भारताची 3 राफेल विमानं पाडल्याचा पाकिस्तानी पंतप्रधान शाहबाज शरीफ यांचा दावा

लाईव्ह कव्हरेज

ओंकार करंबेळकर, आशय येडगे, अमृता कदम

1. 7 मे 2025एअर इंडिया, इंडिगो आणि स्पाईसजेटने विमाने वळवली

   काही भारतीय विमान वाहतूक कंपन्यांनी भारत प्रशासित काश्मीरला जाणारी विमानं रद्द केली आहेत. तसेच राजस्थान आणि पंजाबसारख्या सीमेवर असणाऱ्या राज्यांमध्ये जाणारी विमानं देखील वळवण्यात किंवा रद्द करण्यात आली आहे.

   एअर इंडियाने म्हटलं आहे की, त्यांनी जम्मू, श्रीनगर, लेह, जोधपूर, अमृतसर, भुज, जामनगर, चंडीगढ आणि राजकोटला जाणारी सर्व विमानं रद्द केली आहेत. आज दुपारी 12 पर्यंतची विमानं रद्द केल्याची माहिती एअर इंडियाने दिली आहे. तसेच अमृतसरला जाणारी दोन आंतरराष्ट्रीय विमानं दिल्लीला वळवण्यात आली आहेत.

   स्पाइसजेटने म्हटले आहे की, धर्मशाला, लेह, जम्मू, श्रीनगर आणि अमृतसरसह उत्तर भारतातील काही भागांमधील विमानतळ बंद करण्यात आले आहेत, ज्यामुळे या ठिकाणांहून येणाऱ्या त्यांच्या विमानांच्या उड्डाणांवर परिणाम झाला.

   इंडिगो एअरलाइन्सने एक्सवर पोस्ट केली आहे की, बदलत्या हवाई परिस्थितीमुळे या शहरांना जाणाऱ्या आणि येणाऱ्या त्यांच्या उड्डाणांवर परिणाम झाला आहे.

   

   फोटो स्रोत, Getty Images

2. 7 मे 2025संयुक्त राष्ट्राच्या प्रमुखांचं आवाहन - 'सैन्यानं संयम बाळगावा'

   

   फोटो स्रोत, epa

   भारतानं केलेल्या क्षेपणास्त्र हल्ल्यावर संयुक्त राष्ट्राचे महासचिव अँटोनियो गुटेरेस यांच्या प्रवक्त्यांनी प्रतिक्रिया दिलीय.

   संयुक्त राष्ट्रांचे सरचिटणीस अँटोनियो गुटेरेस यांच्या प्रवक्त्याने सांगितलं की, "नियंत्रण रेषेवर आणि आंतरराष्ट्रीय सीमेवर भारताने केलेल्या लष्करी कारवाईमुळे आम्हला तीव्र चिंता वाटते आहे."

   ते पुढे म्हणाले, "महासचिव दोन्ही देशांना जास्तीत जास्त संयम बाळगण्याचे आवाहन करत आहेत. जगाला पुन्हा एकदा भारत-पाकिस्तान लष्करी संघर्षाचा धोका पत्करता येणार नाही."

3. 7 मे 2025आतापर्यंत काय माहिती समोर आली?

   • भारत सरकारने पाकिस्तान आणि पाकिस्तान प्रशासित काश्मीरमधील नऊ ठिकाणांवर हल्ला केल्याची माहिती दिली आहे.
   • पाकिस्तानच्या लष्कराने तीन ठिकाणांवर हल्ला झाल्याची माहिती दिली आहे.
   • पाकिस्तानचे पंतप्रधान शाहबाज शरीफ यांनी या हल्ल्याला 'भ्याड हल्ला' असं म्हटलं आहे.
   • पाकिस्तानी लष्कराच्या प्रवक्त्यांनी बीबीसीला सांगितलं की, भारताच्या हल्ल्यात एकूण सात जणांचा मृत्यू झाला असून त्यामध्ये दोन लहान मुलांचा समावेश आहे. त्यांनी पुढे सांगितलं की, पाकिस्तानी लष्कराने भारताची दोन विमानं आणि एक ड्रोन पाडला आहे. भारताने यावर काहीही प्रतिक्रिया दिलेली नसून बीबीसी देखील याची पुष्टी करू शकलेली नाही.
   • पाकिस्तान प्रशासित काश्मीरमधल्या मुजफ्फराबादच्या रहिवाश्यांनी बीबीसीच्या इस्लामाबादमधील प्रतिनिधींना सांगितलं की, ते स्फोटाच्या मोठ्या आवाजांमुळे हादरून जागे झाले.
   • दरम्यान भारत प्रशासित काश्मीरच्या रहिवाश्यांनी बीबीसीला सांगितलं की, त्यांनी नियंत्रण रेषेजवळ स्फोटांचे आवाज ऐकले आहेत.

