Yadda ake gudanar da muhawara tsakanin 'yan takara biyar da ke neman kujerar gwamnan jihar Gombe.
Nasidi Adamu Yahya and Mustapha Kaita
Dan takarar APC Inuwa Yahaya ya ce tsaro da bunkasa ilimi da magance matsalar yawan mace macen mata da yara kanana da bunkasa harkar noma ne zai sa gaba. Ya ce Gombe ta koma baya a fannin ilimi, yana mai cewa wasu alkaluma sun nuna koma bayan ya nuna kashi uku bisa hudu na 'yan jihar na fama da wannan matsala. A cewarsa, zai bunkasa ilimi a matakin farko.
Dan takarar PDP Bayero Usman Nafada ne ya fara gabatar da kansa. Ya ce tsaro da zaman lafiya da ruwan sha da kiwon lafiya da habaka masana’antu ne zai sa gaba.
Ya ce zai inganta rayuwar malamai, zai yi kokarin ganin iyaye sun tura yaya makaranta, zai bunkasa ilimi malaman sakamdare da jamioi da sauran makarantu na gaba da sakandare, ya ce burinsa Gombe ta zama ta daya a fannin ilimi.
Daya daga cikin masu lalurar nakasa ke nan da suka hallarci wajen wannan muhawarar.
Ibrahim Isa dai zai jagoranci muhawarar yana jaddada gargadi ga mutanen da suka halarci zauren muhawarar za su bada hadin kai ga ka'idoji da sharudda da aka shata a zauren muhawarar da suka hada da kai kawo tsakanin mutane domin daukar hotuna da bidiyo ko kuma kokarin gaisawa da yan takara. Ko kuma daukar tsarabar da aka tanadar a kan ko wace kujera fiye da daya.
'Yan takara hudu da za su fafata a wurin muhawarar da BBC Hausa ta shirya a gombe sun isa inda za a yi muhawarar. Suna jira a soma tafka muhawa da misalin karfe goma na safe a agogon Najeriya da Nijar.
Zauren da za a gudanar da muhawara a Gombe ya fara cika domin kuwa mutane suna ta tururuwar shigowa zauren domin gane ma idonsu yadda wannan muhawarar za ta kaya.
An haifi Wali Ahmed ne a Kumo dake karamar hukumar Dukku dake jihar Gombe. Ya yi difiloma a Management Studies, sai kuma digiri a fannin akanta (accountant) da kuma digiri na biyu a fannin karatun addinin Islama.
Yayi aiki a matsayin magatakarda na babbar kotu dake Bauchi.
Yayi retire a matsayin mataimakin shugaban hukumar hana shige da fice ta Najeriya. Yayi takarar gwamna a 2015 a karkashin jam’iyyar APGA. Hakazalika shine mawallafin mujallar Karatu wace aka fi sani da Karatu magazine. Wali Ahmed na daya daga cikin ‘yan kungiyar bada agaji ta Red Cross da kuma kungiyar Zabi Sonka ta RTK.
An haifi Inuwa Yahaya a Jekadafari a jihar Gombe a ranar 9 ga watan Octoba 1961. Ya karanta fannin akanta a jami’ar Ahmadu Bello dake Zaria inda ya gama a 1983. Yahaya ya yi kwasakwasai da dama domin sanin makamar aiki a Najeriya da ma wasu kasashen ketare. Ya fara aikinsa a matsayin akanta a ma’aikatar state investment and property development dake Bauchi, sai daga baya ya koma kamfanin Nasara motors inda ya zama manajan gudanarwa da hada-hadar kudade. Inuwa ya shiga siyasa ne a 2003 a lokacin mulkin Danjuma Goje. Ya zama kwamishinan kudi da ci gaban tattalin arziki a lokacin mulkin Goje. Inuwa dai ya shafe fiye da shekaru bakwai a matsayin comissioner.
An haifi Barrister Abdul-ghaniyu Bello na jam’iyyar PRP a gombe a kuma ranar 16 ga watan Satumba 1995.
Yayi makarantar firamare a central primary school dake Gombe, sai kuma sakandare a GSS Kazaure sai kuma ya garzaya Jami’ar Ahmadu Bello dake Zaria. Yayi aiki a matsayin Alkali a kotun Magistare, sa’annan yayi aiki a matsayin lauyan gwamnati mai shigar da kara a tsohuwar jihar Bauchi bayan nan ne ya zama lauyan kamfanin hako ma’adinai na NIOMCO, dake Itakpe.
Yayi ritaya da kansa a 2007. Ya dai taba zama shugaban kungiyar lauyoyi musulmai ta Najeriya. Yanzu haka dai Abdul-ghaniyu lauya ne mai zaman kansa kuma dan siyasa.
An haifi Usman Bayero Nafada a 2 ga watan Junairu 1961 a jihar Gombe.
Yayi karatun firamari a Nafada Central Primary School dake Nafada, sai kuma makaranatar horar da malamai ta gwamnati a Gombe.
Ya hallarci jami'ar Maiduguri inda ya samu digiri a fannin akanta (accountant.)
An zabi Nafada a matsayin dan majalisar jiha mai wakiltar Dukku/Nafada daga 1999-2003 a karkashin jam'iyyar ANPP.
A 2007, Nafada ya zama mataimakin kakakin majalisar wakilai ta tarayya.
Haka dai a 2015 ne ya zama dan majalisar dattijai mai wakiltar Gombe ta Arewa.
Asalin hoton, Bangies Kabasha
Gombe jiha ce da ke arewa maso gabashin Najeriya, haka kuma babban birnin jihar shi ne Gombe. Gombe dai jiha ce da ke cikin jihohi 36 na kasar.
An kirkiri Gombe ne a lokacin mulkin soji na General Sani Abacha inda aka cire garin daga jihar Bauchi a 1996.
Gombe tana da iyaka da jihohin Borno, Yobe, Taraba, Adamawa da kuma Bauchi.
A 2006, an kidaya yawan mutanen jihar da yawan su ya kai 2,365,000.
Gombe dai jiha ce da ke da kabilu daban-daban amma kabilar Fulani sune mafi rinjaye, musamman a arewacin jihar.
Akwai 'yan kabilar Tangale wadanda sune suka mamaye kudancin jihar, sai kuma sauran kabilun da ke cikin jihar sun hada da Hausa, Tera. Waja, Bolewa da kuma Kanuri.
Kabilar Tera a jihar na daga cikin Kabila mai yawan jama'a idan aka cire Fulani da Hausa, domin kuwa kabilar Tera ne suka mamaye karamar hukumar Deba.
Gombe dai tana da kananan hukumomi 11 da suka hada da Akko, Balanga, Billiri, Dukku, Funakaye, Gombe, Kaltungo, Kwami, Nafada, Shongom, Yamaltu/Deba.
A yanzu haka dai, gwamnan jihar shine Ibrahim Hassan Dankwambo.
Gombe tana da 'yan majalisar jiha 24 sai na tarayya 6, sai kuma 'yan majalisar dattawa 3.
Gwamnonin jihar Gombe a baya sun hada da
Group Captain Joseph Orji1996-1998
Mohammed Bawa1998-1999
Abubakar Habu Hashidu1999-2003
Mohammed Danjuma Goje 2003-2011
Masu bibiyar wannan shafi, Nasidi Adamu Yahaya da Mustapha Kaita ne ke yi muku barka da wannan safiya. Da fatan za ku kasance tare da mu domin samun labarai da rahotanni da hotuna da bidiyo kan muhawarar da 'yan takarar gwamnan jihar Gombe ke fafatawa, wacce BBC Hausa ke gabatarwa kai-tsaye.
