Abubuwan da ke faruwa a Najeriya da sauran sassan duniya, Litinin 07/07/2025

Rahoto kai-tsaye

Usman Minjibir da Abdullahi Bello Diginza

1. 7 Yuli 2025Adadin mutanen da suka mutu a ambaliyar Texas ya haura 80

   

   Asalin hoton, Getty Images

   Hukumomi a jihar Texas da ke Amurka sun tabbatar da mutuwar fiye da mutum 80 sakamakon ambaliyar da ta auka wa jihar tun a ranar Juma'a.

   Mutum 68 daga cikin waɗanda suka mutu ciki har da ƙananan yara 28, a gundumar Kerr suke.

   Har yanzu akwai ƴanmata 10 da mai kula da wurin shaƙatawar Mystic da ba a ji ɗuriyarsa ba.

   Alƙaluman waɗanda suka mutu na sauyawa cikin hanzari, yayin da masu aikin ceto ke ci gaba da lalubo gawarwaki.

   Shugaba Trump ya ce ya tsara zuwa yankin da lamarin ya faru cikin wannan mako

2. 7 Yuli 2025Za a ci gaba da tattaunawar tsagaita wuta tsakanin Hamas da Isra'ila

   A yau ne za a ci gaba da tattaunawa tsakanin Hamas da Isra'ila kan yiwuwar cimma yarjejeniyar tsagaita wuta a Gaza da kuma sakin Isra'ilawan da Hamas ke garkuwa da su.

   Wani jami'i a Falasdinu ya ce ba a cimma wata matsaya ba a tattaunawar ranar Lahadi da aka shafe fiye da sa'a uku ana yi.

   A yau ne Firaministan Isra'ila, Benjamin Netanyahu zai gana da Shugaba Trump na Amurka.

   Mista Trump ya ce yana fatan za a cimma yuarjejeniya a wannan makon.

3. 7 Yuli 2025Trump ya caccaki Musk kan yunƙurin kafa sabuwar jam'iyya a Amurka

   

   Asalin hoton, Reuters

   Shugaban Amurka Donald Trump ya caccaki tsohon mashawarcinsa, Elon Musk, kwana guda bayan hamshaƙin attajirin ya sanar da cewa zai kafa sabuwar jam'iyyar siyasa a Amurka.

   Cikin wani saƙo da ya wallafa a shafukansa na sada zumunta, Mista Trump ya ce Elon Musk ya bauɗe hanya.

   ''An gina tsarin siyasar Amurka kan aƙidar tsarin jam'iyya biyu'', in ji Shugaba Trump, yana mai cewa ƙarin jam'iyya zai haifar da ruɗani a siyasar Amurka.

   Shi dai Elon Musk ya ce jam'iyyar America Party da yake yunƙurin kafawa za ta ƙwato wa masu zaɓe ƴancinsu.

4. 7 Yuli 2025Asslam alaikum

   Masu bin shafin BBC Hausa kai-tsaye, barkanmu da safiyar wannan rana ta Litinin.

   Abdullahi Bello Diginza ke fatan kasancewa da ku, bisa kulawar Usman Minjibir, domin kawo muku halin da duniyar ke ciki.

   Ku kasance da mu shafukanmu na sada zumunta domin tafka muhawara kan labaran da muke wallafawa.