Abubuwan da ke faruwa a Najeriya da sauran sassan duniya

Rahoto kai-tsaye

Daga Usman Minjibir da Aisha Babangida

1. 3 Yuli 2025Jirgin ruwa ɗauke da fasinjoji 65 ya nutse a Indonesia

   

   Asalin hoton, Bali Search and Rescue

   Wani jirgin ruwa ɗauke da fasinjoji sittin da biyar ya nutse a kusa da tsibirin Bali na kasar Indonesiya.

   Aƙalla mutane ashirin da uku ne aka ceto yayin da aka gano gawarwakin mutum hudu.

   Jirgin na hanyar zuwa Bali ne daga Ketapang a Gabashin Java lokacin da ya nutse.

   Jami'an tawagar aikin ceto sun bayyana cewa jirgin ya fuskanci matsalar inji gabannin nutsewarsa.

   Rashin kyakyawan yanayi dai na kawo cikas a aikin ceton da ake gudanarwa

2. 3 Yuli 2025'Abin da ya sa muka zaɓi ADC a matsayin jam'iyyar haɗaka'

   

   Asalin hoton, X/Nasir El-Rufa'i

   A ranar Laraba ne manyan ƴan adawar siyasa na Najeriya suka tabbatar da amincewa da jam'iyyar African Democratic Congress (ADC) a matsayin wadda za su yi aiki da ita domin tunkarar zaɓen 2027.

   Tsohon gwamnan jihar Kaduna, Nasir El-Rufa'i, wanda jigo ne a haɗakar ya ce: "mun kwashe wata tara zuwa shekara ɗaya muna tattaunawa domin ganin yadda za mu haɗa kanmu mu shiga jam'iyya ɗaya da ba za a iya soke rajistarta ba, mu gyara jam'iyyar da shugabancinta da aƙidarta da fito da tsarin da zai ceci ƙasarmu daga wannan hali da aka shiga."

   Hakan na zuwa ne bayan yunƙuri daban-daban da ƴan adawar suka yi na ganin sun samar da ƙwaƙƙwarar adawa da za su iya tunkarar shugaban ƙasar mai ci Bola Ahmed Tinubu, wanda suke zargi da gazawa a mulkinsa.

   Karanta cikakken labarin - https://bbc.com.im/hausa/articles/cwye0l03k4zo%3C/a%3E%3C/p%3E%3C/div%3E%3C/div%3E%3C/article%3E%3C/li%3E%3Cli class="css-xxlek1">

   3 Yuli 2025'Harin da Amurka ta kai Iran ya dagula shirin nukiliyarta na shekara biyu'

   

   Asalin hoton, Reuters

   Ma'aikatar tsaron Amurka ta ce bayannan leken asirinta ya nuna cewa harin bam da ƙasar ta kai wa Iran a watan da ya gabata ya janyowa shirin nukiliyar ƙasar koma baya na shekara biyu.

   Kakakin ma'aikatar Pentagon Sean Parnell ne ya gabatar da waɗannan bayanan.

   Shugaba Trump ya dage kan cewa hare-haren da Amurka ta kai sun lalata cibiyoyin nukiliyar Iran baki ɗaya.

   A wani ɓangare kuma, ma'aikatar harkokin wajen Amurka ta soki Iran kan matakin da ta ɗauka na dakatar da hadin gwiwa da hukumar kula da makamashin nukiliya ta Majalisar Dinkin Duniya a hukumance, inda ta bayyana hakan a matsayin matakin da bai dace ba.

3. 3 Yuli 2025Assalamu Alaikum

   Barkanmu da sake saduwa a shafin labarai kai-tsaye na BBC Hausa a hantsin Alhamis.

   Shafin na yau zai fi mayar da hankali ne kan abubuwan da ke faruwa a Najeriya da maƙwabtanta, da kuma sauran sassa na duniya.

   Za ku iya leƙawa shafukan sada zumuntanmu na intanet, da facebook da X da kuma whatsapp domin karanta sauran labarai da kallon bidiyo.

   Ku kasance da mu.