Кезексиз президенттик шайлоо жана референдум

Түз алып баруу

1. 10 январь 2021“Жалпы иш” коомдук фонду: санитардык нормаларды сактабай жаткан участкалар бар

   “Жалпы иш” коомдук фонду шайлоо участкаларынын 16 пайызы коронавируска байланыштуу санитардык эрежелерди толук аткарбай жатканын билдирди. Аталган фонд өлкө боюнча 500 байкоочусун шайлоо тилкелерине жайгаштырган.

   Коомдук фонд ар түрдүү мызйам бузууларды каттаганын дагы жарыялады. Мислаы, Ат-Башы районундагы № 4026 участогу ачылган эмес. Жумгалдагы № 4116 жана Бакай-Атадагы № 6051 участокторунда байкоочулардын укугу чектелген.

   Бишкекте шайлоодогу мыйзам бузуулар боюнча маалымат кабыл алууга түз байланыш иштеп жатат.

2. 10 январь 2021Сооронбай Жээнбеков президенттик башкаруу системасы үчүн добуш берди

   Жергиликтүү басылмалар экс-президент Сооронбай Жээнбеков кезексиз өтүп жаткан президенттик шайлоо жана референдумга келип добушун бергенин жазды.

   Журналисттердин суроолорун жооп берип жатып, президенттик башкаруу формасыүчүн добуш бергенин айткан. Бул тууралуу 24.kg агенттиги жазып чыкты. Ал башка суроолорго жооп берүүдөн баш тартып, добушун бергенден кийин шайлоо участогунан чыгып кеткен.

   Кыргызстанда өктөн жылдын 4-октябрда өткөн талаштуу парламенттик шайлоодон кийин бийлик алмашып, курч саясий окуялар болду. 2017-жылы президентикке келген С.Жээнбеков элге кайрылуу жасап, отставкасын жарыялаган эле.

   Бул макаланы дагы караңыз: 2020: Кыргызстандысолкулдаткан 10 күн

3. 10 январь 2021Бишкектин айрым участкаларында добуш берүүгө келгендер пасивдүү

   Бишкектин Чыгыш-5 кичи районундагы №1337 шайлоо участкасында шайлоочулардын активдүүлүгү анча эмес.

   Топурап кезек күткөндөр жок, бир-экиден гана шайлоочу келип кетүүдө.

   Участканын башчысы Алмагүл Сайдинованын айтымында, бул участокто өткөн шайлоодо добуш берүүгө катышкандар 35% ашпаптыр. Бул жолу деле ушундай болушу мүмкүн дейт.

4. 10 январь 2021Тоолуу Нарын жергесинде түшкө жакын шайлоочулар активдеше баштады, Нарын районундагы Өрнөк айылында түшкө жакын добуш берүүгө келген шайлоочулар көбөйө баштады.

   Нарын районундагы Өрнөк айылында түшкө жакын добуш берүүгө келген шайлоочулар көбөйө баштады. Жергиликтүү эл малын жайлап, үй оокатын бүтүрүп койгондон кийин добуш берүүгө келип жатат.

   Мурунку шайлоодо добуш берүүгө катышкан шайлоочулар элүү пайыздан араң эле ашкан эле. Бул жолу андан көбүрөөк болот ко деп болжоп атышат.

   Тоо арасындагы айылдарда күн суук, кар жука, көбүнчө карандай суук болуп жатат. Бирок жергиликтүү эл шайлоо убагында суукка карабайт.

5. 10 январь 2021Т. Шайназаров: түшкө чейин мыйзам бузуулар боюнча 11 кайрылуу келип түштү

   Борбордук шайлоо комиссиясынын мүчөсү Тынчтык Шайназаров шайлоо мыйзамдарын бузуу фактылары боюнча 11 кайрылуу түшкөнүн Би-Би-Сиге билдирди. Шайлоо жараяны башталган күндөн тарта добуш сатып алуу боюнча жалпысынан 13 кайрылуу түштү. Кызмат абалынан кыянаттык менен пайдалануу (административдик ресурс) боюнча 17 кайрылуу болду. Шайназаров ар бир факт боюнча укуктук баа берилгенин кошумчалады.

