Amurka ta yi gargaɗi ga China kan goyon bayan Putin

Rahoto kai-tsaye

Sani Aliyu and Awwal Ahmad Janyau

1. 14 Maris 2022An kai wani mummunan hari kan wani bene mai hawa tara a Kyiv

   Akalla mutum daya ya rasa ransa kuma mutum uku sun sami raunuka bayan wani hari da aka kai kan wani ginin da fararen hula ke zama a Kyiv babban birnin kasar Ukraine, kamar yadda wata tashar talabijin mallakin gwamnatin kasar ta ruwaito.

   Kawo yanzu hukumar bayar da agaji ta Ukraine ta ce an gano wasu gawarwaki biyu baya ga wasu mutum uku da aka kai asibiti bayn harin da aka kai da karfe 7:40 agogon Kyiv.

   Hotunan da hukumar ta raba wa manema labarai sun nuna hayaki na tashi daga gini mai hawa tara yayin da 'yan kwana-kwana ke amfani da tsani domn ceto mazauna benen.

2. 14 Maris 2022Ga wasu cikin abubuwan da aka wayi gari da su a yakin da Rasha ke yi da Ukraine

   • Akwai rahoton da ke cewa Rasha ta bukaci China ta taimaka ma ta da makamai da kuma tallafi domin ta kaucewa takunkuman da kasashen yamacin Turai suka kakaba ma ta. Ofishin China da ke Washington ya musanta wannan rahoton
   • Wasu kafofin yada labarai na cewa Amurka ta gargadi China cewa za ta fuskanci matakan ladabtarwa "masu tsauri" idan ta taimaki Rasha
   • Za a gudanar da wata ganawa tsakanin Rasha da Ukraine ranar Litinin tahanyar fasahar intanet ta karfe 10:30 agogon Ukraine
   • Sojojin sama na Ukraine sun yi ikirarin harbo jiragen Rasha na yaki hudu cikin sa'a 24 da ta gabata, kuma ta ce ta kai wasu hare-hare "masu zafi" kan wasu sansanoni
   • Rasha a Ukraine Ba za a kyale fararen hula a biranen Sumy ba, birnin da ya sha hare-haren bama-bamai daga dakarun Rasha cikin makonni biyun da suka gabata
   • A birnin Mariupol, wadanda suka tsere sun shaida wa BBC cewa an kai wa unguwannin da fararen hula ke zama hare-hare babu kakkautawa tsawon dare da yini
   • Kana a birnin Rivne, an lalata wata nau'rar yada labaran talabijin yayin wani harin da Rasha ta kai da rokoki masu linzami kan birnin

3. 14 Maris 2022Lale marhabin!

   Masu bibiyar mu a wannan shafi muna muku barka da safiya da fatan an tashi lafiya.

   Sani Aliyu ke fatan kasancewa da ku a wannan yini domin kawo muku labarai da rahotanni daga sassan duniya daban daban, ciki har da yakin da ake gwabzawa tsakanin Rasha da Ukraine, da kuma batutuwan da ke wakana a gida Nijar da Kamaru da Chadi da Ghana da kuma Najeriya.

   Muna fatan za ku ci gaba da kasancewa da mu.