Coronavirus: Jikin Firai Ministan Birtaniya ya 'tsananta'

Rahoto kai-tsaye

Nasidi Adamu Yahaya, Awwal Ahmad Janyau and Halima Umar Saleh

1. 6 Aprilu 2020Covid-19: Ghana ta yafe wa mutane kudin ruwa na wata uku

   Gwamnatin Ghana ta ce ba za ta karbi kudin ruwan famfo daga 'yan kasar ba tsawon wata uku domin ta rage musu radadin da suke ciki sakamakon hana su fita daga gidajensu saboda covid-19.

   Shugaba Nana Akufo-Addo ne ya bayyana haka ranar Lahadi a jawabin da ya yi wa 'yan kasar ta gidajen talbijin.

   Ya ce gwamnati za ta tabbatar 'yan kasar sun rika samun ruwan sha da na amfanin gida akai-akai.

   Wasu yankunan kasar ta Ghana na fama da karancin ruwan famfo a daidai lokacin da hukumomin lafiya suka bukaci mutane su yawaita wanke hannayensu da yin tsafta a mataki na hana yaduwar coronavirus.

   

   Asalin hoton, Getty Images

2. 6 Aprilu 2020Coronavirus: Mutanen da ke mutuwa sun ragu a Spaniya

   Adadin mutanen da ke mutuwa sakamakon coronavirus a kullum ya ragu a rana ta hudu a jere a kasar Spaniya.

   Gwamnatin kasar ta sanar ranar Litinin cewa karin mutum 637 ne suka mutu, idan aka kwatanta da mutum 674 da suka mutu ranar Lahadi.

   Wannan shi ne karo na farko da ba a samu mutuwa mai yawa ba tun ranar 24 ga watan Maris.

   Ranar Alhamis aka samu ma fi yawan mutanen da suka mutu inda suka kai 950 a kwana guda.

   Alkaluman baya bayan nan sun nuna cewa an samu karin mutum 4,273 da suka kamu da cutar a Spaniya.

3. 6 Aprilu 2020Alamun Coronavirus: Abubuwan da suka kamata ku dinga yi

   

   

   

4. 6 Aprilu 2020Amurka za ta bai wa Indiya dala miliyan 3 don yaki da coronavirus

   Gwamnatin Amurka ta sanar da bayar da tallafin kusan dala miliyan uku ga Indiya domin taimaka wa kasar wajen yaki da annobar Covid-19.

   Jakadan Amurka a Indiya Kenneth Juster, ya ce Cibiyar yaki da cututtuka masu yaduwa da USAID da sauran hukumomi za su yi aiki na kut da kut da Indiya domin dakile annobar.

   A wata sanarwa Juster ya ce, ''Covid-19 wani bala'i ne na lafiya da za a iya shawo kansa ta wajen hada kai tsakanin gwamnatoci da sauran hukumomin kasa da kasa kawai.''

   Za a yi amfani da kudaden wajen taimaka wa ayyukan USAID da na WHO a Indiya, da suka hada da karfafa bangaren lafiyar kasar.

5. 6 Aprilu 2020Covid-19: An soma koyar da dalibai ta rediyo a Kano

   Abokin aikinmu a Kano, Khalifa Shehu Dokaji, ya aiko mana da wadannan hotuna na wasu dalibai mata da ke shekarar karshe a makarantar sakandare a yayin shirin koyar da turanci, lissafi, Geography, Biology, physics, da chemistry ranar Litinin.

   A karshen makon jiya ne gwamnatocin Kaduna da Kano suka ce za su soma koyar da karatu ta hanyar rediyo da talbijin ga daliban da ke gida saboda 'hutun coronavirus'.

   

   

6. 6 Aprilu 2020Damisa ta kamu da Coronavirus

   Gwajin da aka yi kan wata damisa 'yar shekara hudu a gidan namun dajin Bronx Zoo da ke Amurka ya nuna cewa ta kamu da coronavirus.

   An yi amannar cewa damisar, wacce ake kira Nadia, ita ce dabba ta farko da ta kamu da Covid-19 a Amurka.

