Tadhal McTominay - "Thuirt mi rium fhèin gum feum mi seo a pheantadh"

'S aithne do Dhougie MacFhraing gu lèor mu dheagh thadhal a chur.

Mar bhalach a dh'fhàs suas fo sgàil na creige ann am Baile a' Chaolais cha robh sìon cho cinnteach ach gun togadh e caman.

Chuir e tadhail gu lèor do Bhaile a' Chaolais fhèin aig Pàirc ainmeil an Iùbailidh, ach cuideachd do Chamanachd an Eilein Sgitheanaich is Inbhir Nis mar a thug turas a bheatha e timcheall na Gàidhealtachd.

Sin a thuilleadh air ball a chur sa lìon tric ann am ball-coise is e a' ruighinn ìre Lìog na Gàidhealtachd.

Ged nach eil e air an caman aige buileach a chur gu aon taobh fhathast, tha Dougie a-nise a' sìor choisinn cliù air adhbharan eile.

Agus tha e air na sgilean iongantach aige le bruis-pheant a chur gu feum airson tadhal Albannach cho iomraiteach 's a bha ann a chur air canabhas.

Dh'innis Dougie, a tha cuideachd na phlumair, do BhBC Naidheachdan mar a thàinig seo uile gu bith.

"Ged a bha mi a' peantadh fad mo bheatha 's e an glasadh-sluaigh an rud mòr oir bha pàilteas ùine agam", tha e ag ràdh.

"Bha ùine agam is bha fois agam."

Tha Dougie ag ràdh gu bheil eachdraidh is seallaidhean na Gàidhealtachd air buaidh mhòr a thoirt air thairis air na bliadhnaichean, is tha cuideachd an obair aig Horatio McCulloch bhon 19mh Linn.

"Bha fios agam an-còmhnaidh gun dèanainn oidhirp air choireigin rudeigin co-dhiù coltach ris na rinn McCulloch a dhèanamh - bha am miann sin agam bho thùs," tha e ag ràdh.

"A' chiad fhear a rinn mi às dèidh dhomh tòiseachadh às ùr, thug mi dhan ghailearaidh ann an Inbhhir Nis e is thuirt iad rium 'mo chreach, cò às a thàinig thusa'.

"Bhrosnaich iad mi is thuirt iad rium gum bu chòir dhomh tòrr a bharrachd a dhèanamh."

'S e sin a rinn e is e a' feuchainn diofar rudan a pheantadh is ann an diofar stoidhlichean.

Tha Dougie ag ràdh gun robh e 'son "dùbhlain" a chur mu choinneimh aig an àm sin - agus thàinig am fear as motha nuair a chaidh iarraidh air tionndadh ùr a dhèanamh de dhealbh ainmeil iomain.

Bha an neach-dhealbh Dòmhnall MacAoidh nach maireann air duais Dealbh Spòrs na Bliadhna a bhuannachadh anns na 70an airson an deilbh aige de dh'Iain MacCoinnich aig Baile Ùr an t-Slèibh is Tommy MacNeacail aig Caol Bhòid.

"Bha mi gu mòr airson a dhèanamh oir bha an dealbh cho ainmeil ann an iomain," tha Dougie a' mìneachadh.

"A bhith a' feuchainn ri aodann Iain MhicCoinnich a ghlacadh - bha e gu math doirbh - ach bha mi a' faireachdainn gun do rinn mi an gnothach air."

Nuair a chaidh an dealbh a thoirt seachad do dh'Iain MhacCoinnich fhèin is do Chomann na Camanachd an-uiridh, dh'innis Dougie mar a dhùisg e le fruis aon mhadainn aig 4:00 le beachd air mar a chuireadh e crìoch air sùilean MhicCoinnich.

Agus bha e follaiseach an là sin an dà chuid cho cianail fhèin toilichte 's a bha Iain MacCoinnich fhèin leis an dealbh, agus mar a bha an fheadhainn eile a bha an làthair a' faicinn gur e sàr obair a bh' ann.

Thug seo spionnadh dha Dougie tòiseachadh air dealbh eile bho shaoghal na spòrs: an tadhal iongantach aig Scott McTominay 'son Alba an aghaidh na Danmhairg a chuir Alba air an t-slighe gu Cupa na Cruinne.

"Tha mi a' smaointinn gur e mòmaid cho samhlachail 's a bh' ann am ball-coise na h-Alba a bha ann," tha Dougie ag ràdh.

"Nuair a chunnaic mi an dealbh mòr air a' bhalla ann an Glaschu, thuirt mi rium fhèin gum feum mi seo a pheantadh.

"Agus às dèidh dealbh Iain MhicCoinnich bha fios agam gum b'urrainn dhomh a dhèanamh."

Dà dhealbh spòrs ach anns an robh dùbhlain gu math diofraichte.

"Chì thu cho builleach sònraichte 's a bha an rud a rinn McTominay nuair a tha thu ga ghlacadh mar mhòmaid ann an tìm," tha Dougie ag innse.

"Chì thu cho àrd 's a bha e is mar a bh' aige ri a bhodhaig a ghluasad.

"Ach bha dùbhlan ann cuideachd glacadh cho mòr 's a tha Hampden - an sluagh is an dorchadas air cùl nan cluicheadairean."

Tha e follaiseach bho na chuir Dougie an dealbh air na meadhanan-sòisealta gu bheil e a' còrdadh ri mòran.

'S e a' cheist a-nise càite am faigh e dhachaigh air a' cheann thall.

"Bhiodh e a' ciallachadh na h-uimhir dhomh nan faiceadh Scott McTominay fhèin e," thuirt Dougie.

"Rinn e rudeigin os-daonna airson a dhùthcha.

"Bhithinn air mo dhòigh nam faiceadh e an dealbh - is faodaidh e fhèin co-dhùnadh dè nì sinn leis."