Kana amfani da shafin BBC mai bayyana rubutu kawai (babu hoto) domin rage cin data. Idan ana so a ga hotuna da bidiyo sai a koma babban shafinmu.
Wannan shafi ne da ke kawo muku muhimman abubuwan da ke faruwa a duniyar wasanni daga Asabar 30 zuwa 5 ga watan Satumbar 2025.
Mohammed Abdu
Liverpool ta amince za ta ɗauki ɗan wasan tawagar Ingila, Marc Guehi daga Crystal Palace.
Mai shekara 25, zai kammala komawa Anfield ranar Litinin bayan auna koshin lafiyarsa daga nan ya saka hannu kan yarjejeniya da ƙungiyar da ta lashe Premier League na kakar da ta wuce.
Guehi ne ya yi wa Palace ƙyaftin a wasan da ta je ta doke Aston Villa 3-0 ranar Lahadi a Premier League, wanda ya buga mata karawa na 162 jimilla.
Wolverhampton ta kammala sayen Tolu Arokodare daga Genk kan fam miliyan 24, ya kuma amince da ƙunshin yarjejeniyar kaka huɗu a Molineux.
Wolves tana ta karshen teburin Premier League, bayan da ta yi rashin nasara uku da fara kakar bana.
Arokodare, wanda ya ci ƙwallo 21 a babbar gasar tamaula ta Belgium da lashe ƙyautar takalmin zinare a kakar da ta wuce, zai ke taka leda tare da Jorgen Strand Larsen a gurbin masu cin ƙwallye.
Ɗan wasan mai shekara 24 ya ci ƙwallo 41 a wasa 113 a Genk, tun bayan da ya koma can da taka leda daga Valmiera a 2023 ya kuma ci ƙwallo ɗaya a tawagar Najeriya.
Ya koma Valmiera daga Najeriya a 2019 da cin ƙwallo 22 a wasa 34.
An bayar da aron Arokodare ga FC Koln a Bundesliga daga nan ya koma Amiens da yin wasannin aro kaka biyu da cin ƙwallo 21.
Ya buga karawa biyar a Genk a kakar nan da zura ƙwallo ɗaya a raga.
Ɗan wasan tawagar Najeriya, Rabiu Abdullahi ya koma FK Bylis ta Albania daga Tudun Wada United.
Ɗan wasan mai shekara 20 ya buga babbar gasar tamaula ta Najeriya a bara a Bayelsa United, wanda ya ci ƙwallo 10 a wasa 23.
Rabiu Pele ya buga wa tawagar Najeriya ta matasa ƴan kasa da shekara 20, ya kuma sa hannu kan yarjejeniyar kaka uku a ƙungiyar ta Albania.
Newcastle ta amince da biyan fam miliyan 55m ga Brentford domin sayen Yoane Wissa.
Tun farko kuɗin cinikin ya kama kan fam miliyan 50 da karin tsarabe-tsarabe na fam miliyan biyar, ana sa ran ɗan kasar Jamhuriyar Congo zai je Newcastle United domin kammala sa hannu kan kwantiragi.
Tun farko Brentford ta yi watsi da tayi biyu da Newcastle ta fara yi wa ɗan wasan.
Newcastle ta sayi Wissa ne bayan da ta sayar da Alexander Isak kan fam miliyan 125 ga Liverpool a matakin mafi tsada a Burtaniya.
Kociya, Eddie Howe na fatan kara karfin gurbin masu cin ƙwallaye duk da sayen Nick Woltermade daga Stuttgard kan yarjejeniyar kaka shida a matakin mafi tsada da ta saya a tarihinta.
Ranar Lahadi, Wissa mai shekara 28 ya fitar da sanarwar cewar yana son ya bar ƙungiyar, ya kuma soki Brentford da yunkurin hana shi komawa Newcastle United a kakar nan.
