Labarin wasanni daga 1 zuwa 7 ga watan Nuwambar 2025

Rahoto kai-tsaye

Mohammed Abdu

1. 4 Nuwamba 2025Fiorentina ta kori kociyanta Pioli

   

   Asalin hoton, Getty Images

   Fiorentina ta kori Stefano Pioli, kamar yadda mai buga Serie A ta sanar ranar Talata. bayan kasa cin wasanni da hakan ya kai ƙungiyar karshen teburin gasar.

   Pioli ya sake karɓar aikin kocin a karo na biyu a cikin watan Yuli, sai dai maki huɗu Fiorentina ta samu daga wasa 10 - kaka mafi muni da ƙungiyar ta samu kanta a babbar gasar tamaula ta Italiya, kuma hakan ya sa magoya baya suka yi ta zanga-zanga.

   An sanar da cewar Daniele Galloppa ne zai karɓi aikin horar da Fiorentina a matakin rikon ƙwarya nan take.

   Haka kuma tun a ranar Asabar daraktan wasannin ƙungiyar, Daniele Prade ya yi murabus.

   Wasan karshe da Pioli ya ja ragama shi ne ranar Lahadi da Lecce ta yi nasara a Serie A.

   Pioli, wanda ya lashe Serie A tare da AC Milan a 2022, ya karɓi aikin kwantiragin kaka uku a Fiorentina, bayan maye gurbin Raffaele Palladino wanda ya bar ƙungiyar mako uku da fara aikin daga watan Mayu.

   Fiorentina za ta kai ziyara Jamus, domin karawa da Mainz 05 ranar Alhamis a Conference League a gasar da Pioli ya ci wasa biyu.

   Haka kuma ranar Lahadi Fiorentina za ta je Genoa a gasar Serie A.

2. 4 Nuwamba 2025

   

   Asalin hoton, Getty Images

   Barcelona za ta sayi Marcus Rashford daga Manchester United kan yarjejeniya ta dindindin a ƙarshen zaman aronsa, amma sai ɗan wasan gaban na Ingila mai shekara 28 ya amince da tayin albashin ta. (Talksport)

   Ficewar ɗan wasan tsakiya na Ingila Kobbie Mainoo daga Manchester United a watan Janairu ya kusanto, yayin da Napoli ta ƙara ƙaimi wurin yunƙurin ɗaukar aron ɗan wasan mai shekara 20. (Team Talk)

   Wakilin Niclas Fullkrug ya ce "zai yi kyau" idan ɗan wasan na Jamus mai shekara 32 ya bar West Ham. (TOMorrow Business Podcast).

   Ɗan wasan bayan Arsenal da Faransa William Saliba, mai shekara 24, ya ce ya yi nazarin yiwuwar komawa Real Madrid kafin ya yanke shawarar ƙulla sabuwar yarjejeniya da Gunners a watan Satumba. (Sports Illustrated)

   Newcastle United na nazari kan ɗan wasan tsakiyar Atalanta Ederson, mai shekara 24, a matsayin wanda zai maye gurbin ɗan ƙasar Brazil Joelinton, mai shekara 29. (The I)

   Liverpool ta shiga jerin ƙungiyoyin da ke fafatukar daukar ɗan wasan River Plate ɗan ƙasar Argentina Ian Subiabre mai shekara 18 . (Fichajes)

3. 4 Nuwamba 2025Abin da ya kamata ku sani kan wasan Liverpool da Real Madrid

   

   Asalin hoton, Getty Images

   Liverpool za ta karɓi bakuncin Real Madrid a wasa na huɗu na cikin rukuni a gasar Zakarun Turai ta Champions League a filin wasa na Anfield ranar Talata. Me kuke son sani kan fafatawar?

   Biyu daga cikin manyan ƙungiyoyin nahiyar Turai da ke da ɗumbin tarihi a babbar gasar zakarun Turai, waɗanda ke da kofin 21 tsakaninsu.

   Ƙungiyar Sifaniya mai Champions League 15 za ta je Anfield, bayan doke Valencia 4-0 a La Liga ranar Lahadi, kuma ita ce ta ɗaya a teburin babbar gasar tamaula ta Sifaniya.

   Liverpool mai kofin zakarun Turai shida ta ɗan yi fama da kalubale, wadda ta yi rashin nasara shida daga wasa takwas baya a dukkan karawa.

   Latsa nan ka ci gaba da karanta labarin

4. 4 Nuwamba 2025Neto ba zai buga wa Chelsea wasan Qarabag ba a Champions League

   Pedro Neto ba zai buga wa Chelsea Champions League ba da za ta kai ziyara a Qarabag ranar Laraba, kamar yadda koci, Enzo Maresca ya sanar

   Mai shekara 25 ya ji rauni a wasan da Chelsea ta yi nasara a gidan Tottenham a Premier League, inda aka sauya shi saura minti biyar a tashi daga karawar.

   Matashin yana buga wasanni da yawa karkashin Maresca, wanda ya saka shi a dukkan karawa 10 a Premier League ta bana.

5. 4 Nuwamba 2025Haaland ya ce ba zai iya kafaɗa da Messi ko Ronaldo ba a cin ƙwallaye

   

   Asalin hoton, Getty Images

   Erling Haaland ya yi watsi da batun da ake haɗa shi da bajintar Lionel Messi da kuma Cristiano Ronaldo da cewar ba wani ɗan wasan da zai je kusa da su a tarihin zazzaga ƙwallaye a raga a duniya.

   Mai shekara 25 ya ci ƙwallo 26 a dukkan karawa a Manchester City da tawagar Norway tun daga watan Nuwamba, kawo yanzu ya zura 327 a raga.

