Abubuwan da ke faruwa a Najeriya da sauran sassan duniya

Rahoto kai-tsaye

Haruna Kakangi, Ahmad Bawage da A'isha Bappa

1. 10 Disamba 2024Rufewa

   A nan muka kawo ƙarshen wannan shafi da muke kawo muku labarai kai-tsaye. Da fata kun ji daɗin kasancewa da mu.

   A madadin sauran abokan aiki, ni Isiyaku Muhammed nake cewa mu kwana lafiya.

2. 10 Disamba 2024Kotu ta tura Yahaya Bello gidan yari

   

   Asalin hoton, Economic and Financial Crimes Commission

   Kotun tarayya da ke zamanta a Maitama ta ƙi amincewa da belin da tsohon gwamnan jihar Kogi, Yahaya Bello ya nema, inda ta bayar da umarnin a ajiye shi a gidan yarin Kuje.

   Mai shari'a Maryann Anineh ta ce an yi gaggawar neman belin.

   Yahaya Bello da wasu masu suna Abdulsalami Hudu da Umar Oricha ne suke fuskantar tuhuma kan zargin almundahanar kuɗi naira biliyan 110.4.

   Hukumar EFCC ce ta yi ƙarar Yahaya Bello da sauran mutanen kan tuhume-tuhume 16 da suka haɗa cin amana da almundahana.

   Sai dai kotun ta bayar da belin sauran waɗanda ake zargi tare da shi.

3. 10 Disamba 2024Wasu jihohi ba za su iya biyan albashin 70,000 ba idan aka tabbatar da ƙudurorin haraji - Gwamnan Zamfara

   

   Asalin hoton, Dauda Lawal/Instagram

   Gwamnan jihar Zamfara Dauda Lawal ya ce wasu jihohin da ba su da ƙarfin tattalin arziki za su shiga tasku idan aka amince da ƙudurorin haraji da shugaban ƙasa Bola Tinubu ya aika majalisa.

   "Don haka dole a nazarci ƙudurorin cikin tsanaki saboda kar mu cuci kanmu," in ji shi a tattaunawarsa da tashar Channels a ranar Talata.

   Ya ƙara da cewa, "a cikin ƙudurorin akwai abubuwa masu kyau, akwai kuma marasa kyau, wannan ya sa muke ƙara nazartar abubuwan da ke ciki domin ba mutanenmu shawara kan abin da ya kamata."

   Lawal ya ƙara da cewa jihohi da dama ba za su iya biyan albashin naira 70,000 matuƙar an tabbatar da gyare-gyaren da ke cikin ƙudurorin.

   "Gyare-gyare na da kyau, amma yana da kyau mu guji gaggawa domin gudun yin da-na-sani daga bisani."

4. 10 Disamba 2024Tinubu ya naɗa Ogunjimi akanta-janar na riƙo

   

   Asalin hoton, Bayo Onanuga

   Shugaban ƙasa Bola Tinubu ya naɗa Shamseldeen Babatunde Ogunjimi akanta-janar na riƙo.

   Naɗin ya biyo bayan tafiya hutun ritaya da Oluwatoyin Sakirat Madein ta yi, kamar yadda tsarin aiki ya tanada.

   Ogunjimi ne babban darakta a ofishin na akanta-janar ɗin na ƙasa, kuma ya kwashe sama da shekara 30 yana aiki a matakai daban-daban na harkokin kuɗi a kamfanoni da gwamnati, kamar yadda sanarwar da Bayo Onanuga ya fitar.

   Sanarwar ta ƙara da cewa Tinubu ya ce, "ofishin akanta-janar na da matuƙar muhimmanci, kuma Ogunjimi yana da ƙwarewae da ake buƙata domin tabbatar da aikin ofishin ya tafi daidai domin tabbatar da nasarar ƙoƙarinmu inganta tattalin arzikin ƙasar."

   Tinubu ya kuma yaba wa Madein, wadda za ta yi ritaya daga muƙamin daga ranar 7 ga Maris na shekarar 2025.

