Muna kawo muku labaran 'yan wasan da aka saya a kasuwar saye da musayar 'yan ƙwallon ƙafa kai-tsaye, yayin da ake rufe kasuwar a yau Litinin.
Mohammed Abdu and Umar Mikail
Asalin hoton, Inter Milan
Inter Milan ta sayi Matteo Darmian daga Parma a matsayin aro tare da zaɓin sayensa kan fan miliyan £2.2.
Ɗan ƙwallon mai shekara 30 zai ci gaba da wasa tare tsofaffin abokan wasansa a Manchester United Ashley Young da Romelu Lukaku da kuma Alexis Sanchez a filin wasa na San Siro.
Inter ta ɗauke shi ne kan yarjejeniyar shekara ɗaya.
Asalin hoton, Getty Images
Manchester United na daf da kammala cinikin dan kwallon tawagar Brazil, mai wasa a Porto, Alex Telles.
Tun farko United ta yi jan kafa wajen sayen mai tsaron bayan mai shekara 27.
Kocin United, Ole Gunnar Solskjaer na neman kara karfin mai tsaron baya daga hagu, ya kuma tabbatar Telles ne zai share masa kuka.
Porto na neman fam miliyan 18 daga United ga dan kwallon da yarjejeniyarsa zai kare a karshen kakar bana, wanda za a iya daukarsa a Janairu a matsayin mai cin gashin kai.
Telles wanda ya buga wa tawagar kwallon kafa ta Brazil wasa daya tal, ya ci wa Porto kwallo 21 a wasa 127 da ya yi wa kungiyar.
Wannan labarin ya zo a lokacin da ake cewar United ta kusa kammala daukar Edison Cavani, wanda ba shi da kungiya tun bayan barin Paris St Germain.
Ƙungiyar Everton ta tabbatar da ɗaukar ɗan wasan baya Ben Godfrey kan fan miliyan £25 daga Norwich.
Farashin zai iya ƙaruwa zuwa miliyan 30 idan aka haɗa da alawus da Everton za ta biya nan gaba.
Ɗan wasan mai shekara 22 kuma tsohon ɗan wasan tawagar 'yan ƙasa da shekara 21 ta Ingila, ya rattaba hannu kan yarjejeniyar shekara biyar tare da jagorar teburin Premier a halin yanzu - Everton.
Godfrey ya ce: "Burina a Everton shi ne lashe kofuna da cin wasanni. Ina son cin wasa. Ni matashi ne mai buri."
Barkanku da shigowa wannnan shafi. Sai kawai mu shiga abin da ya kawo mu.
Yau Litinin ce ranar ƙarshe ga ƙungiyoyin Turai domin kammala ɗaukar duk ɗan wasan da suke muradi a manyan gasanni.
Sai dai ƙungiyoyin Ingila za su ci gaba da ciniki tsakaninsu na 'yan wasan cikin gida, yayin da su kuma ƙungiyoyin Premier za su iya sayen 'yan wasan EFL har zuwa ƙarfe 5:00 na ranar Juma'a, 16 ga watan Oktoba.
A yankin Scotland kuma za a rufe ta da tsakar daren yau.
