Shin Trump zai ƙalubalanci Biden a Kotu?

Rahoto kai-tsaye

Umar Mikail and Mustapha Musa Kaita

1. 7 Nuwamba 2020Shugaban ma'aikatan Fadar White House ya kamu da korona

   Idan daga barci kuka taso - indai ba da waya kuka farka a hannu ba - ba ku da labarin cewa Shugaban Ma'aikatan Fadar White House ya kamu da cutar korona.

   Mark Meadows ne na baya-bayan nan daga cikin na kusa-kusa da Shugab Donald Trump da ya harbu da cutar.

   Ya zuwa yanzu ba a san yadda aka yi Meadows ya kamu da cutar ba, amma ya sha fita bainar jama'a ba tare da takunkumi ba a fuskarsa.

   Cutar ta halaka fiye da mutum 230,000 a Amurka sannan a ranar Juma'a kaɗai an samu ƙarin 127,000 da suka kamu da ita, abin da ya sa jumillarsu ta kai kusan miliyan 10.

2. 7 Nuwamba 2020Trump na shan tsokana kan umarnin da ya bayar na 'A DAKATAR DA ƘIRGA ƘURI'U'

   Umarnin da Trump ya bayar na "a dakatar da ƙirga ƙuri'u" a shafinsa na Twitter wato 'STOP THE COUNT!', ya janyo mutane sun mayar da abin wasa da tsokana.

   Ƙungiyar ƙwallon ƙafa ta Southampton mai buga Premier League ta ce "a dakatar da ƙirga ƙuri'u" bayan ta tsinci kanta a saman teburin gasar da maki 16 - karon farko kenan da hakan ta faru cikin shekara 32.

   Sai dai kuma, Trump ya bayar da nasa umarnin ne bayan da ya tsinci kansa a ƙasan Joe Biden saɓanin Southampton da ta ɗare saman teburi.

   Shi kuma wannnan mai zanen barkwancin ɗan ƙasar Mexico ya nuna Trump ne a da'irar filin dambe yana cewa "a dakatar da ƙirga ƙuri'u".

   Wannan ɗalibin jami'ar kuma kira ya yi da "a dakatar da ƙirga ƙuri'u" game da yawan adadin bashin da ake bai wa ɗalibai a Amurka, wanda aka ce ya kusa kaiwa dala tiriliyan biyu.

3. 7 Nuwamba 2020Cutar korona na aikinta yayin da ake jiran sakamakon zaɓe

   Yayin da Amurkawa suka ƙagu su ji sakamkon zaɓen shugaban ƙasarsu, an kafa sabon tarihi maras daɗin ji na yawan waɗanda suke kamuwa da cutar korona kwana na uku a jere.

   A ranar Juma'a, an samu mutum 127,000 da suka harbu da cutar, a cewar alƙaluman Jami'ar Johns Hopkins.

   Wannan ya sa jumillar waɗanda suka kamun ta kai kusan miliyan 10.

   Ha yanzu Amurka ce kan gaba a yawan waɗanda suka kamu da waɗanda suka mutu, inda fiye da mutum 236,000 suka rasa rayukansu.

   An samu ƙaruwa a jihohin da ke tsakiyar ƙasar. Ana kallon jihohin North Dakota da South Dakota da Iowa da Wisconsin a matsayin cibiyar cutar a yanzu.

   Saura kaɗan Jihar Texas ta kai miliyan ɗaya na waɗanda suka kamu, inda ta shallake California - jihar da take da mafi yawa a baya.

4. 7 Nuwamba 2020Joe Biden na shirin naɗa jami'an gwamnatinsa

   Tawagar kamfe ɗin Joe Biden na jam'iyyar Democrat na ci gaba da shirye-shiryen karɓar mulki, yayin da yake ƙara samun nasara a ƙuri'un da ake ƙirgawa.

   A mako mai zuwa za a sanar da ɗaya daga cikin babban ma'aikata a Fadar White House ƙarƙashin jagorancin Biden, a cewar rahoton New York Times.

   Tuni ake ta muhawara a biranen Washington da Wilmington da Delaware (inda Biden ya fito) kan waɗanda za a naɗa a matsayin manyan jami'an gwamnatin ta Biden.

   A cewar rahoton, Biden zai naɗa jami'an gwamnati da suka fi na kowace gwamnati fitowa daga ɓangarorin al'umma daban-daban.

   Biden ya ambaci maza da mata da 'yan luwaɗi da 'yan ba-ruwammu da farare da baƙaƙe da 'yan Asiya yayin wani jawabi game da jami'an gwamnatinsa a farkon shekarar nan.

5. 7 Nuwamba 2020Ni ne zan yi nasara - Joe Biden

   Joe Biden na jam'iyyar Democrat ya ce yana da kwarin gwiwar nasara a zaben shugabancin kasar Amurka.

   A wani takaitacen jawabi da ya gabatar daga ofishin kamfe dinsa a Delaware, dan takarar bai ambato kansa a matsayin wanda ya yi nasara ba.

   Amma ya ce yanayin da sakamakon ke nunawa a jihohin da ake fafatawa yanzu haka nasara ta su ce, domin sun yi zarra da kowa zai iya nuna gamsuwa.

   Ya ce abin da ya kasance a bayyane shi ne akasarin Amurkawa daga bangarorin addinai daban-daban da launin fata sun zaɓi sauyi.

   "Fatammu shi ne hadin-kan Amurka ba haddasa rarrabuwar kawuna ba," in ji Biden.

   A jawabin nasa tare da rakiyar wadda suke takara tare Kamala Harris, Mista Biden ya bayyana cewa an sanar da shi halin da ake ciki kan annobar korona don haka zai dauki matakai a rana ta farko domin shawo kan ta.

6. 7 Nuwamba 2020Assalamu Alaikum

   Masu bibiyarmu barkanku da hantsin Asabar.

   Za mu ci gaba da kawo muku yadda take kasancewa a zaen shugaban asar Amurka da kuma sauran sassan duniya.

   Kuna tare da Umar Mikail a wannan safiya.