Coronavirus: An kara samun mutum biyu a Kano

Rahoto kai-tsaye

Nasidi Adamu Yahaya and Awwal Ahmad Janyau

1. 13 Aprilu 2020Spain ta sassauta doka kan coronavirus

   Spaniya, daya daga cikin kasashen da suka fi fama da annobar coronavirus, ta soma sassauta dokar hana fita wadda ta kusan durkusar da tattalin arzikinta.

   An soma barin mutanen da ke aiki a ma'aikatun kere-kere da wasu ma'aikatun su koma bakin aiki, ko da yake an gindaya musu tsauraran sharuda.

   Dole ma'aikatan sauran wurare su ci gaba da zama a gidajensu.

   Kimanin mutum 17,500 ne suka mutu sanadin Covid-19 a Spaniya, amma an samu raguwar wadanda ke kamuwa da cutar.

   Italiya - kasar da ta fi fama da coronavirus a Turai, inda kusan mutum 19,900 suka mutu - za ta takaita masana'antun da za su sosa aiki ranar Talata.

2. 13 Aprilu 2020Coronavirus ta kashe fitaccen malamin Yahudawa

   Wani tsohon malamin addinin Yahudu a Isra'ila ya mutu sanadin Covid-19 - wannan shi ne karon farko da wani babban mutum ya rasu a kasar tun da ta bulla.

   Eliyahu Bakshi-Doron, mai shekara 79, shi ne shugaban addinin na al'ummar Sephardi - wato Yahudawa da jikokinsu da suka fito daga yankin Iberia, Arewacin Afirka da kuma Gabas Ta Tsakiya - daga shekarar 1993 zuwa 2003. Ya yi fice wurin wanzar da zaman lafiya tsakanin addinai daban-daban.

   Firai Ministan Isra'ila Benjamin Netanyahu ya ce Bakshi-Doron "ya kasance tamkar wata fitila ga al'ummar Yahudawa da Isra'ila da kuma duniya".

   Saboda dokar yin nesa-nesa da juna, 'yan sanda sun bukaci masu makoki kada su halarci jana'izarsa wadda za a yi a Bakshi-Doron, wadda a al'adance dandazon jama'a ke halarta.

3. 13 Aprilu 2020An hana musabaha da taron jama'a a Ethiopia

   Yau ce ranar farko da aka koma bakin aiki a Habasha, wato Ethiopia bayan dokar hana fita da sanya a karshen mako domin dakile yaduwar coronavirus.

   Ba a sani ba ko dokar ta yi wani tasiri.

   Tuni dai aka haramta tarukan jama'a sannan aka rufe makarantu a matakin farko da aka dauka na hana yaduwar Covid-19, cutar da ke sarke numfashi.

   A makon jiya aka sanya dokar ta-baci ko da yake sai a karshen mako aka bayar da cikakken bayani kanta.

   • Dokar ta haramta tarukan fiye da mutum hudu sai dai idan da matukar bukatar yin hakan, kuma dole a nemi izinin daga wurin hukuma. An hana yin musabaha.
   • Dole mutane su rika sanya abin rufe hanci da baki a bainar jama'a
   • Dole motocin haya su sanya kujerunsu nesa-nesa ta yadda mutane ba za su matsi juna ba, kuma ba a yarda fiye da mutum uku su zauna teburi guda ba a otal-otal da gidajen sayar da abinci.
   • Ba zai yiwuw masu gidajen haya su kori 'yan haya ba ko kuma su kara kudin haya.

   • An haramta wa wuraren aiki korar ma'aikatansu don kawai ba sa samun riba.

   Duk mutumin da ya karya dokar hana fita zai iya shan daurin shekara uku a gidan yarin, a cewar dokar.

4. 13 Aprilu 2020An yi feshin magani a wuraren da mai coronavirus ya ziyarta a Kano

   Gwamnatin jihar Kano da ke Najeriya ta yi feshin magani a wurare biyar da mutumim da aka tabbatar yana dauke da coronavirus ya kai ziyara kafin a gano yana dauke da cutar.