Manchester United ta amince za ta ɗauki mai tsaron ragar tawagar Belgium, Senne Lammens daga Royal Antwerp kan fam miliyan 18.1 har da karin tsarabe-tsarabe.
Hakan ya kawo karshen zawarcin golan Aston Villa, Emiliano Martinez da ta yi.
Lammens, mai shekara 23, zai saka hannu a ƙungiyar Old Trafford kan yarjejeniyar kaka biyar.
United na fatan ɗinke ɓarakar gurbin mai tsaron raga, bayan da Altay Bayindir ke kuskure a lik, yayin da ake zargin Andre Onana da yin sakacin da aka fitar da United a League Cup a hannun Grimsby.
Lammens ya koma Antwerp a matakin mara ƙunshin yarjejeniya daga Club Brugge a 2023, wanda ya tsare raga karo 64 a Antwerp da lashe Belgian Super Cup a 2023.
Tottenham Hotspur ta ɗauki aron ɗan wasan Paris St-Germain, Randal Kolo Muani.
An daɗe ana ta alakanta ɗan ƙwallon da ƙungiyoyin Premier League, ciki har da Tottenham da Manchester United da Chelsea da kuma West Ham.
Zai koma Tottenham a daren Litinin ranar rufe kasuwar saye da sayar da ƴan ƙwallo ta Turai.
Kolo Muani ya buga wasannin aro a Juventus a rabin kakar da ta wuce da cin ƙwallo takwas a wasa 16 a Serie A.
Tsohon ɗan wasan Nates da Eintracht Frankfurt ya koma PSG a Satumbar 2023, wanda ya lashe Legue 1 karo biyu.
Kolo Muani ya buga wa tawagar Faransa wasa 31 da cin ƙwallo a gasar kofin duniya a 2022 a daf da karshe da suka ci Morocco ya kuma yi karawar karshe da Argentina ta lashe kofin.
Zai zama ɗan wasa na huɗu da Tottenham ta ɗauka a bana da ya haɗa da Mohammed Kudus da Joao Palhinha da Xavi Simons.
Ƙungiyar Bayer Leverkusen ta kori tsohon kocin ƙungiyar Manchester United Erik ten Hag daga horar da ƴanwasanta bayan jan ragamar ƙungiyar a wasa biyu kacal.
A watan Oktoba ne Man U ta kaɗa Ten Hag mai shekara 55 a duniya, sannan ƙungiyar Leverkusen ta Jamus ta ɗauke shi domin maye gurbin Xabi Alonso wanda ya koma Real Madrid.
A wannan makon kaɗai an kori tsofaffin masu horar da ƴanwasan Man U guda uku: Ole Gunnar Solskjaer da Besiktas ta sallama a ranar Alhamis, sai Jose Mourinho da aka sallama a ranar Juma'a, sai kuma yau da Leverkusen ta sallami Ten Hag.
"Babu wanda yake sha'awar ɗaukar mataki irin wannan," in ji manajan darakta na ƙungiyar, Simon Rolfes.
Ya ce sai dai sun fahimci cewa gina ƙungiyar ta koma ganiyarta, "zai yi wahalar gaske a wannan tsarin."
Sallamar Ten Hag ta kafa tarihi a gasar Bundesliga, inda ya karya tsohon tarihin sallamar koci bayan wasa biyar kacal.
A wasa biyu da ya jagoranci Leverkusen, maki ɗaya kawai ƙungiyar ta samu.
Ƙungiyar ƙwallon ƙafa ta Liverpool ta amince ta fitar da tsantsagwaron kuɗi fam milian 125 daga lalitarta domin sayen ɗan wasa Alexander Isak daga Newcastle.
Majiyoyi da ke da masaniya kan cinikin sun shaida wa BBC cewa yanzu an kammala yarjejeniyar komawar ɗan wasan ɗan asalin ƙasar Sweeden zuwa Anfield.
Majiyoyi daga ɓangaren Newcastle sun ce kuɗin zai iya kaiwa fam miliyan 130, tare da wasu ƴan canji a sama.
