'रिया चक्रवर्ती देत होती सुशांत सिंह राजपूतला ड्रग्ज'- एनसीबी

एनसीबीनं सुशांतसिंह राजपूत आत्महत्या प्रकरणी रिया चक्रवर्तीवर चार्जशीट दाखल केलीय. त्यात रिया चक्रवर्तीच सुशांतसिंह राजपुतला ड्रग्जचा पुरवठा करत होती, असा आरोप ठेवण्यात आलाय.

चार्जशीटमध्ये रिया सुशांतसाठी ड्रग्ज विकत घ्यायची आणि त्याला द्यायची, असं म्हटलं आहे.

14 जून 2020 रोजी सुशांतसिंह राजपूतचा मृतदेह त्याच्या अपार्टमेंटमध्ये आढळून आला होता.

'हे आत्महत्येचं प्रकरण आहे. पोलीस तपास करत आहेत. पण कुठलीही सुसाईड नोट मिळालेली नाही,' असं तेव्हा मुंबई पोलिसांचे प्रवक्ते प्रणय आशोक यांनी सांगितलं होतं.

त्यानंतर 8 सप्टेबर 2020 रोजी पोलिसांनी या प्रकरणी आत्महत्येला प्रवृत्त करणे आणि इतर कलमांखाली रिया चक्रवर्तीला अटक केली होती. त्यानंतर 7 ऑक्टोबर 2020 रोजी तिला जमीन मिळाला होता.

एनसीबीच्या चार्जशीटनुसार रिया तिचा भाऊ शौविक, सॅम्युएल मिरांडा, दिपेश सावंत आणि इतरांकडून मॅरुआनाची डिलिव्हरी घेत होती. त्याचे पैसेसुद्धा तिनेच दिले होते.

"रिया माझ्या मुलाला बऱ्याच काळापासून विष देत होती. ती खुनी आहे. तपासयंत्रणांनी तिला आणि तिच्या सहकाऱ्यांना अटक करायला हवी," असा आरोप सुशांतचे वडील के. के. सिंह यांनी केला होता.

रिया चक्रवर्ती कोण आहे?

रिया चक्रवर्ती हे नाव अनेकांनी सुशांत सिंहच्या आत्महत्येनंतरच पहिल्यांदा ऐकलं. त्याआधी ती कोण होती, काय करत होती याबद्दल फारच थोड्या लोकांना माहिती होतं.

रिया चक्रवर्ती पहिल्यांदा स्क्रीनवर दिसली ती 2009 साली MTV च्या 'मिस टीन' या स्पर्धेत. त्यानंतर MTV ची सगळ्यात तरूण व्हीजे (व्हीडिओ जॉकी) बनण्याचा मानही तिला मिळाला.

2012 साली तिने फिल्म इंडस्ट्रीत पदार्पण केलं. तिचा पहिला पिक्चर होता 'तुनीगा तुनीगा.' त्याच्या पुढच्याच वर्षी तिने बॉलिवूडमध्ये 'मेरे डॅड की मारुती' या चित्रपटाव्दारे पदार्पण केलं.

त्यानंतर तिने 'सोनाली केबल', 'बँकचोर' अशा चित्रपटांमध्ये प्रमुख भूमिका केल्या तर 'हाफ गर्लफ्रेंड', 'दोबारा' या चित्रपटांमध्ये पाहुण्या कलाकाराच्या भूमिका केल्या.

महेश भट -रिया फोटोचा वाद

मुंबई मिररमध्ये आलेल्या एका रिपोर्टनुसार रिया चक्रवर्ती अनेकदा वादांमध्ये अडकली आहे. पण त्यातला सर्वाधिक चर्चिला गेलेला वाद म्हणजे महेश भटांसोबतचा एक फोटो.

2018 साली 'जलेबी' पिक्चर रिलीज व्हायच्या आधी दिग्दर्शक महेश भट यांच्याबरोबरचा एक फोटो सोशल मीडियावर टाकला.

या फोटोवरून रिया प्रचंड ट्रोल झाली. अनेकांनी रिया आणि महेश भट यांचं प्रेमप्रकरण असंही म्हटलं. यावर नंतर रियानेच तो फोटो व्टीट करून लिहिलं.

"ट्रोल्स त्यांच्या मनातला चिखल माझ्या अंगावर उडवत आहेत, तो चिखल त्यांच्या आत्म्यातला आहे. जर असंच होणार असेल तर आपण अंधारयुगापासून पुढे आलो असं म्हणायचं तरी का? तुमची विकृत मानसिकता तुम्हालाच लखलाभ."

सुशांत सिंह राजपूतसोबतचं नातं

रिया आणि सुशांत यांची भेट पहिल्यांदा 2012 झाली. त्यावेळेस दोघंही 'यशराज फिल्म्स'बरोबर काम करत होते. सुशांत तेव्हा मनीष शर्मांच्या 'शुद्ध देसी रोमान्स' या सिनेमात काम करत होता, तर रिया आपल्या पहिल्या हिंदी सिनेमाची तयारी करत होती.

पण मागच्या वर्षी नात्याची जाहीर चर्चा सुरू झाली. त्यानंतर ते दोघं अनेकदा सार्वजनिकरित्या सोबत दिसले. एकमेकांच्या इंस्टाग्राम अकाऊंटवरही झळकायला लागले. सुशांतच्या आत्महत्येनंतर रियाने त्यांचं नातं मान्य केलं आणि हेही मान्य केलं की, ते एकमेकांसोबत राहात होते.

एका सिनेवेबसाईटने दिलेल्या बातमीनुसार त्यांच्या नव्या रोमँटिक चित्रपटाचं शुटिंग मेमध्ये सुरू होणं अपेक्षित होतं, पण लॉकडाऊनमुळे ते पुढे ढकललं गेलं. हे दोघं मुंबईत घर शोधत होते आणि लवकरच लग्न करणार होते, असंही यात म्हटलं आहे.

पण सुशांतच्या वडिलांनी मात्र म्हटलं होतं की, मी रिया चक्रवर्तीला ओळखत नाही. मला सुशांतची गर्लफ्रेंड म्हणून फक्त अंकिता लोखंडे माहिती होती. रियाला त्यांनी सुशांतच्या अंत्यसंस्कांराच्या वेळीही उपस्थित राहू दिलं नव्हतं, असं म्हटलं जातं.

सुशांतच्या मृत्यूनंतर रियाने भावनावश होऊन इंस्टाग्रामवर लिहिलं होतं की, "तू इथे नाहीस हे माझं मन मानायला तयार नाही. मी तुझ्यावर कायम प्रेम करत राहीन, या जगाच्या अंतापर्यंत आणि त्याही नंतर."

हे वाचलंत का?

(बीबीसी न्यूज मराठीचे सर्व अपडेट्स मिळवण्यासाठी आम्हाला YouTube, Facebook, Instagram आणि Twitter वर नक्की फॉलो करा.

बीबीसी न्यूज मराठीच्या सगळ्या बातम्या तुम्ही Jio TV app वर पाहू शकता.

'सोपी गोष्ट' आणि '3 गोष्टी' हे मराठीतले बातम्यांचे पहिले पॉडकास्ट्स तुम्ही Gaana, Spotify, JioSaavn आणि Apple Podcasts इथे ऐकू शकता.)