Za a fara cininkin 'yan kwallo a Premier da EFL tsakanin 27 ga Yuli
Asalin hoton, Getty Images
An tsayar da ranar 27 ga watan Yuli zuwa 10 ga watan Oktoba, domin bude kasuwar saye da sayar da 'yan kwallo a gasar Premier League da EFL, amma sai idan Fifa ta amince da hakan.
Haka kuma a kwai kasuwar cikin gida tsakanin Premier League da EFL da aka tsayar za ta ci daga 5 zuwa 16 ga watan Oktoba,
"A wannan lokacin kungiyoyin Premier za su ci kasuwa tsakaninsu da wanda ke gasa kasa da ta Premier League, ko dai a bayar da dan kwallo aro ko a saya gabaki daya'' in ji wata sanarwa daga Premier.
''Ba ciniki da za a yi tsakanin kungiyoyin Premier League a tsakanin a wannan lokacin''.
Hukumar da ke kula da kungiyoyin da ke buga gasar kasa da ta Premier League ta ce duk dan kwallon da ta saya a lokacin, ba zai buga wasa ba sai daga farkon kakar 2020-21.
''Wannan hukunci ya shafi kungiyoyin da za su buga wasannin cike gurbin shiga Premier League daga Championship.'' in ji sanarwar.
Za a rufe babbar kasuwar saye da sayar da 'yan kwallo ranar 5 ga watan Oktoba da karfe 11:00 na dare.
Ita kuwa wacce za a yi a cikin gida tsakanin kungiyoyin Premier League da na EPL za a rufe ranar Juma'a 16 ga watan da karfe 5:00 na yammaci.
Har yanzu ba a bayar da sanarwar ranar da za a fara kakar Premier League ta 2020-21 ba.
Wasu na cewa za a fara gasar Premier League ta badi daga ranar 12 ga watan Satumba, shi ma da zarar an kammala wasannin kasa da kasa da Fifa kan ware a watan na Satumba.