Ana sa ran yi wa Isak gwaje-gwajen lafiya a yau Litinin gabanin sanya hannu da zai yi kan kwantaragin taka leda a Liverpool ta tsawon shekara shidda.
A watan Agustan da ya gabata Liverpool ta miƙa wa Newcastle tayin sayen Isak kan kuɗi fam miliyan 110, sai dai an yi watsi da tayin nata, amma a yanzu da alama ta shirya ɗaukar ɗan wasan da ta nace mawa.
Da alama doguwar tirka-tirka da aka kwashe tsawon lokaci ana yi kan sayen matashin mai shekara 25 a duniya za ta zo ƙarshe ne a ranar ƙarshe ta kasuwar musayar ƴan wasa ta wannan bazara.
Hakan na zuwa ne bayan Newcastle ta samu nasarar sayen ɗan wasa Nick Woltermade daga ƙungiyar Stuttgart a makon da ya gabata.
Tuni Liverpool ta karya tarihin da take da shi na kashe kuɗi wajen sayen yan wasa bayan ta sayi Bajamushen ɗan wasan tsakiya Florian Wirtz kan kuɗi kimanin fam miliyan 100 tare da ƙarin fam miliyan 16 a sama.
Bayan sayen ƴan wasa Hugo Eketike, Milos Kerkez, Jeremie Frimpong, Giorgi Mamardashvili, Armin Pecsi da kuma Giovanni Leoni, sayen ɗan wasa Isak zai sanya kuɗin da Liverpool ta kashe a wannan bazara ya kai fam miliyan 416 da ɗoriya.
Chelsea ta tuntuɓi Sporting kan ko za a sayar mata da Conrad Harder, bayan da ta bukaci Bayern Munich ta sayi Nicolas Jackson.
Ranar Asabar Chelsea ta bukaci janyewa daga yarjejeniyar da ta kulla da Bayern Munich, bayan da aka kammala auna koshin lafiyar Jackson kan cewar zai buga wasannin aro kan fam miliyan 13, saboda Liam Delap ya ji rauni.
Hakan ne ya sa Chelsea ta tuntuɓi Sporting ko za a sayar mata da Harder, saboda raunin da Delap ya ji a wasan Premier da ta yi nasara a kan Fulham 2-0 ranar Asabar.
Sai dai Jackson ya zabi ya zauna a Jamus, kawo ranar Lahadi bai koma Ingila ba kuma a shirye yake ya bar Stamford Bridge.
Hakan ne ya sa Chelsea ta bukaci Bayern Munich ta sayi Jackson, domin ya ba ta damar sayo gurbin mai cin ƙwallaye.
Kociyan Manchester City, Pep Guardiola ya tabbatar da cewar Rayan Cherki zai yi jinyar wata biyu.
Ɗan wasan mai shekara 22, wanda ta ɗauka a watan Yuni kan fam miliyan 30.45 daga Lyon, ya ci ƙwallo a wasan farko da City ta caskara Wolverhampton 4-0, ya kuma yi karawar da Tottenham ta doke City 2-0 a Etihad a Premier League.
Cherki bai yi wa City karawar da Brighton ta yi nasarar cin 2-1 ba a wasan mako na uku a babbar gasar tamaula ta Ingila ranar Lahadi.
Kenan ɗan wasan Liverpool, Hugo Ekitike ne zai maye gurbin Cherki a tawagar Faransa da za ta buga wasannin neman shiga gasar kofin duniya a cikin watan Satumba.