   

   फोटो स्रोत, EPA

4. 7 मे 2025भारताची दोन विमानं आणि एक ड्रोन पाडल्याचा पाकिस्तानचा दावा

   पाकिस्तानी लष्कराचे प्रवक्ते अहमद शरीफ यांनी बीबीसीला सांगितलं, "पाकिस्तानच्या लष्कराने भारताची दोन विमानं आणि एक ड्रोन पाडला आहे."

   अहमद शरीफ पुढे म्हणाले की, "पाकिस्तानचं लष्कर जमिनीवर उतरलं आहे पण ते नेमकं कुठे आहे हे सांगता येणार नाही."

   पाकिस्तानला स्वतःच संरक्षण करण्याचा अधिकार असून सध्या ती प्रक्रिया सुरु असल्याचं अहमद शरीफ म्हणाले.

5. 7 मे 2025पाकिस्तानचे पंतप्रधान शाहबाज शरीफ काय म्हणाले?

   भारताने केलेल्या हल्ल्यानंतर पाकिस्तानचे पंतप्रधान शाहबाज शरीफ यांनी प्रतिक्रिया दिली आहे.

   भारताच्या हल्ल्याबाबत बोलताना ते म्हणाले की, पाकिस्तानला प्रत्युत्तरादाखल कारवाई करण्याचा पूर्ण अधिकार आहे,

   शाहबाज शरीफ यांनी एक्स या सोशल मीडिया प्लॅटफॉर्मवर पोस्ट लिहून म्हटलं आहे की, "शत्रूने पाकिस्तानच्या पाच ठिकाणांवर भ्याड हल्ला केला आहे. भारताच्या या हल्ल्याला 'अ‍ॅक्ट ऑफ वॉर'(युद्धाची कृती) असं म्हटलं जाईल."

   शाहबाज शरीफ यांनी त्यांच्या पोस्टमध्ये पुढे लिहिलं आहे, "भारताच्या या हल्ल्याला सडेतोड उत्तर देण्याचा संपूर्ण अधिकार पाकिस्तानला आहे. आणि आम्ही जशास तसे प्रत्युत्तर देत आहोत."

   ते म्हणाले की, संपूर्ण पाकिस्तान लष्करासोबत उभा आहे आणि देशाचं मनोधैर्य मजबूत आहे.

   

   फोटो स्रोत, Getty Images

   पाकिस्तानचे पंतप्रधान म्हणाले, "पाकिस्तान आणि पाकिस्तानच्या सैन्याला शत्रूशी कसा मुकाबला करायचा हे ठाऊक आहे. आम्ही शत्रूचा वाईट हेतू कधीही यशस्वी होऊ देणार नाही."

6. 7 मे 2025भारताचा पाकिस्तानवर क्षेपणास्त्र हल्ला

   भारतानं पाकिस्तानवर क्षेपणास्त्र हल्ला केला आहे. भारतीय सैन्यानं 'ऑपरेशन सिंदूर' सुरू केलं आहे. याबाबत भारत सरकारने काही काळापूर्वी एक निवेदन जारी करून माहिती दिली आहे.

   भारत सरकारने आपल्या निवेदनात म्हटलं आहे, "या कारवाईत पाकिस्तान आणि पाकव्याप्त काश्मीरमधील दहशतवाद्यांच्या तळांना लक्ष्य करण्यात आलं आहे. याच ठिकाणावरून भारतावर दहशतवादी हल्ल्यांचा कट झाला आणि त्याची अंमलबजावणी करण्यात आली,"

   

   फोटो स्रोत, X/ADGPI

   ऑपरेशन सिंदूरमध्ये एकूण 9 ठिकाणांना लक्ष्य करण्यात आलं आहे, अशीही माहिती निवेदनात दिली आहे.

   दुसरीकडे, पाकिस्तानच्या सरकारी टीव्हीने पाकिस्तानी लष्कराच्या प्रवक्त्याचा हवाला देत म्हटलं की, भारतीय सैन्याने पाकिस्तानवर तीन ठिकाणी क्षेपणास्त्रांनी हल्ला केला आहे.