5. 10 Disamba 2024An yi wa shugaban Chadi ƙarin girman soji zuwa Field Marshal

   

   Asalin hoton, Reuters

   Majalisar ƙasar Chadi ta ɗaga darajar shugaban ƙasar, Janar Mahamat Deby zuwa muƙamin Field Marshal, wanda shi ne muƙami mafi girma a rundunar sojin ƙasar.

   Ƴanmajalisar sun ɗauki wannan matakin ne bayan kaɗa ƙuri'a a ranar Litinin, inda suka ce, "an ɗaga muƙaminsa saboda sadaukawarsa ga ƙasar da ma rundunar soji, da kuma nasarorin da sojoji ke samu a ciki da wajen ƙasar."

   Ƴanmajalisa 160 ne suka kaɗa ƙuri'ar amincewa, biyu suka ƙi amincewa, sannan shida ba su halarci zaman ba.

   An daga muƙamin Mahamat Deby ne a bayan ya ƙaddamar da yaƙi da Boko Haram a yankin tafkin Chadi, bayan wani hari da suka kai ga sojojin ƙasar.

   An ruwaito cewa shi ne ya jagoranci sojoji zuwa fatattakar ƴan Boko Haram, wanda aka yi mako biyu ana gwabzawa.

   Ya karɓi mulki ne daga mahaifinsa Idris Deby Itno, wanda shi ma ya samu muƙamin a shekarar 2020 yana mai shekara 68.

   A watan Mayu ne aka zaɓi Mahamat a matsayin shugaban ƙasar Chadi, inda ake tunanin zai bi tafarkin mahaifinsa wajen yin mulki ba sani ba sabo.

6. 10 Disamba 2024Gwamnatin Najeriya za ta ɗauki mataki kan jiragen da ke jinkirin mayar da kuɗin tikitin fasinjoji

   Hukumar kula da zirga-zirgar jiragen sama ta Najeriya NCAA, ta bayyana aniyarta ta sanya takunkumi ga kamfanonin jiragen sama da ke jinkirta dawo da kuɗin tikitin ga fasinjoji, bayan jinkiri ko soke tashin jirgin sama.

   Wannan dai wani ɓangare ne na tsare-tsare na Hukumar NCAA, wanda ke ba da fifikon haƙƙin fasinjoji.

   Hukumar ta NCAA ta gabatar da dokar ce sakamakon abin da ya faru da wani fasinja da kamfanin jirgin sama na Airpeace.

7. 10 Disamba 2024Da gaske APC ce ke haɗa rikice-rikice a jam'iyyun adawar Najeriya?

   

   Duk da cewa akwai sauran lokaci kafin babban zaɓen Najeriya a shekarar 2027, ana ci gaba da musayar yawu kan shirye-shiryen jam'iyyu na fuskantar zaɓen mai zuwa.

   Jam'iyyun hamayya na zargin APC mai mulki a ƙasar da yunƙurin haifar da rikice-rikice a cikinsu domin hana su sukunin da za su iya fuskantarta da ƙarfi har su ƙwace mulki, lamarin da jam'iyyar mai mulki ta sha musantawa.

   A shekarar 2023 ne dai Shugaban Ƙasa Bola Tinubu ya yi nasarar doke Atiku Abubakar na jam'iyyar PDP a zaɓen shugaban ƙasa, inda aka samu wasu gwamnonin PDP da ake zargin sun yi wa APC aiki.

   Ƙarin bayani - https://bbc.com.im/hausa/articles/cwy3e7991e6o%3C/a%3E%3C/p%3E%3C/div%3E%3C/div%3E%3C/article%3E%3C/li%3E%3Cli class="css-xxlek1">

   10 Disamba 2024Ƴansanda sun kama jabun kuɗaɗen da suka kai naira biliyan 129 a Kano

   

   Asalin hoton, Nigeria Police Force

   Rundunar ƴansandan Najeriya ta sanar da ƙwato jabun kuɗaɗen ƙasashen waje da darajarsu ta kai naira biliyan 129,542,823.000.

   A wata sanarwa wadda kakakin rundunar ACP Olumuyiwa Adejobi ya sanya wa hannu, ya ce wannan na cikin nasarorin da rundunar ke samu a ƙarƙashin jagorancin babban sufeto janar na ƴansandan Najeriya, Kayode Adeolu Egbetokun.

