Heart Attack: पुनित राजकुमार यांचं हृदयविकाराच्या धक्क्याने निधन

लोकप्रिय कन्नड अभिनेते पुनित राजकुमार यांचं बंगळुरू येथे निधन झालं. ते 46 वर्षांचे होते.

पुनित राजकुमार यांचं निधन हृदयविकाराच्या धक्क्याने झालं, अशी माहिती रुग्णालयाने PTI वृत्तसंस्थेला दिली.

पुनित राजकुमार यांचा कर्नाटकासह दक्षिण भारतात मोठा चाहता वर्ग होता. तरुण वयातच त्यांची प्राणज्योत मालवल्याने चित्रपट रसिकांना मोठा धक्का बसला आहे.

काही दिवसांपूर्वीच हिंदी चित्रपट अभिनेता आणि मॉडेल सिद्धार्थ शुक्ला यांचंही वयाच्या 41 व्या वर्षीच हृदयविकाराने निधन झालं होतं. त्यानंतर आता आणखी एका मोठ्या अभिनेत्याने हृदयविकाराच्या धक्क्याने आपले प्राण गमावले.

प्रतिक्रियांचा महापूर

पुनित राजकुमार यांच्या निधनाची बातमी समोर येताच सोशल मीडियावर प्रतिक्रियांचा महापूर आल्याचं दिसून येतं.

कर्नाटकचे मुख्यमंत्री बसवराज बोम्मई यांनी पुनित यांच्या निधनाबाबत शोक व्यक्त केला आहे..

ते म्हणाले, पुनित राजकुमार यांचं हृदयविकाराच्या धक्क्याने निधन झालं. या बातमीमुळे मला मोठा धक्का बसला आहे. त्यांच्या निधनामुळे कन्नड चित्रपटसृष्टी आणि कर्नाटक राज्याची मोठी हानी झाली. देव त्यांच्या आत्म्याला शांती देवो. तसंच हे दुःख सहन करण्याची मला शक्ती मिळो, ही प्रार्थना."

याव्यतिरिक्त तामिळनाडूचे मुख्यमंत्री एम. के. स्टॅलिन यांनीही पुनित यांच्या निधनाबाबत दुःख व्यक्त केलं.

मी पॉवर स्टार पुनित राजकुमार यांच्या अशा अचानक निधनामुळे स्तब्ध झालो आहे. ते लोकप्रिय कन्नड अभिनेते राजकुमार यांचे पुत्र होते. आमच्या कुटुंबाचे त्यांच्या कुटुंबासोबत गेली कित्येक वर्षांपासून मधुर संबंध होते. त्यामुळे माझ्यासाठी हा वैयक्तिक दुःखाचा क्षण आहे, असं स्टॅलिन म्हणाले.

क्रिकेटपटू वासिम जाफर, व्हीव्हीएस लक्ष्मण, हरभजन सिंग यांच्यासह सुनिल शेट्टी आणि राणा डग्गुबती सर्वच जण पुनित यांच्या निधनामुळे दुःखी झाले आहेत.

सर्वांनी ट्विटरवर आपल्या भावनांना वाट मोकळी करून दिली.

भारतीय क्रिकेट संघाचे माजी कर्णधार आणि माजी प्रशिक्षक अनिल कुंबळे लिहितात, "पुनित यांच्या अचानक जाण्यामुळे मी प्रचंड गहिवरलो आहे. फिल्म इंडस्ट्रीने एक हिरो गमावला. ते अत्यंत अफलातून व्यक्ती होते. खूपच विनम्र आणि उर्जेने भरलेलं असं त्यांचं व्यक्तिमत्व होतं. त्यांचे कुटुंबीय, मित्रमंडळी आणि असंख्य चाहत्या वर्गाच्या दुःखात मी सहभागी आहे."

दरम्यान, पुनित यांच्या निधनाची माहिती मिळाल्यानंतर त्यांचा चाहतावर्ग त्यांच्या बंगळुरू येथील निवासस्थानासमोर मोठ्या संख्येने जमा झाल्याची माहिती मिळत आहे.

हेही वाचलंत का?

(बीबीसी न्यूज मराठीचे सर्व अपडेट्स मिळवण्यासाठी आम्हाला YouTube, Facebook, Instagram आणि Twitter वर नक्की फॉलो करा.

बीबीसी न्यूज मराठीच्या सगळ्या बातम्या तुम्ही Jio TV app वर पाहू शकता.

'सोपी गोष्ट' आणि '3 गोष्टी' हे मराठीतले बातम्यांचे पहिले पॉडकास्ट्स तुम्ही Gaana, Spotify, JioSaavn आणि Apple Podcasts इथे ऐकू शकता.)