संभाजी भिडे : 'असले न्यायाधीश त्या जागेवरून संपवले पाहिजेत' #5मोठ्याबातम्या

विविध वर्तमानपत्रं आणि वेबसाईट्सवर प्रसिद्ध झालेल्या महत्त्वाच्या बातम्यांचा आढावा.

1. 'असले न्यायाधीश त्या जागेवरून संपवले पाहिजेत...' संभाजी भिडेंचं वादग्रस्त वक्तव्य

लिव्ह इन रिलेशनशिप अयोग्य नाही, असं म्हणणाऱ्या न्यायाधीशांना त्या जागेवरून संपवलं पाहिजे, असं वक्तव्य शिवप्रतिष्ठान संघटनेचे प्रमुख संभाजी भिडेंनी केलंय. लोकसत्तानेही ही बातमी दिली आहे.

मी हे बोलल्याने गुन्हे दाखल होतील, काय गुन्हे दाखल करायचे ते करू देत, असंही त्यांनी म्हटलंय.

राज्य सरकारने सुपर मार्केटमध्ये वाईन विक्री करण्याचा निर्णय घेतल्यानंतर संभाजी भिडेंनी सांगलीत पत्रकार परिषद घेतली. त्यावेळी भिडे बोलत होते.

"लिव्ह इन रिलेशनशिप हा काय बेशरमपणा आहे. कसलं लिव्ह इन रिलेशनशिप? लिव्ह इन रिलेशनशिप अयोग्य नाही असं म्हणणारी न्यायालयेदेखील वध्य आहेत. असले न्यायाधीश त्या जागेवरून संपवले पाहिजेत.

"मी बोलतोय त्याचा मला चटका बसेल. माझ्यावर गुन्हे दाखल होतील. काय गुन्हे दाखल करायचेत ते करूदेत," असं या पत्रकार परिषदेत बोलताना संभाजी भिडे म्हणाले.

2. कर्नाटकचे माजी मुख्यमंत्री येडियुरप्पांच्या नातीचा मृत्यू

कर्नाटकचे माजी मुख्यमंत्री बी. एस. येडियुरप्पा यांची नात सौंदर्याचा मृत्यू झालाय. 28 जानेवारीला सौंदर्या बंगळुरूमधल्या त्यांच्या राहत्या घरी मृतावस्थेत आढळल्या. त्या 30 वर्षांच्या होत्या. NDTV ने ही बातमी दिली आहे.

पोलिसांनी या प्रकरणी अनैसर्गिक मृत्यूचा गुन्हा नोंदवला होता.

येडियुरप्पांची दुसरी मुलगी पद्मावती यांच्या सौंदर्या या कन्या होत्या. त्या पेशाने डॉक्टर होत्या. 2018मध्ये त्यांचा त्यांचे सहकारी असणाऱ्या डॉ. नीरज यांच्याशी विवाह झाला होता.

3. राज्यात मोठी पोलिस भरती होणार

राज्यात लवकरच 7,200 पदांसाठी पोलिस भरती केली जाणार आहे. मंत्रिमंडळाच्या नुकत्याच झालेल्या बैठकीत हा निर्णय घेण्यात आला. 5,200 पदांसाठीची भरती प्रक्रिया सध्या अंतिम टप्प्यात असल्याचं गृहमंत्री दिलीप वळसे पाटील यांनी म्हटलंय.

या पदांसाठीच्या लेखी आणि शारीरिक परीक्षा झाल्या असून त्याची अंतिम यादी जाहीर करणं बाकी आहे.

ही प्रक्रिया पूर्ण झाल्यानंतर 7,200 जागांसाठीची भरती प्रक्रिया सुरू करण्यात येणार असल्याचं झी24तासने दिलेल्या बातमीत म्हटलंय.

4. डॉ. व्ही. अनंत नागेश्वरन भारताचे नवीन आर्थिक सल्लागार

डॉ. व्ही. अनंत नागेश्वरन यांची भारताच्या नवीन आर्थिक सल्लागारपदी नियुक्ती करण्यात आली आहे. त्यांनी 28 जानेवारीला पदभार स्वीकारला. ABP माझाने ही माहिती दिली आहे.

अर्थमंत्रालयाने ट्वीट करत याविषयीची माहिती दिली.

या आधीचे मुख्य आर्थिक सल्लागार के. व्ही. सुब्रमण्यम यांचा कार्यकाळ डिसेंबर 2021मध्ये संपला होता. त्यानंतर आता ही जबाबदारी डॉ. व्ही. अनंत नागेश्वरन यांना देण्यात आली आहे.

डॉ. नागेश्वरन यांनी यापूर्वी लेखक, शिक्षक आणि सल्लागार म्हणून भारत आणि सिंगापूरमध्ये काम केलं आहे.

5. दिल्ली गँगरेप प्रकरणी 11 जणांना अटक

दिल्लीतल्या शाहदरा भागातल्या कस्तुरबा नगरमध्ये एका महिलेचं कथितरित्या अपहरण करून गँगरेप प्रकरणी पोलिसांनी आतापर्यंत 11 जणांना अटक केली आहे. बीबीसी हिंदीने ही बातमी दिली आहे.

या महिलेचं मुंडन करून तिच्या चेहऱ्याला काळ फासण्यात आलं आणि गळ्यात चपलांची माळ घालून फिरवण्यात आल्याचा आरोप आहे. ही पीडिता 20 वर्षांची असल्याचं सांगण्यात आलंय.

या प्रकरणी अटक करण्यात आलेल्यांमध्ये 9 महिलांचा समावेश असल्याचं दिल्ली पोलिसांनी सांगितलंय.

हेही वाचलंत का?

(बीबीसी न्यूज मराठीचे सर्व अपडेट्स मिळवण्यासाठी आम्हाला YouTube, Facebook, Instagram आणि Twitter वर नक्की फॉलो करा.

बीबीसी न्यूज मराठीच्या सगळ्या बातम्या तुम्ही Jio TV app वर पाहू शकता.

'सोपी गोष्ट' आणि '3 गोष्टी' हे मराठीतले बातम्यांचे पहिले पॉडकास्ट्स तुम्ही Gaana, Spotify, JioSaavn आणि Apple Podcasts इथे ऐकू शकता.)