   Sanarwar ta ce, "A Kano, ƴansanda sun kama jabun dala 3,366,000 da jabun CFA 51,970 da kuma jabun naira 1,443,000 da katin cire kuɗi na bankuna daba-daban a ranar 8 ga watan Disamban 2024 a ƙaramar hukumar Gwale ta jihar Kano."

   Ƴansandan sun ce an kama wani mai suna Nura Ibrahim, wanda aka kama da jabun kuɗi naira 392,000 da dala 7800, sannan daga bisani aka kama abokan aika-aikarsa masu suna Muhammed Muntari da Usman Abdullahi tare da ƙwato wasu kuɗaɗen na ƙasashen waje.

   A wani gefen kuma, rundunar ta samu nasarar kama wasu mutum 3 da ake zargi da safarar makamai masu suna Buhari Suleiman da Jamil Yakubu da Aliyu Abdulahi a hanyar Kaduna-Kano, inda aka samu alburusai a tare da su.

   Haka kuma rundunar ta ce ta samu nasarar ceto wasu mutum 36 da aka yi garkuwa da su a jihar Kebbi.

8. 10 Disamba 2024Miyetti Allah ta nemi hukumomin Najeriya su saki shugabanta Bello Bodejo

   

   Asalin hoton, Fulani News Media/Facebook

   Ƙungiyar Miyetti Allah Kautal Hore ta nemi gwamnatin Najeriya ta gaggauta sakin shugabanta Bello Abdullahi Bodejo wanda ta ce sojoji sun tsare.

   Kakakin ƙungiyar na ƙasa, Muhammad Tasiu Sulaiman, ya faɗ wa BBC cewa suna cikin tashin hankali saboda rashin sanin halin da shugabansu yake ciki.

   Zuwa yanzu rundunar sojin Najeriya ba ta ce komai ba game da kama shugaban ƙungiyar makiyayan.

   "Maigidanmu Bello Boɗejo yana dawowa ne sai ya tarar da wata matsala tsakanin wani soja da wasu yaran makiyaya. Sojan ya harbi shanu, su kuma yaran sun yi masa duka har suka jikkata shi sosai," in ji shi.

   "Washegari sojoji daga bataliyar 177 suka aiko suna nemansa, sai suka tsare shi. Mun jira amma bai dawo, kuma ba mu san me ya faru ba."

9. 10 Disamba 2024Netanyahu ya yi watsi da zargin rashawa da ake masa

   

   Asalin hoton, Reuters

   Bayan kafa tarihin zama firaministan Isra'ila da ya fi daɗewa a mulki, yanzu kuma Benjamin Netanyahu ya zama jagoran ƙasar na farko da ya gabata a gaban kotu yana kan karagar mulki bisa zargin almundahana.

   Lauyan Netanyahu, Amit Hadad ne ya buɗe zaman da kare wanda yake wakilta, inda ya alaƙanta zargin da bita da ƙullun siyasa.

   Masu gabatar da ƙara sun ce Netanyahu yana ɗaga wa wasu ƙafa da wasu gidajen jarida domin su kare shi a cikin shekara huɗu da suka gabata.

   Haka kuma sun zarge shi da karɓar kyaututtuka - ciki har da sigari da giya - domin taimakon wani attajirin mai shirya finafinan Amurka.

   Netanyahu ya bayyana wa alƙalan cewa yana fuskantar suka daga kafofin watsa labarai na Isra'ila, sannan ya ce babu gaskiya a zargin yana karɓar kyaututtuka.

10. 10 Disamba 2024Ƴantawayen Syria sun bayyana Mohammed al-Bashir a matsayin firaministan riƙon ƙwarya a Syria

    

    Asalin hoton, Getty Images

    An naɗa jagoran ƴantawayen da suka kifar da gwamnatin Bashar al-Assad a matsayin firaministan Syria na riƙon ƙwarya, kamar yadda kafofin sadarwa na ƙasar suka ruwaito.

    A wata sanarwa da Mohammed al-Bishir ya yi a talabijin na ƙasar, ya ce zai yi mulki har zuwa 1 ga watan Maris domin jagorantar gwamnatin riƙon-ƙwarya.