Tottenham Hotspur ce ke kan gaba a zawarcin dan wasan bayan Manchester City Manuel Akanji, mai shekara 30, yayin da take neman doke AC Milan da Crystal Palace. (Gazetta Dello Sport - in Italian), external
Kocin Barcelona Hansi Flick ya ce yana da yakinin cewa dan wasan tsakiya mai shekara 22 Fermin Lopez, wanda ya sau biyu ya yi wa Sfaniya wasa ba zai bar kungiyar ba a wannan kasuwar musayyar 'yan wasa duk da ana alakanta shi da Chelsea.(ESPN), external
Sai dai Chelsea a shirye take ta yi wa Barcelona tayin yuro miliyan 90 kan Lopez (Mundo Deportivo - in Spanish), external
West Ham ta bi sahun kungiyoyin da ke son daukar Fabio Vieira daga Arsenal, sai dai Stuttgart da wata babbar kungiya ta Bundesliga na sha'awar dan wasan tsakiya na Portugal mai shekara 25.(Sky Sports Germany), external
Liverpool ta zama ta farko da ta haɗa maki uku daga wasa uku a Premier League, bayan da ta doke Arsenal 1-0 a Anfield ranar Lahadi.
Liverpool ta ci ƙwallon ta hannun Dominik Szoboszlai, kuma karo na 37 a jere tana zura ƙwallo a raga a babbar gasar tamaula ta Ingila.
Ta taɓa yin irin wannan bajintar amma a wasa 36 tsakanin Maris ɗin 2019 zuwa Fabrairun 2020.
Liverpool ta haɗa maki tara ne, bayan doke Bournemouth da Manchester United da kuma Arsenal.
Arsenal ta fara da cin Manchester United 1-0, sannan ta caskara Leeds United 5-0.
RB Leipzig na son ta dauko dan wasan tsakiya na Liverpool da Ingila a tawagar 'yan wasa masu shekaru 21, Harvey Elliot mai shekara 22 a matsayin wanda zai maye gurbin Xavi Simons ,sai dai kungiyar ta Jamus ba ta amince da farashin da Reds ta sanya kan dan wasan ba (ESPN), external
Watakila Liverpool ta maida hankali kan dan wasan tsakiyar Aston Villa da Ingila Morgan Rogers mai shekara 23, idan ta cefanar da Elliott (Football Insider), external
Dan wasan mai kai hari na kasar Brazil Rodrygo, mai shekara 24, zai ci gaba da taka leda a Real Madrid a wannan kasuwar musayar 'yan wasa duk da cewa kungiyoyi da dama da suka hada da Liverpool da Arsenal na zawarcinsa.(Marca - in Spanish), external
Leeds United ta ci gaba da zawarcin dan wasan tsakiyar Leicester City da Morocco Bilal El Khannouss mai shekara 23 bayan yunkurinsu na neman Facundo Buonanotte na Brighton ya ruguje. (The Athletic - subscription required), external
Watakila Manchester United ta ɗauki mai tsaron ragar Aston Villa, Emiliano Martinez kafin a rufe kasuwar cinikin ƴan ƙwallo ranar Litinin.
United na fatan ɗinke ɓarakar gurbin mai tsaron raga, tana kuma neman golan, Royal Antwerp ɗan wasan tawagar Belgium mai shekara 23, Senne Lammens.
Ana kuma sa ran watakila Lammens ya koma Old Trafford, wanda bai yi wa Antwerp wasa na biyu ba a gasar Belgium.
To sai dai kuma matashi ne, yayin da Martinez yana da kofin duniya da ya lashe a Qatar tare da Argentina, sannan ya yi gwarzon mai tsaron raga da Fifa ta karrama karo biyu da yin wasa 197 a Premier League.
Ranar Asabar Manchester United ta yi nasara a kan Burnley da cin 3-2 a Premier League a Old Trafford.
Tun farko ta fara da rashin nasara a hannun Arsenal 1-0 da yin 1-1 da Fulham.
Kociyan Brighton, Fabian Hurzeler ya zama na biyu da Pep Guardiola ya fuskanta karo uku ya kuma kasa doke wa.
Ranar Lahadi Manchester City ta yi rashin nasara 2-1 a gidan Brighton karkashin Hurzeler a wasan mako na uku a Premier League.
