Түркия орус аскерий учагын атып түшүрдү

Түркиянын аскерий учактары Сирия менен чектешкен аба мейкиндигинен Орусиянын аскерий учагын атып түшүргөнү кабарланууда.

Түрк аскерий жетекчилери орус пилоттору Түркиянын аба мейкиндигин бузуп жатканы тууралуу эскертүүлөргө баш ийбеген соң,Түркиянын F-16 учактары аларды атып түшүргөнүн билдирген.

Интернетке жарыяланып кеткен видеодо аскерий учак Латакия провициясындагы аймакка кыйрап түшкөнү көрүнөт. Түрк телеканалдары "Анадолу" агенттигинин видеосун көргөзүшүүдө.

Орусиянын коргоо министрлиги Су-24 истребители кыйраганын тастыктады. “Бүгүн Сириянын аймагында Су-24 орусиялык авиагруппасынын учагы кыйрады. Учак жерен атып түшүрүлгөнү божомолдонууда”,- деп айтылат министрликтин билдирүүсүндө.

Орусия тараптын маалыматы боюнча, пилоттор катапульт жолу менен учактан секирип кеткен, бирок алардын тагдыры белгисиз.

Орусиянын коргоо министрлиги Су-24 Түркиянын аба мейкиндигин бузган эмес деп эсептейт. Орусия сентябрь айынан соңунда Сирия президенти Башар Асаддын каршылаштарын бутага алган аба соккуларын баштаган.