एकनाथ शिंदे : बंड ते मुख्यमंत्रिपद, 19 फोटोंमधून पाहा संपूर्ण घटनाक्रम

शिवसेनेचे बंडखोर नेते एकनाथ शिंदे आता महाराष्ट्राच्या मुख्यमंत्रिपदी विराजमान झाले आहेत. शिंदे यांनी गुरुवारी (30 जून) संध्याकाळी राजभवनावर मुख्यमंत्रिपदाची शपथ घेतली.

20 जून रोजी विधानपरिषदेची निवडणूक पार पडल्यानंतर शिंदे नॉट रिचेबल झाले होते. विधानसभेतून ठाणे, मग सुरत, त्यानंतर गुवाहाटी, तिथून पुढे गोव्यापर्यंत त्यांनी अनेक झाडी, डोंगर आणि हॉटेल पादाक्रांत केले.

सुरुवातीला रस्ते नंतर हवाईमार्गे रंजक प्रवास करत शिंदे थेट मुंबईच्या राजभवनावर दाखल झाले. याठिकाणी 30 जून रोजी शिंदे यांच्या गळ्यात मुख्यमंत्रिपदाची माळ पडली आणि अखेरीस या नाट्याच्या पहिल्या अंकावर पडदा पडला.

20 ते 30 जून या दहा दिवसांत शिंदे यांच्या बंडाने महाराष्ट्राचं राजकीय समीकरण पूर्णपणे बदलून टाकलं आहे. एकनाथ शिंदे यांच्या बंडाची ही संपूर्ण 'क्रोनोलॉजी' समजून घेऊ फोटोंच्या माध्यमातून -

सर्वप्रथम 21 जूनला एकनाथ शिंदे आपल्या समर्थक आमदारांसह गुजरातच्या सुरतमध्ये दाखल झाले. सूरतमध्ये ते ली मेरिडियन हॉटेलमध्ये वास्तव्यास होते. पहिल्यांदा याठिकाणी एकनाथ शिंदे यांनी शक्तिप्रदर्शन केलं.

त्यानंतर हे आमदार सुरतहून गुवाहाटीला गेले.

शिंदेंविरुद्ध कारवाईचा इशारा देत शिवसेनेने अजय चौधरी यांना गटनेतेपदी नियुक्त केलं. तसंच सुनील प्रभू यांची नियुक्ती प्रतोद म्हणून करण्यात आली. त्याला प्रत्युत्तर म्हणून एकनाथ शिंदे यांनी भरत गोगावले यांची प्रतोद म्हणून नियुक्ती केली. सर्वप्रथम सुनील प्रभूंना तुम्ही बाहेर काढा, अशी सूचना त्यांना त्यावेळी करण्यात आली. या संवादाचा व्हीडिओही व्हायरल झाला होता. तोच हा क्षण...

बघता बघता काही दिवसांतच शिंदेंच्या बाजूने 40 आमदार गुवाहाटीत जमले.

एकनाथ शिंदे आपल्या समर्थक आमदारांना वेळोवेळी संबोधित करून भूमिकेवर ठाम राहण्याबाबत मार्गदर्शन करायचे. आपल्या मागे महाशक्ती असल्याचं वक्तव्य त्यांनी केल्यानंतर हा व्हीडिओ व्हायरल झाला होता.

यादरम्यान, सांगोल्याचे आमदार शहाजी पाटील यांचं काय झाडी, काय डोंगार, काय हाटील हे वक्तव्य प्रचंड व्हायरल झालं. त्याचा सर्वांनी आनंद घेतला. एकनाथ शिंदे यांनी या डायलॉगवर तयार झालेलं गाणं शहाजी पाटील यांना दाखवून डायलॉग पुन्हा बोलून दाखवण्याची फर्माईश केली.

दोन दिवसांनंतर गुवाहाटीत मंत्री गुलाबराव पाटील हेसुद्धा एकनाथ शिंदे गटाला येऊन मिळाले.