   Mahukuntan gidan namun dai na Bronx Zoo, wanda ke birnin New York City, dakin gwaji na kasa na gandun dabbobi da ke Iowa ne ya tabbatar da cewa damisar na auke da cutar.

   An yi amannar cewa wani ma'akacin gidan namun daji ne ya shafa wa Nadia da wasu dabbobi dangin damisa su shida, coronavirus.

   Dabbobin sun soma nuna alamun kamuwa da coronavirus, ciki har da yin tari mara majina, a watan jiya bayan sun yi mu'amala da mutumin, wanda ba a bayyana sunansa ba.

   

   Asalin hoton, CORBIS VIA GETTY IMAGES

7. 6 Aprilu 2020Coronavirus: ‘Yan sandan Najeriya sun kama ‘yar fim saboda ta tara jama’a

   ‘Yan sanda a birnin Lagos da ke Najeriya sun kama fitacciyar 'yar fim din nan Funke Akindele saboda ta hada bikin murnar zagayowar ranar haihuwar mijinta, JJC Skillz, inda aka yi tara jama'a.

   Taron da ta hada ya karya dokar hana fita da gwanatin Najeriya ta sanya a jihohin Lagos da Ogun da kuma babban birnin tarayyar kasar, Abuja, a cewar kakakin rundunar 'yan sandan jihar Lagos, Mr Bala Elkana.

   Mr Elkana ya bukaci mutanen da suke je gidanta domin taya ta bikin su mika kansu ga rundunar 'yan sanda zuwa ranar Litinin idan ba haka ba a ayyana su a matsayin wadanda ake nema ruwa-a-jallo.

   Da ma dai ranar Lahadi masu bibiyar shafukan sada zumunta musamman shafin Twitter a Najeriya, sun caccaki tauraruwar fina-finan kudancin Najeriyar bisa karya dokar hana fitar.

   Funke Akindele na cikin wadanda suka dinga wayar da kai a kan coronavirus a cikin wani bidiyo da hukumar NCDC mai yaki da cutuka masu yaduwa ta shirya.

   Sai dai tauraruwar ta ce baki dayan mahalarta bikin sun shafe sati biyu a gidan nata kafin shagalin.

   Amma fa tuni ta goge sakon na Twitter da ta wallafa.

   Cikin wadanda suka halarci bikin har da fitaccen mawakin nan Naira Marley da tauraruwa Eniola Badmus.

   

   Asalin hoton, Funke Akindele

8. 6 Aprilu 2020Kayayyakin da China ta bai wa Najeriya ba sa dauke da coronavirus - NCDC

   Hukumar yaki da cututtuka masu yaduwa ta Najeriya, NCDC, ta musanta ikirarin da wasu suke yi cewa kayayyakin gwajin covid-19 da China ta bai wa kasar suna dauke da coronavirus.

   A sakon da ta wallafa a shafin Twitter, NCDC, ta ce babu wata shaida da ke nuna cewa kayan na dauke da Covid-19 tana mai karawa cewa jami'an lafiya sun yi amfani da kayan kuma basu ga wata illa ba.

   A makon jiya, ministan watsa labaran kasar ya yi watsi da ikirarin da wasu ke yi cewa kayan gwajin cutar coornavirus da attajirin nan dan China Jack Ma ya bai wa Najeriya suna dauke da coronavirus.

   Ranar Lahadi an samu karin mutum takwas da suka kamu da coronavirus inda yanzu jumulla kasar ke da mutum 232 da ke dauke da cutar.

   NCDC ta ce an sallami mutum 33 daga asibiti bayan sun warke, yayin da mutum biyar suka mutu.

   

   Asalin hoton, Reuters

   Kauce wa X

   Ya kamata a bar bayanan X?

   Wannan labari ne na dauke da bayanai da X suka bayar. Muna neman amincewarku kafin mu dora muka, saboda nuna iya dauke da wasu bayanai da aka iya adanawa. Watakila kana za ka so ka karanta X da tsarin bayanan da za a adana da da tsarin sirri kafin ka amince. Idan kana son ganin wannan bayani ka zabi ‘amince sannan ka ci gaba’.