    Al-Bashir, wanda dama shi ne yake shugabantar yankin Idlib, zai jagoranci gwamnati tare da ministoci kaɗan domin dawo da ayyukan gwamnati, wanda ya zo daidai lokacin da wasu ma'aikatun ƙasar suka fara kiran ma'aikata su koma bakin aiki.

    Tun da farko, wakilin Majalisar Ɗinkin Duniya na musamman a Syria ya ce akwai buƙatar dukkan masu ruwa da tsaki a ƙasar su yi aiki tare.

11. 10 Disamba 2024Mutum miliyan 16 na buƙatar agajin gaggawa a Syria - MDD

    

    Asalin hoton, EPA

    Hukumar kula da ƴan gudun hijira ta Majalisar Ɗinkin Duniya ta ce mutum miliyan 16 na buƙatar agajin gaggawa a Syria.

    Wakilin hukumar Gonzalo Vargas Llosa, ya faɗa wa BBC cewa an ɗaiɗaita ƴan Syria 800,000 sakamakon faɗa da ya ɓarke a yankin a baya-bayan nan.

    Kafin yanzu, al'ummar Syria miliyan bakwai aka ɗaiɗaita, kuma sama da miliyan biyar suka tsere zuwa ƙasashe makwabta.

    "Ana buƙatar agajin jin-ƙai cikin gaggawa, kuma lamarin ya ɗaiɗaita mutane da dama," in ji shi.

    Llosa ya bayyana cewa lamarin ya shafi ayyukan jin-ƙai a yankuna kamar Homs, da Hama da kuma Damascus, sai dai ana koma aiki sannu a hankali.

12. 10 Disamba 2024Ba za mu lamunci duk wani hari kan 'yancin 'yan Syria ba - Erdogan

    

    Asalin hoton, Reuters

    Shugaban Turkiyya Recep Erdogan ya ce bai kamata a sake rarraba ƙasar Syria ba.

    Tun bayan ɓarkewar yaƙin basasa, Turkiyya ta bai wa miliyoyin 'yan Syria mafaka, sannan ta fara taimaka wa mayaƙan tawaye na ƙasar da ke faɗa da gwamnatin Bashar al-Assad.

    Da yake magana a safiyar yau, Erdogan ya ce ƙasarsa za ta ci gaba da da adawa da duk wani hari kan "'yancin Syria".

    "Daga yanzu, ba za mu sake bari a rarraba kan ƙasar Syria ba...Duk wani hari kan 'yancin mutanen Syria, da hadin kan sabuwar gwamnati, da kuma ƙasarsu, za mu yaƙe shi," a cewarsa.

    Kalaman nasa na zuwa ne bayan dakarun sojin Isra'ila sun tsallaka iyakar da aka shata tsakanin ƙasar da Syria.

13. 10 Disamba 2024Tinubu ya ƙaddamar da cibiyar fasaha mai sunansa a hedikwatar Immigration

    

    Asalin hoton, State House

    Shugaban Najeriya Bola Tinubu ya ƙaddamar da sabuwar cibiyar fasaha a hedikwatar hukumar shige da fice ta ƙasa.

    Yayin bikin da aka yi a Abuja yau Talata, ya ce ƙaddamar da cibiyar mai sunan Bola Ahmed Tinubu Technology Innovation Complex (BATTIC).

    Ana sa ran sabuwar cibiyar za ta taimaka wajen zamanantar da aikin hukumar ta Immigration ta hanyar aiki da sabbin fasahohin zamani.

    

    Asalin hoton, State House

    

    Asalin hoton, State House

14. 10 Disamba 2024Netanyahu ya zama Firaiministan Isra'ila na farko da ya gurfana a kotu

    

    Asalin hoton, Reuters

    Benjamin Netanyahu ya zama firaministan Isra'ila na farko da ya gurfana a kotu kan zargin aikata manyan laifuka yana kan mulki.

    Netanyahu ya shaida wa kotu a Tel Aviv cewa zargin rashawa da ake yi masa ba shi da tushe.

    Masu shigar da ƙara sun ce Netanyahu ya amshi kyautuka masu tsada, ya kuma ba kafafen yaɗa labarai toshiyar baki domin su riƙa yabon sa.