एकनाथ शिंदे जो काही निर्णय घेतील, तो आम्हाला मान्य असेल, असा ठराव करून आमदारांनी एकनाथ शिंदे यांना त्यांच्याबाबत सर्वाधिकार दिले.

अनेक दिवस उद्धव ठाकरेंच्या बाजूने असलेले मंत्री उदय सामंत हेसुद्धा अखेरीस एकनाथ शिंदे यांच्या गटात दाखल झाले.

एकनाथ शिंदे यांच्या बाजूने आमदार ठाम होते. दररोज या आमदारांच्या बैठका व्हायचा. एकनाथ शिंदे रोज त्यांना संबोधन करायचे.

गुवाहाटीतून निघण्याच्या एक दिवस आधी म्हणजेच 28 जून रोजी एकनाथ शिंदेंसह सर्व आमदारांनी मिळून गुवाहाटीत कामाख्या देवीचं दर्शन घेतलं.

29 जून रोजी एकनाथ शिंदे समर्थक आमदारांनी गुवाहाटीवरून गोव्याकडे प्रयाण केलं. त्यानंतर 30 जून रोजी समर्थक आमदारांना गोव्यातच ठेवून एकनाथ शिंदे प्रमुख आमदारांसह मुंबईकडे रवाना झाले.

30 जून रोजी सकाळी 11 वाजता बहुमत चाचणी होणं अपेक्षित होतं. पण मुख्यमंत्री उद्धव ठाकरेंच्या राजीनाम्यामुळे बहुमत चाचणीऐवजी थेट देवेंद्र फडणवीस-एकनाथ शिंदे यांचा शपथविधी होणार, हे स्पष्ट झालं.

राजभवनवर मोठा ट्विस्ट या घटनाक्रमात पाहायला मिळाला. मुख्यमंत्रिपदी एकनाथ शिंदे यांची वर्णी लागेल, अशी घोषणा याठिकाणी देवेंद्र फडणवीसांनी केली. तसंच स्वतः सत्तेच्या बाहेर राहणार असल्याचं फडणवीसांनी जाहीर केलं.

ध्यानी न मनी असे एकनाथ शिंदे महाराष्ट्राच्या मुख्यमंत्रिपदावर विराजमान झाले.

पण, पुढच्या 2 तासांमध्येच देवेंद्र फडणवीसांनी पक्षश्रेष्ठींच्या आदेशानंतर उपमुख्यमंत्रिपदाची शपथ घेतली. हा या संपूर्ण घटनाक्रमातला सर्वांत मोठा ट्वीस्ट मानला जातोय.

मुख्यमंत्रिपदाची शपथ घेतल्यानंतर एकनाथ शिंदे यांनी आपल्या समर्थक आमदारांशी व्हीडिओ कॉलवरून संवाद साधला. यावेळी सर्व आमदारांनी एकनाथ शिंदेंचं अभिनंदन केलं.

काही वेळातच मुख्यमंत्री एकनाथ शिंदे यांनी मंत्रिमंडळ बैठक घेतली. यावेळी उपमुख्यमंत्री देवेंद्र फडणवीस त्यांच्यासोबत उपस्थित होते.

मुख्यमंत्री एकनाथ शिंदे यांनी रात्री पुन्हा गोवा गाठलं. इथे गोव्याचे मुख्यमंत्री डॉ. प्रमोद सावंत यांनी त्यांची भेट घेतली.

संकलन - हर्षल आकुडे, बीबीसी न्यूज मराठी

हेही वाचलंत का?

(बीबीसी न्यूज मराठीचे सर्व अपडेट्स मिळवण्यासाठी आम्हाला YouTube, Facebook, Instagram आणि Twitter वर नक्की फॉलो करा.

बीबीसी न्यूज मराठीच्या सगळ्या बातम्या तुम्ही Jio TV app वर पाहू शकता.

'सोपी गोष्ट' आणि '3 गोष्टी' हे मराठीतले बातम्यांचे पहिले पॉडकास्ट्स तुम्ही Gaana, Spotify, JioSaavn आणि Apple Podcasts इथे ऐकू शकता.)