A bara da Guardiola ya fuskanci Hurzeler a Premier League ya yi rashin nasara 2-1 cikin watan Nuwambar 2024, yayin da suka tashi 2-2 a fafatawa ta biyu a Etihad cikin watan Maris ɗin 2025.
Shi dai Hurzeler yana da shekara 15 da haihuwa lokacin da Guardiola ya fara jan ragamar Barcelona a karon farko a 2008.
Wanda Guardiola ya fara fuskanta karo uku ba tare da nasara ba shi ne Ronald Koeman, wanda ya yi canjaras biyu da rashin nasara ɗaya a hannun Koeman.
Erling Haaland ya buga wa Manchester City wasa na 100 a Premier League ranar Lahadi, wanda shi ne ya fara cin ƙwallo kuma na 87 jimilla kenan.
Koda yake City ta yi rashin nasara 2-1 a gidan Brighton a wasan mako na uku a babbar gasar tamaula ta Ingila.
Chelsea na tunanin cika sharudan yarjejeniyar sakin dan wasan Braga, Roger Fernandes, mai shekara 19, kafin a rufe kasuwar saye da sayar da 'yan wasa ta bazara. (A Bola - in Portuguese), external
Aston Villa na duba yuwuwar daukar dan wasan bayan Osasuna da Kamaru Enzo Boyomo mai shekara 23 a kan fan miliyan 21.25 ya yin da kocin kungiyar Unai Emery ke kokarin kara inganta 'yan wasansa masu tsaron bayar.(The Telegraph - subscription required), external
Kungiyoyi biyu na gasar Premier suna zawarcin dan wasan gaban Sevilla da Belgium Dodi Lukebakio, mai shekara 27, inda kungiyar ta Sfaniya ta shirya tsaf wajan karbar tayin kungiyoyi kafin karshen wa'adi musayar'yan wasa. (Fabrizio Romano)
James Millner ya zama mai yawan shekara da ya ci fenariti a Premier League mai shekara 39 da kwana 239.
An haifi golan da ya ci na Manchester City, James Trafford wata ɗaya tsakanin kafin Miller ya fara wasan farko a 2002.
Brighton ta doke Manchester City 2-1 a wasan mako na uku a Premier League ranar Lahadi.
City ce ta fara cin ƙwallo ta hannun Erling Haaland daga baya Brighton ta farke a bugun fenariti ta hannun James Millner.
Brighton ta kara na biyu ta hanun Brajan Gruda daf a tashi da hakan ya sa ta haɗa maki uku a fafatawar.
Da wannan sakamakon Brighton ta samu maki huɗu daga karawa uku, ita kuwa City tana da maki uku daga fara kakar tamaula ta bana ta Premier League.
City ta fara da daoke Wolverhampton 4-0 a makon farko, sannan ta yi rashin nasara a gida a hannun Tottenham 2-0.
Fulham ta kusan sayen Kevin ɗan wasan Brazil kan fam miliyan 34.6 daga Shakhtar Donetsk a matakin mafi tsada a tarihin ƙungiyar.
Mai shekara 22 ya ci ƙwallo 17 da bayar da 10 aka zura a raga a wasa 57 tun bayan da ya koma Turkiya daga Palmeira a 2023, kuma shi ne na biyu da Marco Silva zai ɗauka a bana.
Yana da ƙwarewa a gasar Zakarun Turai, wanda ya buga wasa bakwai a Shakhtar a Champions League a kakar da ta wuce.
Wanda Fulham ta saya mafi tsada shi ne Emile Smith Rowe daga Arsenal kan fam miliyan 27 a bara.
Fulham ta fara ɗaukar mai tsaron raga Benjamin Lecomte daga Montpellier kan fam 500,000.
Fulham tana da maki biyu daga wasa uku a Premier League, wadda ta yi rashin nasara 2-0 a hannun Chelsea a Stamford Bridge ranar Asabar.