    Firaministan Isra'ilar ya yi ƙorafin cewa kafafen yaɗa labarai sun tsane shi saboda shi ba mai sassaucin ra'ayi ba ne.

    Ya kuma yi bayani sosai kan yadda yake kwashe tsawon lokaci yana aiki ba tare da ya samu "ko da minti biyar tare da matarsa ba".

15. 10 Disamba 2024Ya kamata a riƙa ɗaure shugabanni da suka ci rashawa - Obi

    

    Asalin hoton, Getty Images

    Ɗan takarar shugaban ƙasa a karkashin jam'iyyar Labour a zaɓen 2023, Peter Obi ya ce kamata ya yi duk shugabanni da aka samu da cin hanci a Najeriya su riƙa fuskantar tsassaurar hukunci.

    Obi ya bayyana haka ne a wata sanarwa da ya fitar yau Talata domin bikin ranar yaƙi da cin hanci ta duniya.

    A cewarsa, cin hanci ya dabaibaye dukkan matakan gwamnati a Najeriya a tsawon shekaru.

    Ya ce ƙasar na fuskantar tarin bashi da ya yi mata katutu, wanda ya faru sakamakon ciyo bashi da gwamnatoci ke ci gaba da yi.

    Tsohon gwamnan na jihar Anambra ya shawarci shugabannin Najeriya da su zama masu gaskiya da kuma kauce wa cin hanci da rashawa.

    "Ƙasancewar Najeriya a jeri na 145 cikin ƙasashe 180 da aka fi cin hanci, ya nuna yadda rashawa ta yi wa Najeriya katutu. Ya kamata a yaƙi hakan idan ana son ci gaba," in ji Obi.

    Ya ƙara da cewa Najeriya na cikin ƙasashen Afrika 11 da ke fama da rashin kyawun shugabanci a cikin shekara 10 da suka wuce.

    Ya ce hakan ya ci gaba da janyo cikas wajen samun cigaba a ƙasar.

16. 10 Disamba 2024Madrid na da kalubale yayin da take shirin karawa da Atalanta

    

    Asalin hoton, Getty Images

    Atalanta za ta karɓi bakuncin Real Madrid a Gasar Zakarun Turai an jima da yamma.

    Dukkan ƙungiyoyi sun yi nasara a wasannin lig-lig na gida. Atalanta ta doke AC Milan da 2-0 a gasar Serie A yayin da Real Madrid kuma ta caskara Girona da 3-0.

    Madrid ta rasa wasanta na baya da ta buga da ƙungiyar Serie A, inda AC Milan ta doke ta 3-1 a watan Nuwamba.

    Atalanta dai ba ta yi rashin nasara ba a Gasar Zakarun Turai ta bana (ta yi nasara uku da canjaras ɗaya).

    Idan suka samu nasara a yau, hakan zai kasance lokaci mai tsawo da suka ɗauka ba a doke su ba a gasar (cikin aƙalla wasanni shida).

    A ɗaya gefen, Madrid ta samu nasarar wasanni biyu ne kacal a Gasar ta Zakarun Turai ta bana, yayin da aka doke ta a wasanni uku.

    Masu sharhi dai na cewa sai mai rike da kofin gasar ta yi da gaske kafin samun damar tsallakewa zuwa zagaye na gaba.

17. 10 Disamba 2024Shettima ya soki sabuwar shugabar jam’iyyar Conservative a Birtaniya saboda kaskantar da Najeriya

    

    Asalin hoton, KASHIM SHETTIMA/FACEBOOK

    Mataimakin shugaban Najeriya, Kashim Shettima, ya soki sabuwar zaɓabɓiyar ƴar shugabar jam’iyyar Conservative a Birtaniya, Kemi Badenoch saboda kaskantar da Najeriya.

    Shettima ya bayyana haka ne ranar Litinin a taron tattaunawa kan hijira karo na 10 da aka yi a Abuja.

    Mataimakin shugaban Najeriyar ya ce “Muna alfahari da kasancewar Kemi Badenoch a matsayin shugabar jam’iyyar Conservative a Birtaniya, duk da kaskantar da ƙasarta ta asali da ta ke yi.”

