Abubuwan da ke faruwa a Najeriya da sauran sassan duniya 01/09/2024

Rahoto kai-tsaye

Daga Abdullahi Bello Diginza da Muhammad Annur Muhammad

1. 1 Satumba 2024Rasha ta ce ta kakkaɓo jiragen Ukraine marasa matuƙa kusan 40

   

   Asalin hoton, Getty Images

   Ukraine ta ƙaddamar da wasu sabbin hare-haren jirage marasa matuƙa a wasu sassan ƙasar Rasha ciki har da Moscow babban birnin kasar.

   To sai dai magajin garin Moscow, Sergei Sobyanin ya ce Rasha ta kakkaɓo jiragen marasa matuƙa biyar a kusa da wata matatar mai a Moscow.

   Gwamnonin yankin sun ce kusan jirage marasa matuƙa 40 ne aka tarwatsa a Bryansk, da Voronezh (Vuh-ROH-nezh) da sauran yankunan.

   Sun ce ɓarnar da hare-haren suka yi ba ta da yawa, inda aka lalata cibiyoyin adana mai da kuma wasu muhimman gine-gine a wurare daban-daban.

   Sai dai masu aiko da rahotanni sun ce ba kasafai Rasha ke bayyana irin girman ɓarnar hare-haren Ukraine ba.

2. 1 Satumba 2024An gano gawarwakin mutum shida da Hamas ke garkuwa da su

   

   Asalin hoton, Hostages Families Forum

   Rundunar sojin Isra'ila ta tabbatar da cewa gawarwakin mutum shida da aka gano a wani rami da ke birnin Rafah na Gaza na mutanen da Hamas ta yi garkuwa da su ne a harin ranar 7 ga watan Oktoba.

   Ta bayyana sunayensu tare da cewa cikinsu akwai Ba'amurke wanda ya fito a wani bidiyon Hamas a watannin baya an yanke hannunsa.

   Shugaba Biden ya bayyana mutuwarsa a matayin abin takaici, yana mai cewa shugabannin Hamas za su ɗanɗana kuɗarsu kan abin da suka aikata.

   Kungiyar 'yan'uwan mutanen da ake garkuwa da su sun sake yin kira ga firaminista Benjamin Netanyahu ya amince da yarjejeniyar tsagaita wuta domin sako sauran mutanen da aka yi garkuwa da su.

3. 1 Satumba 2024Sallama

   Masu bin shafin BBC Hausa kai-tsaye barkanmu da hutun ƙarshen mako.

   Abdullahi Bello Diginza ke fatan sake kasancewa da ku a daidai wannan lokaci, domin kawo muku irin wainar da ake toyawa a faɗin duniya.

   Kada ku manta da tafka muhawara a shafukanmu na sada zumunta da muhawara.