6. 10 январь 2021Сынга кабылган референдум

   Кыргызстан бийлик алмашкандан үч айдан кийин кайрадан президентти тандап жатат. Бир эле учурда мамлекеттик башкаруунун формасын тандоо боюнча референдум өтүүдө. Андагы негизги суроо президенттик, парламенттик башкаруу формасы жөнүндө. Бул тууралуу макаланы бул жерден окуңуз: "Башка тийген баягы эле тырмоок...": Кыргызстан президентти жана саясий системаны тандоодо

7. 10 январь 2021Саат 12:00гө карата шайлоочулардын катышуусу 9,3 пайыз болду

   БШКнын төрайымы Н.Шайлдабекова шайлоого катышуу боюнча соңку маалыматтар менен тааныштырды.

8. 10 январь 2021Ошто айрым добуш берүү жайларында автоматтык саноочу урналар иштебей калууда

   Ош шаардык аймактык шайлоо комиссиясынын төрагасы Эралы Арынбаев “суукка байланыштуу, техникалык себептерден улам автоматтык саноочу урналар иштебей калган учурлар болуп жатканын” билдирди.

9. 10 январь 2021Президентикке талапкер Улукбек Кочкоров добуш берди

   Президентикке талапкер Улукбек Кочкоров добуш берди. 47 жаштагы мурдагы эмгек жана социалдык өнүктүрүү министри Улукбек Кочкоров 2017-жылдагы президенттик шайлоого катышып, 0,50 % добушка ээ болгон.

10. 10 январь 2021Атыр Абдрахматова: добуш берүү үчүн башка технологияга өтүш керек

    БШКнын мурдагы төрайым орун басары Атыр Абдрахматова добуш берүү үкөктөр иштебей калып жатканы боюнча байма-бай маалыматтар келүүдө деп билдирди. Анын айтымында, жабдыктын оңдолушун күтүп кезек пайда болуп, бюллетендерди ачык таштап кеткен учурлар бар.

    “Азыр айрым участкаларда урналарды интернетке туташтырылган деген маалыматтар келип жатат. Ушул нерсе жаман. Бул добуш берүүнүн жыйынтыктарын алдын ала карап жатышат дегенди билдирет. Бул мыйзамсыз. Кимге канча добуш келди, канча жетпей жатат, ошого жараша дагы элди сүйрөп келиш керек деген маселе. Урна интернетке кечки саат сегизден кийин туташтырылып, БШКга маалымат жөнөтүлүш керек. Бул купуялуулукту да бузуп жатат. Канча пайыз шайлоочу добуш бергенин гана көрсө болот”, - деди Абрахматова Би-Би-Сиге.

    Атыр Абдрахматова өткөн парламенттик шайлоодогу техникалык мүчүлүштүктөр, тизме боюнча идентификациялык аппараттардын бир нече аптага иштебей калышы боюнча тиешелүү органдар кандай жыйынтык чыгарды деген суроону койду.

11. 10 январь 2021Президентикке талапкер Равшан Жээнбеков добуш берди

    Президенттикке талапкер Жээнбеков президенттик шайлоодо эки айлампа болгону абдан маанилүү экенин билдирди.

12. 10 январь 2021Саат онго карата шайлоочулардын 2,8 пайызы добушун берди

    Борбордук шайлоо комиссиясы саат онго карата шайлоочулардын 2,8 пайызы же 99 миң 772 киши добуш бергенин маалымдады.

13. 10 январь 2021Экс-президент Роза Отунбаева добуш берди

    Экс-президент Роза Отунбаева добуш берди. Ал парламенттик башкаруу жолунан кайтуу өлкөнү отуз жыл артка алып кетерин, президенттик башкаруу Кыргызстандын шартында кайрадан бир адамдын чексиз бийлигине, диктатурасына алып барат деп айтып келүүдө.

14. 10 январь 2021Президентикке талапкер Адахан Мадумаров добуш берди

    Президенттикке талапкер Мадумаров дайыма президенттик башкаруу системасын колдоп келгенин, бирок бул жолу референдум мыйзам бузуу менен өтүп жатканын белгиледи.

    Ал конституцияга өзгөртүүлөрдү киргизүү процедура так жазылса дагы жараян сакталбаганын айтты. Ошондой эле Мадумаров президенттик милдетин аткаруучу Баш мыйзамда реформа жүргүзө албарын жана 28-октябрда мөөнөтү бүткөн Жогорку Кеңеш дагы конституцияга өзгөртүү киргизе албарын белгиледи.

    Мадумаров президенттик шайлоодо экинчи айлампа болорун дагы кошумчалады.

