुएलामा एकपछि अर्को शक्तिशाली भूकम्प, ठूलो क्षति भएको आशङ्का
भेनेजुएलामा आएका दुई शक्तिशाली भूकम्पका कारण ठूलो विनाश भएको अनुमान अधिकारीहरूले गरेका छन्।
अमेरिकी भौगर्भिक सर्वेक्षण निकाय यूएसजीएकका अनुसार पहिलो भूकम्प ७.२ र दोस्रो ७.५ म्याग्निट्यूड मापन गरिएको छ। पहिलो भूकम्प गएको ३९ सेकेन्डपछि त्यसभन्दा शक्तिशाली दोस्रो भूकम्प आएको थियो।
राजधानी कराकसको पश्चिमी क्षेत्रमा स्थानीय समयानुसार साँझ ६ बजेपछि आएका भूकम्पपछि मानिसहरू घरबाहिर निस्किएका थिए।
भूकम्पपछि कार्यवाहक राष्ट्रपति डेल्सी रोड्रिगेजले देशमा सङ्कटकाल घोषणा गरेकी छन्। उनका अनुसार क्षतिका कारण देशको प्रमुख अन्तर्राष्ट्रिय विमानस्थल बन्द गरिएको छ।
अधिकारीहरूले भूकम्पबाट भएको मानवीय तथा भौतिक क्षतिबारे बुझ्ने काम भइरहेको बताएका छन्।
यसअघि विमानस्थलबाट धुलो उडेको र मानिसहरू भाग्दै गरेको देखिने भिडिओहरू सार्वजनिक भएका थिए।
राष्ट्रपति निकोलस मदुरोलाई अमेरिकाले पक्राउ गरेपछि डेल्सी रोड्रिगेजले देशको नेतृत्व गरिरहेकी छन्।
भूकम्पका कारण ठूलो जनधनको क्षति भएको आशङ्का गरिएको छ।
कार्यवाहक राष्ट्रपतिका अनुसार भूकम्पमा परी कम्तीमा ३२ जनाको मृत्यु भएको र कम्तीमा ७०० जना घाइते भएको पुष्टि भएको छ।
यसअघि यूएसजीएसले मृतकहरूको सङ्ख्या १०,००० नाघ्ने सम्भावना ४४ प्रतिशत रहेको जनाएको थियो।
सहयोग गर्न अमेरिका तयार
संयुक्त राज्य अमेरिका राष्ट्रपति डोनल्ड ट्रम्पले भेनेजुएलामा आइपरेको विपद्बारे टिप्पणी गरेका छन्। "भर्खरै भेनेजुएलाका महान् जनतालाई प्रहार गरेका दुई ठूला भूकम्पहरू परिमाणमा पनि ठूला छन् र तिनले डरलाग्दो सङ्ख्यामा मानिसहरूको मृत्यु गराएका छन्," ट्रम्पले 'ट्रूथ सोशल'मा लेखेका छन्।
"यूएसए सहयोग तर्न तयार, इच्छुक र सक्षम छ!"
उनले आफ्नो सरकारका सबे निकायलाई त्यसका लागि निर्देशन दिइसकेको जनाए। "हामी हाम्रा नयाँ र महान् साथीहरूका लागि त्यहाँ पुग्ने छौँ। प्रारम्भिक विवरणहरू राम्रा छैनन्!!!"
रोड्रिगेजले अमेरिकी राष्ट्रपति ट्रम्प भेनेजुएलाका अधिकारीहरूसँग निरन्तर सम्पर्कमा रहेको जानकारी दिँदै ट्रम्पलाई सामाजिक सञ्जालमार्फत् धन्यवाद दिएकी छन्।
उनले फेसबुकमा पोस्ट गरेको एउटा विज्ञप्तिमा अमेरिका सरकारले भेनेजुएलाई सहयोग दिने प्रस्ताव गरेको जनाएकी छन्।
अमेरिकी विदेशमन्त्री मार्को रुबिओले अमेरिकाले "तत्काल खोज र उद्धार टोलीहरू, औषधोपचारका लागि आवश्यक स्रोत र मानवीय सहायता" पठाउने बताएका छन्।
रातभरि खुला आकाशमुनि बास
भूकम्प आएको दिन भेनेजुएलामा राष्ट्रिय बिदा थियो। बिदा भएका कारण अधिकांश मानिसहरू घरमै रहेका हुन सक्ने अनुमान गरिएको छ।
भूकम्पका कारण बिजुली र इन्टरनेट प्रभावित भएको अधिकारीहरूले बताएका छन्।
भेनेजुएलामा आएको भूकम्पको झट्का छिमेकी देश कोलम्बियाको राजधानीसम्म पनि महसुस भएको बताइएको छ।
भूकम्पका कारण आतङ्कित कैयौँ आतङ्कित मानिसहरू कराकसमा राति आकाशमुनि नै बसेको देखियो। उनीहरूमा फेरि भुइँचालो आउने वा क्षतिग्रस्त भवनहरू भत्किने डर बाँकी नै छ।
धेरै मानिसहरू आफ्न परिवारजन र इष्टमित्रको स्थितिबारे जानकारी लिने प्रयासमा छन्।
अधिकारीहरूले सर्वसाधारण मानिसलाई भूकम्पका कारण पुगेको क्षति नजाँची क्षतिग्रस्त भवनमा नबस्न आह्वान गरेका थिए।
बीबीसी न्यूज नेपाली यूट्यूबमा पनि छ। हाम्रो च्यानल सब्स्क्राइब गर्न तथा प्रकाशित भिडिओहरू हेर्न यहाँ क्लिक गर्नुहोस्। तपाईँ फेसबुक, इन्स्टाग्राम र ट्विटरमा पनि हाम्रा सामग्री हेर्न सक्नुहुन्छ। अनि बीबीसी नेपाली सेवाको कार्यक्रम बेलुकी पौने नौ बजे रेडिओमा सोमवारदेखि शुक्रवारसम्म सुन्न सक्नुहुन्छ।