Bayern Munich ta lashe Champions League

Rahoto kai-tsaye

Umar Mikail

1. 23 Agusta 2020An take wasa, PSG 0-0 Bayern Munich

   Karon farko kenan da PSG ke taɓa ƙwallo a wasan ƙarshe na Champions League kuma ta biyar daga ƙasar Faransa.

2. 23 Agusta 2020Ko Robert Lewandowski zai lashe kyautar Balon D'or?

   Robert Lewandowski ya ci ƙwallo a wasa tara a jere a Champions League, wanda Cristiano Ronaldo kawai ya fi shi zira ƙwallaye a wasanni a jere - ƙwallonsa 55 a duka gasanni a kakar bana.

   Game da ko Lewandowski zai lashe Balon D'or, Owen Hargreaves; tsohon ɗan wasan tsakiyar Bayern ya ce: " Ƙwarai kuwa. Ina ganin wanda shi ma zai shiga rukunin shi ne Kylian Mbappe."

3. 23 Agusta 2020Aiki ga me ƙare ka!

   Bayern Munich ce ƙungiya ta farko da ta taɓa lashe dukkanin wasanta 10 na farko a Champions League.

   Aiki ga me ƙare ka!

4. 23 Agusta 2020Ronaldinho, Beckam, Ibrahimovic ba su kai PSG ko'ina ba

   Ku tuna zaratan 'yan ƙwallo da suka haɗa da Ronaldinho David Beckam da Zlatan Ibrahimovic duka sun saka rigar nan mai launin shuɗi da ja amma dukkaninsu babu wanda ya iya kai PSG ko da wasan kusa da na ƙarshe.

   Amma yanzu alamu sun nuna cewa Neymar da Mbappe da Angel Di Maria za su iya taimaka wa ƙungiyar cimma abin da ta kasa cikin shekara 50 da kafa ta.

   Ƙwallayen da suka ci a Ligue 1 da Champions League na bana

   • Mbappe 23
   • Neymar 16
   • Di Maria 11

5. 23 Agusta 2020Yadda tsayuwar ƙungiyoyi za ta kasance, PSG vs Bayern Munich

   Kowacce ƙungiya sauyi ɗaya ta yi daga wasan da suka buga na semi fayinal.

   Golan PSG Keylor Navas ya warke daga jinyar da ya yi a bayan cinyarsa kuma zai maye gurbin Sergio Rico.

   Bayern Munich ta yi sauyi a karon farko tun bayan cigaba da wasanni a watan Yuni.

   Kingsley Coman ya maye gurbin Ivan Perisic a gefen hagu.

6. 23 Agusta 2020Wasa ne na musamman - Kocin Bayern, Hansi Flick, PSG vs Bayern Munich

   Bayern Munich ta shirya tsaf domin yin "duk mai yiwuwa" ta kammala wannan kakar cikin salo na musamman ta hanyar lashe Champions League, in ji kocin ƙungiyar, Hansi Flick.

   Zakarun Jamus ba sa yi wa sauran ƙungiyoyi da wasa a baki ɗayan kakar wasa ta 2019-20 kuma ba abin mamaki ba ne idan suka jinjina kofin nan a birnin Lisbon a wannan dare.

   Idan har ta yi nasarar lashe kofin na Champions League a karon farko tun shekarar 2013, Bayern za ta ɗaga kofin Turai da na Bundesliga a kaka guda karon farko kenan a tarihinta.

   "Wasa ne na musamman," in Flick, wanda ƙungiyar tasa ta lashe dukkanin wasa 10 a jere a Champions League na bana - babu ƙungiyar da cinye ta.

7. 23 Agusta 2020Tarihi ba ya tare da PSG a yau amma za ta iya kafa sabo, PSG vs Bayern Munich

   Wannan ne karon farko da PSG take zuwa wasan ƙarshe a gasar ta Champions League kuma wannan zubin 'yan wasan na mai horaswa Thomas Tuchel, su ne na 41 da suka samu halartar gasar a tarihin ƙungiyar.

   Sai dai fa ƙungiyoyi shida na baya-bayan nan da suka taɓa zuwa wasan ƙarshe a karon farko ba su kai labari ba.

   Ƙungiya ta ƙarshe da ta je wasan ƙarshe a karon farko kuma ta sha kashi ita ce Borussia Dortmund, inda Juventus ta doke ta a 1997.

8. 23 Agusta 2020Barkanmu da yammacin wasan ƙarshe na Champions League, PSG vs Bayern Munich

   Umar Mikail ke muku maraba da shigowa shafin sharhi kan wasan ƙarshe na gasar Zakarun Turai ta Champions League kai-tsaye tsakanin Bayern Munich da Paris Saint-Germain.

   Ku biyo mu don ganin yadda za a ɓarje gumi.