दिलीप कुमार यांचं ट्वीट -'व्हॉट्सअप फॉरवर्डवर विश्वास ठेवू नका, माझी तब्येत स्थिर आहे'

आपली तब्येत स्थिर असल्याचं दिलीप कुमार यांच्या अधिकृत ट्विटवर अकाऊंटवरून सांगण्यात आलं आहे.

या ट्वीटमध्ये म्हटलंय, "व्हॉट्सअप फॉरवर्डवर विश्वास ठेवू नका. दिलीप कुमार यांची तब्येत स्थिर आहे. तुम्ही केलेल्या प्रार्थनांसाठी आभारी आहोत. दवाखान्यातून त्यांना 2 ते 3 दिवसांत सुट्टी मिळेल, असं डॉक्टरांनी सांगितलं आहे."

दिलीप कुमार यांना रविवारी (6 जून) सकाळी मुंबईमधील रुग्णालयात दाखल करण्यात आलं आहे. गेल्या काही दिवसांपासून त्यांना श्वास घेण्यास त्रास होत असल्यामुळे त्यांना रुग्णालयात दाखल करण्यात आल्याची माहिती समोर आली. सध्या त्यांच्यावर उपचार सुरू आहेत.

गेले काही दिवस त्यांना श्वास घेण्यास त्रास होत आहे तसंच रुटीन चेकअपसाठी दाखल करण्यात आल्याचं दिलीप कुमार यांच्या पत्नी सायरा बानो यांनी सांगितलं.

राष्ट्रवादी काँग्रेसचे प्रमुख आणि खासदार शरद पवार यांनी ज्येष्ठ अभिनेते दिलीप कुमार यांची हिंदुजा रुग्णालयात भेट घेतली होती.

ट्रॅजेडी किंग दिलीप कुमार

ट्रॅजेडी किंग म्हणून ओळखल्या जाणाऱ्या दिलीप कुमारांनी सुमारे सहा दशकं त्यांनी आपल्या अभिनयाद्वारे चित्रपटसृष्टीवर अधिराज्य गाजवलं आहे. या काळात त्यांनी 63 चित्रपटाच काम केलं. आपल्या कामामुळे अभिनयाच्या क्षेत्रात त्यांनी नवे आयाम प्रस्थापित केले.

सध्या पाकिस्तानात असलेल्या पेशावरमध्ये 11 डिसेंबर 1922 साली त्यांचा जन्म झाला. त्याचं मूळ नाव युसूफ खान होतं. त्यांचे वडील फळ व्यापारी होते.

ज्वार भाटा हा त्यांचा पहिला चित्रपट 1944 मध्ये प्रदर्शित झाला होता. 1998 मध्ये आलेल्या किला चित्रपटातली भूमिका त्यांची अखेरची भूमिका ठरली. मुघल-ए-आजम, नया दौर, देवदास, या चित्रपटातल्या त्यांच्या भूमिका प्रचंड गाजल्या. भारतातच नाही तर पाकिस्तानातही त्यांचे असंख्य चाहते आहेत.

दिलीप कुमार सायरा बानो यांच्याबरोबर 11 ऑक्टोबर 1966 ला झाला. तेव्हा सायरा फक्त 25 वर्षांच्या होत्या तर दिलीप कुमारांचं वय 44 वर्षं होतं.

त्यांना पद्मविभूषण हा भारताचा नागरी सन्मान आणि पाकिस्तानचा 'निशान-ए-इम्तिआज' या पाकिस्तानच्या सर्वोच्च नागरी सन्मानाने गौरवण्यात आलं आहे. 2000-2006 या काळात त्यांनी राज्यसभेत खासदारपदही भूषवलं आहे.

हे वाचलंत का?

(बीबीसी न्यूज मराठीचे सर्व अपडेट्स मिळवण्यासाठी आम्हाला YouTube, Facebook, Instagram आणि Twitter वर नक्की फॉलो करा.

बीबीसी न्यूज मराठीच्या सगळ्या बातम्या तुम्ही Jio TV app वर पाहू शकता.

'सोपी गोष्ट' आणि '3 गोष्टी' हे मराठीतले बातम्यांचे पहिले पॉडकास्ट्स तुम्ही Gaana, Spotify, JioSaavn आणि Apple Podcasts इथे ऐकू शकता.)