बृजभूषण यांच्याविरोधातील पॉक्सो रद्द करा, दिल्ली पोलिसांची कोर्टात मागणी

भारतीय कुस्ती महासंघाचे माजी अध्यक्ष आणि भाजप खासदार बृजभूषण शरण सिंह यांच्या विरुद्ध महिला कुस्तीपटूंच्या लैंगिक छळाच्या आरोपासंदर्भात दिल्ली पोलिसांनी गुरुवारी 15 जून रोजी राऊस एव्हेन्यू न्यायालयात आरोपपत्र दाखल केलं आहे. त्यावर आता 22 जूनरोजी सुनावणी होणार आहे.

15 जूनपर्यंत बृजभूषण यांच्याविरोधात आरोपपत्र दाखल होईल, असं आश्वासन केंद्र सरकारनं कुस्तीपटूंना दिलं होतं. आज 15 जून म्हणजेच शेवटच्या दिवशी सिंह यांच्याविरोधात आरोपपत्र दाखल झालं आहे.

बृजभूषण शरण सिंह यांच्या विरोधात दोन एफआयआर दाखल करण्यात आल्या होत्या. त्यापैकी एक पॉक्सो कायद्यांंतर्गत नोंद करण्यात आली होती. मात्र पॉक्सो प्रकरणात ब्रिजभूषण शरण सिंह यांना दिलासा मिळाला आहे.

या प्रकरणी कॅन्सलेशन रिपोर्ट म्हणजेच आरोप रद्द करण्याची मागणी करताना दिल्ली पोलिसांनी बृजभूषण शरण सिंह यांना दिलासा दिला आहे.

सिंह यांच्यावर अल्पवयीन महिला कुस्तीपटूंनी लैंगिक छळाचा आरोप केला होता, त्यानंतर दिल्ली पोलिसांनी गुन्हा नोंदवून या प्रकरणाचा तपास सुरू केला.

अल्पवयीन कुस्तीपटूच्या कुटुंबीयांनी त्यांचा खटला मागे घेतला होता, मात्र इतर कुस्तीपटू ब्रिजभूषण सिंगच्या अटकेवर ठाम आहेत.

दिल्ली पोलिसांनी न्यायालयात सांगितलं की, कुस्तीपटूंच्या वतीने दाखल केलेल्या एफआयआरची तपासणी केल्यानंतर बृजभूषण शरणसिंह यांच्या विरोधात आयपीसी कलम 354 354 ए, 354 डी, 506 (1) अंतर्गत गुन्हा दाखल करण्यात आला आहे.

या आरोपांमध्ये किती शिक्षा होते?

कलम 354- महिलांच्या विनयाचा भंग होण्याच्या उद्देशाने त्यांच्यावर हल्ला किंवा बळाचा वापर करणे. यासाठी 1 ते 5 वर्षांच्या शिक्षेची तरतूद आहे.

कलम- 354 अ- लैंगिक अत्याचार- तीन वर्षांपर्यंत शिक्षा शक्य

कलम 354 ड- पाठलाग करणे. पहिल्यांदा दोषी आढळल्यावर तीन वर्षांपर्यंत शिक्षेची शक्यता

कलम 506 (1)- धमकी- 2 वर्षांपर्यंत शिक्षेची तरतूद

या सर्व कलमांच्या बाबतीतील गुन्ह्यांत पोलीस संबंधित व्यक्तीला वॉरंटविना अटक करू शकतात पण या सर्व प्रकऱणांत जामीन मिळवण्याचा त्या व्यक्तीला अधिकार आहे.

दिल्ली पोलिसांनी आपल्या अहवालात पॉक्सो तक्रारीबाबत कोणताही पुरावा सापडला नसल्याचं सांगितलं.

अशा परिस्थितीत पोलिसांनी बृजभूषण यांच्यावर पॉक्सो अंतर्गत दाखल केलेला गुन्हा मागे घेण्याची शिफारस न्यायालयात केली आहे.

तक्रारदार म्हणजेच पीडितेचे वडील आणि पीडितेने दिलेल्या जबाबाच्या आधारे पोलिसांनी हा अहवाल न्यायालयात सादर केला आहे.