   Kwamishinan Muhalli na jihar, Dr Kabiru Ibrahim Getso ne ya jagoranci ma'aikatansa wurin yin feshin.

   An yi feshin ne a Masallacin Juma'a na Da’awah da Masallacin Juma'a na Dan Adalan Kano da cibiyar gwajin cututtuka ta Providian Diagonistic da ta FAN Diagonistic, da asibitin Prime Specialist da kuma gidan mutumin.

   An kulle dukkan wuraren kuma gwamnati za ta ci gaba da yi musu feshi, a cewar kwamishinan.

   A ranar Asabar ne hukumomi suka sanar da manema labarai cewar wani mutum ya kasance na farko wanda ya kamu da cutar a jihar.

   Bayanan da hukumomi suka fitar sun nuna cewa mutumin, wanda yake zaune a karamar hukumar Tarauni, ya baro Abuja inda ya isa Kano a jajiberen ranar da za a rufe hanyoyin shiga jihar.

5. 13 Aprilu 2020Covid-19: Za a yi asarar giya kimanin kwalaba miliyan biyar a Ingila

   Gidajen giya, kamar sauran wurare, sun rufe sai yadda hali ya yi a fadin duniya saboda annobar coronavirus.

   Amma me zai faru da giyar da aka riga aka sarrafa kafin kasashen duniya su sanar da matakin ba-shiga-ba-fita?

   Wani kiyasi ya nuna cewa akwai kimanin giya kwalaba miliyan hamsin da ke jibge a gidajen sayar da barasa a Ingila wadanda ke jira ko dai a zubar da su ko kuma a kwankwade su.

   Hanya daya da za a kauce wa asarsu ita ce idan mashaya suka rika yin odar giya ta hanyar intanet inda za a kai musu ita har gida.

   Shugaban kungiyar da ke rajin kare masu sayen abubuwan bukatu ta Campaign for Real Ale (Camra) ta Ingila, Tom Stainer, ya ce "Abin takaici ne yadda giyar za ta lalace bayan an yi amfani da hikima wajen dafa ta.Mutane ba za su sha ta ba don haka tamkar an yi asarar wannan hikima ne"

6. 13 Aprilu 2020Alamun Coronavirus: Abubuwan da suka kamata ku dinga yi

7. 13 Aprilu 2020Coronavirus ta kama mutum kusan miliyan biyu

   Jami'ar Johns Hopkins ta Amurka da ke bin diddigin yaduwar annobar coronavirus, ta ce mutum 1, 851,531 sun kamu da cutar a fadin duniya ya zuwa safiyar ranar Litinin 13 ga watan Afrilu, 2020.

   Jami’ar ta kara da cewa mutum 114, 269 sun mutu sanadin cutar ta covid-19.

   Sai dai ta ce mutum fiye da 434, 000 sun warke daga cutar.

   Ga kasashe goma da suka fi fama da cutar ya zuwa safiyar Litinin:

   Amurka- 557, 590

   Spaniya – 166, 831

   Italiya -156, 363

   Faransa – 133, 670

   Jamus – 127, 854

   Birtaniya – 85, 208

   China - 83, 135

   Iran – 71, 686

   Turkiyya – 56, 956

   Belgium – 29, 647

8. 13 Aprilu 2020

   Bayani kan maƙala

   • • Marubuci, Nasidi Adamu Yahya
     • Sanya sunan wanda ya rubuta labari, BBC Hausa, Abuja

   Nasidi Adamu Yahaya ne yake yi muku barka da warhaka.

   Muna fatan ku kasance tare da mu tsawon wannan rana domin sanar da ku halin da duniya take ciki.

   Za mu kawo muku labarai da rahotannin da suka shafi rayuwarku, musamman kan abubuwan da ke faruwa a Najeriya da Nijar da makwabtansu, har ma da sassan duniya.

   Za ku san halin da ake ciki game da annobar coronavirus, wacce ta buwayi duniya.

   Kafin nan, muna kira a gare ku da ku ci gaba da bin shawarwarin manasa lafiya, kamar yawaita wankke hannunwanku da ba da tazara tsakanin juna da kuma kaurace wa shiga taron jama’a, da sauransu.