Covid-19: An dawo da mutum 102 Najeriya daga Masar

Rahoto kai-tsaye

Umar Mikail and Mustapha Musa Kaita

1. 12 Yuni 2020Koriya ta Arewa ta ce babu amfanin alaƙa tsakaninta da Trump

   Koriya ta Arewa ta ce ba ta ga wata fa'ida ba a ci gaba da alaƙa tsakanin shugabanta Kim Jong-un da Shugaba Donald Trump na Amurka.

   Ministan harkokin wajen Koriya ta Arewa, Ri Son-gwon, ya ce manufofin Amurka sun tabbatar cewa Amurkar ta ci gaba da zama babbar barazana ga jama'ar Koriya ta Arewa.

   Ya ce Koriya ta Arewan za ta shirya sojojinta domin tunkarar barazanar da dakarun Amurka.

   Har yanzu ba a samu wani ci gaba ba a tattaunawa game da kawo ƙarshen shirin nukiliyar Koriya ta Arewa duk da wasu taruka da aka sha yi tsakanin Mista Kim da Mista Trump.

2. 12 Yuni 2020Na gode wa 'yan jarida kan tabbatar da dimokuraɗiyya a Najeriya – Buhari

   Shugaba Muhammadu Buhari na Najeriya ya yaba wa 'yan jaridar ƙasar, inda ya siffanta su da cewa "madubin al'umma" ne a fafutikar tabbatar da dimokuraɗiyya a ƙasar.

   Buhari ya bayyana haka ne a jawabin da ya gudanar ga 'yan ƙasa na Ranar Dimokuraɗiyya a yau Juma'a, 12 ga watan Yuni.

   "Ina son na miƙa godiyata ga 'yan jarida a fafutikar tabbatar da dimokuraɗiyya tun bayan da muka samu 'yancin kai," in ji Buhari.

   Ya ci gaba da cewa: "Na sani cewa ba ku fiya samun alaƙa mai kyau ba tsakaninku da gwamnatocin da suka gabata. Sai dai a bayyane take cewa ku ne madubin al'umma na ƙwarai musamman wurin sa ido kan ayyukan gwamnati."

   Game da yaƙin da Najeriya take yi da annobar korona kuwa, Buhari ya ce annobar tana kawo wa dimokuraɗiyyar Najeriya barazana amma yana da ƙwarin gwiwar ƙasar za ta kawo ƙarshen cutar.

   "Najeriya ta tsira daga rikice-rikice iri-iri a baya. Ina da ƙwarin gwiwa Najeriya za ta tsira daga wannan ma muna masu hangen nesa cikin ikon Allah."

   Buhari ya sauya ranar 29 ga watan Mayu a matsayin Ranar Dimokuraɗiyya a Najeriya zuwa 12 ga watan Yunin kowacce shekara ne tun a shekarar 2018 kuma wannan ne karo na uku da aka yi bikin a sabuwar ranar.

3. 12 Yuni 2020Najeriya ta samu adadi mafi yawa na masu korona a rana guda

   Najeriya ta bayar da rahoton samun adadi mafi yawa na waɗanda suka kamu da cutar korona a rana ɗaya, inda mutum 681 suka harbu ranar Alhamis.

   Yawan waɗanda suka cutar jumilla yanzu ya kai 14,554, a cewar hukumar NCDC.

   Jihar Legas ce ke da rabin waɗanda suka kamu da cutar a ranar Alhamis, inda aka samu mutum 345 cikin sa'a 24.

   Jihar Rivers a wannan karon ta zo ta biyu a yawan waɗanda suka kamu - tana da mutum 51- sai Ogun mai mutum 48.

   Gombe tana da mutum 47 da suka kamu, sai Oyo mai 36, Imo 31, Delta 28, Kano 23, Bauchi 18, sai kuma Edo mai mutum 12.

   Jihar Katsina ma na da mutum 12, Kaduna 9, Anambra 7, Jigawa 5, Kebbi 4, Ondo 4, sai kuma Nasarawa mai mutum 1.

   Wannan karon ba a samu mutum ko ɗaya ba da ya kamu da cutar a Abuja, babban birnin ƙasar.

   NCDC ta ce mutum 387 ne suka mutu daga cikin 14,554 da suka kamu, sannan 4,494 sun warke.

4. 12 Yuni 2020Iraƙi ta amince Amurka ta janye sojojinta daga ƙasar

   Irai ta amince cewa Amurka ta janye dakarunta daga cikin kasar amma zuwa yanzu babu guda a cikin ƙasashen da ta bayar da lokacin yin hakan.

   Sake tabbatar da wannan manufar na zuwa ne daidai lokacin da ɓangarorin biyu suka gudanar da muhimmiyar tattaunawa a karon farko cikin fiye da shekara 10.

   Majalisar Dokokin Iraƙi ta buƙaci sojojin Amurka su bar ƙasar bayan da wani hari da Amurkar ta kai kan Bagadaza cikin watan Janairu ya halaka babban kwamandan sojojin Iran Qasim Soleimani.

   A taron, Amurka ta sake jaddada cewa ba ta da burin ci gaba da ajiye dakarunta a Iraƙi.

5. 12 Yuni 2020Assalamu Alaikum

   Umar Mikail ke muku barka da safiyar Juma'atu babbar rana, da fatan kun tashi lafiya.

   Ku biyo mu a wannan shafi domin sanin halin da duniya ke ciki a tsawon ranar yau.