या संदर्भातली पुढची सुनावणी आता 4 जुलैला पटीयाला हाऊस कोर्टात होणार आहे.

बृजभूषण शरण सिंह या प्रकरणात निर्दोष असल्याचं त्यांचे वकील ए. पी. सिंह यांनी बीबीसीशी बोलताना सांगितलं. तसंच त्यांच्या विरोधात राजकीय कट रचला जात असल्याचं सिंग यांचं मत आहे.

सिंग यांनी पुढे सांगितलं की, "दिल्ली पोलिसांना पॉक्सो तक्रारीबाबत कोणताही पुरावा सापडला नसून बृजभूषण यांच्यावरील पॉक्सो अंतर्गत दाखल केलेला गुन्हा मागे घेण्याची शिफारस न्यायालयात केली आहे. त्यांच्याविरोधात राजकीय कट रचला जातोय. आम्हाला न्यायपालिकेवर पूर्ण विश्वास आहे. सत्य काय आहे ते लवकरच समोर येईल आणि बृजभूषण सिंह निर्दोष सुटतील."

आतापर्यंत काय काय झालं?

‘या’ कारणामुळे उठवला लैंगिक शोषणाविरोधात आवाज

ज्या दोन एफआयआर दाखल करण्यात आल्या आहेत, त्यामध्ये कुस्ती महासंघाच्या प्रशासनात गेल्या 12 वर्षांपासून अध्यक्ष असल्यामुळे बृजभूषण शरण सिंह यांचं वाढलेलं प्रभुत्व आणि ताकद यांचा वारंवार उल्लेख आहे.

कुस्तीपटूंच्या मते, लैंगिक संबंध ठेवण्याचा प्रस्ताव मान्य न केल्यास त्यांना प्रशासनातील कायद्यांचा वापर करून अनेक पद्धतीने त्रास देण्यात आला. लैंगिक शोषणाविरोधात तातडीने तक्रार न करण्याचं कारणही हेच असल्याचं कुस्तीपटूंचं म्हणणं होतं.

त्यांच्यासोबत हे प्रकार करिअरच्या सुरुवातीलाच घडले होते. त्यामुळे आपलं म्हणणं मांडण्याचं धाडस त्यांना एकवटता आलं नाही, असं अनेक तक्रारदारांनी म्हटलं.

गेल्या वर्षी जागतिक ज्युनियर कुस्ती स्पर्धेच्यावेळी समोर आलेल्या माहितीमुळे यावर्षी जानेवारी महिन्यात कुस्तीपटूंनी आवाज उठविण्याचं ठरवलं, असं साक्षीने स्पष्ट केलं.

“2022 मध्ये एक-दोन महिला कुस्तीपटूंनी आम्हाला जागतिक ज्युनियर कुस्ती स्पर्धेच्या दरम्यान घडलेल्या लैंगिक शोषणाच्या काही घटना सांगितल्या. तेव्हा आम्ही सगळेजण एकत्र बसलो आणि काहीतरी करायला हवं, असं आम्हाला वाटलं,” साक्षीने सांगितलं.

तेव्हा विनेश फोगाट आणि बजरंग पुनिया यांनी गृह मंत्र्यांची भेटही घेतली होती. पण पुढे कोणतीही कारवाई न झाल्यामुळे त्यांनी जंतर मंतरवर आंदोलन करण्याचा निर्णय घेतला, असं साक्षीने बीबीसीला दिलेल्या मुलाखतीत म्हटलं आहे.

हेही वाचलंत का?

(बीबीसी न्यूज मराठीचे सर्व अपडेट्स मिळवण्यासाठी आम्हाला YouTube, Facebook, Instagram आणि Twitter वर नक्की फॉलो करा. 'गोष्ट दुनियेची', 'सोपी गोष्ट' आणि '3 गोष्टी' हे मराठीतले बातम्यांचे पहिले पॉडकास्ट्स तुम्ही Gaana, Spotify, JioSaavn आणि Apple Podcasts इथे ऐकू शकता.)