   Accept and continue

   Gargadi: BBC ba za ta dauki alhakin bayanan da aka wallafa a shafukan da ba nata ne ba.

   Karshen labarin da aka sa a X

9. 6 Aprilu 2020Coronavirus: An kama ango da amarya saboda karya doka

   ‘Yan sanda a Afirka ta Kudu sun kama ango da amaryarsa da malamin coci da kuma baki 40 da suka karya dokar hana fita da hukumomi suka sanya don dakile coronavirus inda suka halarci daurin aure a lardin KwaZulu Natal.

   Wani bidiyo da kafar yada labarai ta Afirka ta Kudu eNCA ta wallafa ya nuna amaryar a cikin motar ‘yan sanda sanye da tufafin daurin aurenta.

   An kai dukkan mutanen caji ofis na ‘yan sanda da ke kusa da Richards Bay. Ranar Litinin za a tuhume su da laifn karya doka.

   Afirka ta Kudu, wacce ta tabbatar mutum 1,655 sun kamu da coronavirus, ta ce mutum 11 suka mutu sakamakon kamuwa da cutar, ko da yake tana daga cikin kasashen duniya da suka fi tsaurara dokar hana fita.

   Kauce wa YouTube

   Ya kamata a bar bayanan Google YouTube?

   Wannan labari ne na dauke da bayanai da Google YouTube suka bayar. Muna neman amincewarku kafin mu dora muka, saboda nuna iya dauke da wasu bayanai da aka iya adanawa. Watakila kana za ka so ka karanta Google YouTube da tsarin bayanan da za a adana da da tsarin sirri kafin ka amince. Idan kana son ganin wannan bayani ka zabi ‘amince sannan ka ci gaba’.

   Accept and continue

   Gargadi: BBC ba za ta dauki alhakin bayanan da aka wallafa a shafukan da ba nata ne ba. Ana yi samun tallace-tallace YouTube

   Karshen labarin da aka sa a YouTube

10. 6 Aprilu 2020Mutum sama da 260, 000 sun warke daga coronavirus

    Alkaluma kan yaduwar coronavirus sun nuna cewa zuwa ranar Litinin da safe, mutum sama da 264,000 ne suka warke daga cutar a fadin duniya.

    Bayanai daga Jami'ar Johns Hopkins ta Amurka, wacce ke bin diddigin yaduwar cutar, sun nuna cewa mutum fiye da miliyan daya da dubu dari biyu ne suka kamu da coronavirus.

    A cewar Jami'ar, kusan mutum 70,000 sun mutu ya zuwa safiyar ranar ta Litinin, 6 ga watan Afrilu, 2020.

    Kasashe goman da suka fi fama da annobar su ne:

    Amurka- 337, 638

    Spaniya – 131, 646

    Italiya – 128, 948

    Jamus - 100, 123

    Faransa - 93, 780

    China - 82, 641

    Iran - 58,226

    Birtaniya - 48, 440

    Turkiyya - 27, 069

    Switzerland – 21, 100

11. 6 Aprilu 2020Barkanmu da warhaka

    Bayani kan maƙala

    • • 
      • Marubuci, Nasidi Adamu Yahya
      • Sanya sunan wanda ya rubuta labari, BBC Hausa, Abuja

    Nasidi Adamu Yahaya ne yake yi muku barka da wannan safiya. Da fatan za ku iya kasance tare da mu domin sanin halin da duniya ke ciki dangane da coronavirus, cutar da ta addabi kasashen duniya.

    Baya ga lamarin wannan cuta, za kuma mu kawo muku sauran labarai da rahotannin da suka shafi rayuwarku, musamman daga kasashen Najeriya da Nijar da ma sassan duniya.

    Kuna iya tafka muhawara da bayyana ra’ayoyinku a shafukanmu na sada zumunta a BBC Hausa.