Geàrr-chunntas

Ag aithris beò

Air a dheasachadh le Dòmhnall Pollock, Fionnlagh MacIllinnein agus Shona NicEanraig.

  1. A' Chiad Chuairt

    Ceiltich an Òbain - Àird nam Murchan

  2. A' Chiad Chuairt

    Cill Mhàilidh - Gleann Urchadain

  3. A' Chiad Chuairt

    Obar Dobhair - A' Mhanachainn

  4. An taghadh a' teannadh dlùth a-nise.....

    Cupa na Camanachd is buill le àireamhan orra

  5. Sùilean air a' Bhall

    Tha sinn dìreach a' feitheamh air an taghadh faighinn gu dol, is mar sin cothrom coimhead air tachartas fìor mhath a bh' ann air an deireadh-sheachdain.

    Cò ann an iomain saoil nach eil eòlach air an dealbh ainmeil a thog Dòmhnall MacAoidh aig cuairt dheireannach Chupa na Camanachd ann an 1978 is Iain MacCoinnich a' ruith air falbh bho Thommy MacNeacail aig Caol Bhòid?

    Chaidh togail air 'Eyes on the Ball' ann an òraid aig Ùisdean MacIllinnein aig Pàirc a' Bhucht Disathairne - is chaidh cuideachd tionndadh ùr àlainn den dealbh fhoillseachadh.

    'S e Dougie MacFhraing à Baile a' Chaolais a rinn e is chìthear Dougie is Iain MacCoinnich an seo ri taobh an deilbh.

    Abair sàr obair.

    Iain MacCoinnich is Dougie MacFhraing

  6. An Dàrna Cuairt

    'S ann aig an ìre seo a thèid na coin mhòra a leigeil mu sgaoil:

    • Cabar Fèidh
    • Caol-Gleann
    • An Gearasdan
    • Ceann a' Ghiùthsaich
    • Ceann Loch Seile
    • Caol Bhòid
    • Loch Abar
    • Baile Ùr an t-Slèibh
    • Camanachd an Òbain
    • An t-Eilean Sgitheanach

  7. A' Chiad Chuairt

    Seo na sgiobaidhean a bhios san ad:

    • Obar Dobhair
    • Àird nam Murchan
    • A' Mhanachainn
    • Bòd
    • Glaschu Meadhan Earra-Ghàidheal
    • Gleann Urchadain
    • Inbhir Aora
    • Inbhir Nis
    • Cill Mhàilidh
    • Lòbhat
    • Ceiltich an Òbain
    • Srath Ghlais

  8. An taghadh

    Gu leòr mu 2025 ma-tha - dè tha romhainn an-diugh?

    Tha 22 sgioba anns an taghadh uile gu lèir.

    Sa chiad chuairt bidh na h-ochd sgiobaidhean bhon Lìog Nàiseanta agus dà sgioba an urra bho Lìog Deas 1 is Lìog Tuath 1.

    Thig sia sgiobaidhean air adhart às na geamaichean sin is thèid iad dhan dàrna cuairt còmhla ris na deich sgiobaidhean bhon Phrìomh Lìog.

    Bidh taghadh againn an-diugh airson na ciad cuairt agus na dàrna cuairt.

    Furasta gu leor?

  9. Raghnall aig an stiùir

    Bhiodh e fìor a ràdh nach robh a h-uile duine ag aontachadh le Mgr Ros gun robh Cupa na Camanachd air ais far an robh còir aige a bhith.

    Bhuannaich Ceann a' Ghiùthsaich na trì duaisean mòra eile a bha ri fhaighinn dhaibh ach 's iadsan a bha goirt mu Chupa na Camanachd.

    Ged a bha Iain 'Corky' Borthwick airson fuireach mar mhanaidsear agus airson Cupa na Camanachd a bhuannachadh air ais, thàinig e am follais gun robh na cluicheadairean airson atharrachadh fhaicinn.

    Air a' cheann thall dh'fhàg sin gun do ghabh Raghnall Ros an stiùir aig an Dell.

    Ciamar a thèid le Raghnall nan Gleann? Gheibh sinn a-mach anns na mìosan ri thighinn.

    Tha dùbhlan ùr ro Chorky cuideachd is esan air a dhol os cionn sgioba Bhàideanach ann an iomain nam ban.

    Fìor dheagh naidheachd dhaibhsan, shaoileadh tu, is iad fhèin airson greim a chumail air Cupa Valerie Fhriseil agus airson a' Phrìomh Lìog a bhuannachadh air ais bho Loch Abar.

    Raghnall RosSNS

  10. Cho furasta ri 1, 2, 3?

    Cho math dhuin sùil a thoirt air na trì tadhail a bhuannaich an cupa airson a' Bhaile Ùir!

    (A mhuinntir Chinn a' Ghiùthsaich - thalla is dèan cupa teatha 'son mionaid no dhà).

    Iain Robinson leis an tadhal a chuir am Baile Ùr air thoiseach

    An duine ud Robinson a-rithist leis an dàrna tadhal

    Agus Joe Coyle òg a' cur a' Bhaile Ùir 3-0 air thoiseach. Ged a fhuair Ryan Borthwick tadhail air ais ann an 71 is 91 mionaidean bha e ro anmoch 'son an là a shàbhaladh do Cheann a' Ghiùthsaich.

  11. "An cupa air ais far am bu chòir dha a bhith"

    Sin mar a chuir manaidsear Bhaile Ùir an t-Slèibh, Peadar Ros, gnothaichean an cèill air ais san t-Sultain às dèidh dhan sgioba aige Cupa na Camanachd a bhuannachadh 'son a' chiad turas bho 2019.

    Rinn am Baile Ùr a' chùis 3-2 air na seann nàimhdean aca Ceann a' Ghiùthsaich. Cha robh cus dùil ri sin ro-làimh ach ann an da-rìribh cha robh an geama buileach cho faisg 's a tha e a' coimhead air pàipear is am Baile Ùr air a bhith air thoiseach 3-0.

    Cluicheadairean Bhaile Ùir an t-Slèibh le Cupa na Camanachd

  12. Fàilte!

    Èist gu dlùth agus 's dòcha gun cluinn sibh e - tha fuaim àlàinn brag nan caman a' tilleadh dha na srathan is dha na glinn (agus dha na bailtean mòra!)

    Tha nas lugha na cola-deug ann a-nise mus tòisich seusan ùr na h-iomain agus madainn an-diugh tha ceum cudromach eile ann is an taghadh ann 'son ìrean tràtha Chupa na Camanachd.

    'S i a' chompanaidh taigheadais Tulloch Homes a tha a' cumail taic ri duais mhòr na h-iomain a-rithist - seo an naoidheamh bliadhna acasan - is thèid an taghadh a dhèanamh aig leasachadh ùr Fairview a th' aca san t-Slag Bhuidhe ann an Inbhir Nis

    Tha am fear-naidheachd againn Fionnlagh MacIllinnein an làthair san t-Slag Bhuidhe airson an taghaidh.

    Tha Fionnlagh gu math eòlach air iomain is e air iomadh tadhal a chur 'son na Manachainn.

    Cumaidh e am fiosrachadh rinn mar a thig na sgiobaidhean às an ad.