'Yan tawaye sun 'fille kan sojojin Kamaru' biyu

Rahoto kai-tsaye

Fauziyya Kabir Tukur and Umar Mikail

1. 14 Yuli 2021'Yan kasuwa uku sun mutu a rikici da jami'an rundunar saman Najeriya a Legas

   

   Asalin hoton, TWITTER

   Wani rikici tsakanin jami'an rundunar sojin saman Najeriya da ''yan jagaliya' a Legas ya yi sanadiyyar mutuwar 'yan kasuwa uku a Legas.

   Mutane da yawa sun samu raunuka a rikicin da aka yi a kasuwar Ladipo da ke unguwar Mushin a jihar ta Legas ranar Talata.

   Rahotanni sun bayyana cewa rikicin ya tursasa wa 'yan kasuwa rufe sana'o'insu.

   Kawo yanzu ba a san dalilin aukuwar rikicin ba,amma wasu da suka shaida lamarin sun ce sojoji da 'yan sanda sun mamaye kasuwar kuma sun dakile tashin hankalin.

2. 14 Yuli 2021Ana gudanar da bikin Bastille a Faransa

   

   Asalin hoton, Getty Images

   Faransa na gudanar da bikin juyin juya hali na Bastille tare da daukar karin matakan kariya daga annobar korona.

   Za a gudanar da atisayen sojoji nan gaba a Champs-Elysee da ke Paris amma dole ne sai al'ummar kasar sun nuna shaidar da ta tabbatar da an yi musu rigakafin korona kafin su samu shiga wajen.

   An takaita yawan mutanen da za su iya kallon atisayen sojojin zuwa dubu 10 sannan sanya takunkumi ya zama dole.

   A bara, an soke gudanar da atisayen inda aka gudanar da wani kwarya-kwaryan biki.

3. 14 Yuli 2021Biden ya zabi fitaccen mai adawa da Trump a matsayin jakadan Amurka ga Turkiyya

   Shugaba Joe Biden ya zabi wani fitaccen mai adawa da Trump na jam'iyyar Republican , Jeff Flake a matsayin jakadan Amurka ga Turkiyya.

   Sanata Flake daya ne daga cikin yan Republican da dama da suka goyi bayan Joe Biden a yakin neman zama shugaban Amurka a 2020 tare da mutane irinsu Cindy McCain - matar marigayi Sanata John McCain.

   Mista Flake da Mrs McCain sun sha suka daga jam'iyyar Republican a jiharsu ta Arizona saboda nuna adawa ga mista Trump.

   A watan da ya gabata ne gwamnatin Biden ta gabatar da Mrs McCain a matsayin zabi domin samun mukamin jakadar Amurka ga hukumomin Majalaisar Dinkin Duniya kan abinci da noma.

4. 14 Yuli 2021Adadin 'yan Afrika da ke mutuwa yayin kaura zuwa Turai ya rubanya sau biyu

   

   Asalin hoton, Getty Images

   Adadin yan ci ranin da suke mutuwa a kokarin tsallaka teku don isa Turai daga Afirka ya ninka fiye da sau biyu kan abin da aka gani tun shekarar da ta gabata.

   Binciken kungiyar kula da yan ci rani IOM ya nuna karuwar mace-macen na da nasaba da rashin bincike da aikin ceto daga kasashen Turai.

   BBC ta gano cewa cikin watanni shidan farkon wannan shekarar, adadin mutanen da ke kokarin tsallakawa ya karu da kashi 58 amma yawan wadanda suka mutu ya ninka fiye da sau biyu.

   Sama da mutum dubu daya da dari ne suka mutu cikin watanni shidan farko na shekarar nan.

   Binciken ya kuma nuna cewa yayin da karin mutane ke kokarin tsallakawa zuwa Turai, wasu da dama kuma ana tilasta musu komawa kasashe irinsu Libya inda suke fuskantar cin zarafi.

5. 14 Yuli 2021Najeriya za ta karbi riga kafin korona miliyan 41 zuwa karshen Satumbar bana

   Hukumomin Najeriya sun ce suna sa ran karbar riga kafin korona miliyan 41 a kasar zuwa karshen Satumba.

   "Mun samu bayanin cewa karkashin tsarin Covax za a aiko mana da alluran cikin watannin nan masu zuwa. Allurai 3,924,000 daga Oxford/AstraZeneca?Moderna zuwa karshen Yuli ko farkon Agusta 2021," a cewar Shugaban hukumar ci gaban kiwon lafiya a matakin farko Faisal Shuaib.

   Ya kuma ce sama da alluran Pfizer da Moderna miliyan shidda za su samu daga tsarin na Covax a Agusta da allurai miliyan 29 daga Johnson and Johnson a watan Satumba.

   Kawo yanzu Najeriya ta yi wa sama da mutum miliyan uku allura tun daga watan Maris.

6. 14 Yuli 2021Budewa

   Barkanku da kasancewa da mu a wannan shafin inda za mu kawo maku labaran abubuwan da ke faruwa a Najeriya da makwatanta kamar Ghana da Nijar da da Chadi da dai sauransu.

   Da fatan za ku kasance da mu har yamma.