15. 10 январь 2021Президентикке талапкер Садыр Жапаров добуш берди

    Президентикке талапкер Садыр Жапаров добуш берди. Ал журналисттердин суроолоруна жооп берип жатып: "Кытайдын шпиону", "Кытайдын жаранынын досу" деген сыяктуу айтылган кептерди кескин четке кагып, “Эл мындай калптарга ишенбейт, азыр колуңардагы смартфон аркылуу бардык маалыматтарды таап алса болот”,-деди Жапаров.

    "Эгерде шайлоону утуп чыксаңыз атаандаштарыңызга куугунтук болбойбу?",-деп сурады журналисттер.

    "Мыйзам бузса, ким экенине карабай жооп бериши керек”,-дейт С.Жапаров.

16. 10 январь 2021Коронавируска байланыштуу соңку абал

    Кыргызстанда бир сутка ичинде 135 киши коронавирусту жуктурду. Жалпысы болуп өлкөдө 82,273 киши вирусту жуктурду.

    Дүйнөдө пандемия учурунда шайлоо өткөрүү же аны жылдырып туруу негизги суроолордун бири болду. Шайлоо өткөн өлкөлөрдө добуш берүүдөн кийин коронавируска кабылгандардын саны көбөйдү деп айтууга болбойт. Себеби вирустун жайылышына бир нече жагдай себеп. Анын ичинде беткап кийип жүрүү, социалдык аралык эрежелерине кайдыгер мамиле кылуу сыяктуу себептер бар.

    Ага карабастан айрым өлкөлөрдө коронавируска кабылгандардын саны өскөнүн шайлоо менен байланыштырышууда. Мисалы, Сербиядагы парламенттик шайлоодон кийин коронавируска кабылгандардын саны кескин жогорулаган. Андан улам өлкөнүн дарыгерлери коронавируска байланыштуу кризисти көзөмөлгө алууга жооптуу болгон расмийлерди кызматтан алууну талап кылышкан.

    Медицина кызматкерлеринин айтымында, Сербиянын коронавирусту көзөмөлгө алууга жооптуу расмийлер эксперттердин айткандарына көңүл бурбай, саясатты биринчи орунга койгон. Үч жүз элүүдөн ашуун дарыгер кол койгон ачык катта шайлоодон кийин "коомдук саламаттык тармагында кризис" жаралганы жазылган.

17. 10 январь 2021БШК: үгүт маалындагы арыздардын көбү С.Жапаровдун үстүнөн түштү

    Борбордук шайлоо комиссиясынын мүчөсү Тынчтык Шайназаров мыйзам бузуулар боюнча маалымат берди.

    Борбордук шайлоо комиссиясы, Ички иштер министрлиги жана Башкы прокуратура тарабынантүзүлгөнЫкчам чара көрүүчү координациялык топтун маалыматы боюнча үгүт маалында мыйзам бузуулар тууралуу 61 арыз түшкөн.

    "Көпчүлүгү президенттикке талапкер Садыр Жапаровго байланыштуу",-деди БШК мүчөсү Т.Шайназаров. Даттануулар үгүт мыйзамдарын бузуу, башка талапкерлерге коркутуулар боюнча деди ал.

18. 10 январь 2021Жапониядагы шайлоо участогунда добуш берүү уланууда

    Саясат таанучу Чынара Эсенгул Кыргызстандын Жапониядагы элчиликте добуш бергенин, даярдык жакшы экенин коомдук сайтка жазды.

19. 10 январь 2021Президенттин милдетин аткаруучу Талант Мамытов добуш берди

    Президенттин милдетин аткаруучу Талант Мамытов Бишкектеги «Белек» маданий-оюн-зоок борборунун имаратындагы № 1053 шайлоо участогунда добуш берди.

20. 10 январь 2021Атыр Абдрахматова добуш берүү жайларында мүчүлүштүктөр көп болуп жатканын жазды

    Кыргызстандын Борбордук шайлоо комиссиясы кезексиз президенттик шайлоо жана референдумга байкоо салуу үчүн 35 эл аралык уюмдун байкоочулары катталганын ырастады. Андан сырткары 44өлкөдөн келген жана жергиликтүү байкоочулар көз салат.

    Борбордук шайлоо комиссиясынын мурдагы өкүлү Атыр Абдрахматова добуш берүү жайларында мүчүлүштүктөр көп болуп жатканын жана жабдыктар иштебей жатканын “Фейсбук” баракчасына жазып чыкты.