    “Tana da damar bayyana ra’ayinta a kan koma mene ne, kai har ma idan tana son cire Kemi a cikin sunanta ma za ta iya, to amma ba wai hakan ba zai rage wa Najeriya matsayinta na kasancewa ƙasar baƙar fata mafi shahara ba.”

    Ya ce, “Idan ka lura duk inda ka samu baƙar fata uku to ko shakka babu za ka ga ɗaya daga cikinsu ɗan Najeriya ne.”

    Daga nan ya jaddada ƙoƙarin gwamnati na kare hakkin ƴan ci-rani da kuma taya su murna a kodayaushe saboda irin ci gaba da ma gudunmawar da suke bayar wa wajen ciyar da ƙasa gaba.

    A 2022, Badenoch, wato a lokacin da ta ke a matsayin ƴar majalisar dokokin Birtaniya daga Najeriya wadda kuma ake ganin za ta iya zama Firaiministar Birtaniya wata rana, ta zargi ƴan siyasar Najeriya da amfani da kuɗin al’umma don biyan buƙatun kansu.

    Bayan zaɓarta a masatyin shugabar jam’iyyar Conservative a watan Nuwambar 2024, shugabar hukumar kula da ƴan Najeriya mazauna ƙasashen waje NIDCOM, Abike Dabiri-Erewa, ta ce hukumarta ta yi ta tuntuɓar Badenoch, to amma babu wata alama ta nuna cewa ta samu sakon hukumar.

18. 10 Disamba 2024An yi wa shugaban Brazil Lula aiki a kwakwalwa

    

    Asalin hoton, EPA

    Shugaban Brazil Luiz Inácio Lula da Silva na samun sauki bayan yi masa aiki a kwakwalwa, a cewar likitocinsa.

    An kai shugaban mai shekara 79 zuwa asibiti a Brasilia, babban kasar ranar Litinin, bayan da ya yi ƙorafin cewa yana jin tsananin ciwon kai.

    Wani gwaji da aka gudanar, ya nun zubar jini a kwakwalwarsa, abin da ya sanya aka sauya masa asibiti zuwa São Paulo.

    Ya samu matsalar ce lokacin da ya faɗi a ban-ɗaki a fadarsa a watan Oktoba, a cewar sanarwar da asibitin ya fitar.

    Likitoci sun ce sun yi masa aiki inda suka sauya wani kashi a cikin kwakwalwarsa.

    Asibitin ya ce shugaba Lula na karkashin kulawa a sashen kula da masu matsanancin hali, kuma yana samun lafiya.

    Ta kuma ce ba a samu wata matsala ba lokacin yi masa tiyatar.

19. 10 Disamba 2024Hatsarin motar Golf ya kashe mutum 14 a Jigawa

    

    Asalin hoton, Getty Images

    Rundunar ƴansandan Najeriya a Jigawa ta tabbatar da mutuwar ɗaukacin fasinjoji 14 da ke cikin wata mota da ta yi hatsari a jihar, wadda ke Arewa maso yammacin ƙasar.

    Mai magana da yawun rundunar a jihar ta Jigawa, DSP Lawan Shi’isu, ya kuma tabbatar wa BBC cewa direban da ya tsira da ransa na cikin mawuyacin hali sanadiyyar munanan raunuka da ya samu.

    Hatsarin ya faru ne da yammacin jiya Litinin yayin da motar ƙirar Golf ke maƙare da mutane daga garin Hadejia zuwa Maƙera da ke ƙaramar hukumar Kafin Hausa.

    A lokacin ne motar ta faɗa wata gada wadda ta ɓalle sanadiyyar ambaliyar ruwa a daminar da ta gabata.

    DSP Shi’isu ya ce ana kyautata zaton ɗiban fasinja fiye da kima da kuma tsananin gudu ne ya yi sanadin faruwar lamarin.

    Ya kuma bayyana cewa a halin yanzu direban, wanda ke cikin mawuyacin hali na samun kulawa a asibiti yayin da tuni wasu daga cikin ƴan’uwan waɗanda abin ya shafa suka karɓi gawarwakinsu.

    Hatsarin ya rutsa ne da mata takwas, da maza magidanta biyu da kuma matasa guda huɗu.