   To sai dai da akwai tazara da yawa tsakanin Haaland da ƙyaftin ɗin Argentina, mai shekara 38 da ya ci ƙwallo 892 da na tawagar Portugal mai shekara 40, mai ƙwallo 952, wanda ke harin zazzaga 1,000 a raga.

   Haaland ya zura ƙwallo 56 a Manchester City a kakarsa ta farko a 2022/23, bayan da ya koma Etihad daga Borussia Dortmund.

   Kawo yanzu ya zazzaga ƙwallo 107 a raga a Premier League - Alan Shearer ne kan gaba a yawan cin ƙwallaye a babbar gasar tamaula ta Ingila mai 260 jimilla a wasa 124.

6. 3 Nuwamba 2025Watakila Gyokeres ba zai yi wasan Slavia Prague ba a Champions League

   

   Asalin hoton, Getty Images

   Watakila Viktor Gyokeres ba zai buga wa Arsenal wasan Champions League ba da za ta kara da Slavia Prague ranar Talata.

   Gyokeres bai halarci atisaye a London Colney ba ranar Litinin, bayan raunin da ya ji a Premier League ranar Asabar da Arsenal ta ci Burnley 2-0, kuma shi ne ya ci na farko.

   Daga baya ne Mikel Merino ya canje shi a karawar da suka yi a Turf Moor - Arsenal na fatan nasara ta 10 a jere a dukkan fafatawa.

   Martin Zubimendi na hukuncin dakatarwa shima ba zai yi wasan ba, ana sa ran Christian Norgaard zai maye gurbinsa, haka kuma Kepa Arrizabalaga bai je atisaye ba a ranar ta Litinin.

   Tsohon ɗan wasan Arsenal da tawagar Ingila, Alex Oxlade-Chamberlain, wanda ya taka leda a gunners tsakanin 2011 zuwa 2017 ya motsa jiki tare da ƴan wasa.

   Kawo yanzu ba shi da ƙungiya tun bayan barin Besiktas ta Turkiya, ana cewa yana motsa jiki ne domin ya kasance kan ganiya kafin ya samu wata ƙungiyar.

7. 2 Nuwamba 2025Man City ta koma ta biyun teburin Premier League, bayan cin Bournemouth

   

   Asalin hoton, Getty Images

   Manchester City ta koma ta biyu a teburin Premier League, bayan da ta doke Bournemouth 3-1 a Etihad.

   Erling Haaland ne ya ci biyu daga ciki, yana da 14 jimilla a Premier League a kakar nan.

   City tana da maki 19 da tazarar shida tsakani da Arsenal mai jan ragama da kuma maki ɗaya tsakani da Liverpool ta uku.

8. 2 Nuwamba 2025Kano Pillars ta yi rashin nasara a Enyimba International

   

   Asalin hoton, Kano Pillars x

   Enyimba International ta doke Kano Pillars 2-0 a wasan mako na 11 a Premier ta Najeriya ranar Lahadi.

   John Bassey ne ya fara cin ƙwallo a minti na 29 daga baya Edidion Ezekiel ya kara na biyu saura minti 10 su je hutu.

   Da wannan sakamakon Pillars mai ƙwantan wasa tana ta 20 da maki biyar, ita kuwa Enyimba mai maki 16 tana ta shidan teburi.

   Ita kuwa Barau FC ta tashi ba ci da Wikki Tourist a filin wasa na Sani Abacha da ke kofar Mata a Kano.

   Sauran sakamakon wwasan mako na 11 da aka buga ranar Lahadi:

   • Barau FC 0-0 Wikki Tourists
   • El Kanemi Warriors 0-0 Enugu Rangers International
   • Ikorodu City 2-0 Kun Khalifat FC
   • Niger Tornadoes 1-2 Abia Warriors
   • Rivers United 1-0 Nasarawa United
   • Shooting Stars 1-1 Katsina United

9. 2 Nuwamba 2025

   

   Asalin hoton, Getty Images

   Aston Villa ta bi sahun Manchester United wajen neman ɗaukar aron ɗan wasan gaba na Brazil Endrick mai shekara 19 daga Real Madrid a watan Janairu. (Daily Star on Sunday)

   Sai dai kuma Lyon ce ke kan gaba wajen ganin ta ɗauki Endrick, wanda ke da sha'awar tafiya don samun gurbin buga wasanni da kuma inganta damarsa ta shiga tawagar Brazil da za ta buga gasar cin kofin duniya a 2026. (Foot Mercato)

   Napoli ta nuna sha'awarta kan ɗan wasan tsakiya na Manchester United da Ingila Kobbie Mainoo, mai shekara 20, a matsayin aro a watan Janairu. (Mirror)

   Manchester United na shirin kara kaimi wajen neman ɗaukar ɗan wasan tsakiyar Ingila Elliot Anderson, mai shekara 22, daga Nottingham Forest a watan Janairu, amma za ta iya fuskantar hamayya daga Chelsea da Manchester City da kuma Newcastle United. (Caught Offside)

   Wakilan ɗan wasan gaban Ingila Marcus Rashford sun riga sun tattauna da Barcelona game da sharuɗɗan kwantiragi, idan har kulob ɗin na Sifaniya ya yanke shawarar mayar da zaman aron ɗan wasan mai shekara 28 daga Manchester United zuwa na dindindin. (Sport)

10. 2 Nuwamba 2025Har yanzu ina ƙaunar Liverpool - Alexander Arnold

    

    Asalin hoton, Getty Images

    Trent Alexander-Arnold ya ce koda yaushe da kawi kaunar Liverpool a tare da shi, wanda Real Madrid za ta ziyarci Anfield ranar Talata.

    Ana sa ran mai shekara 27, wanda ya warke daga jinya zai buga wasan Champions League da zai fuskanci Liverpool a karon farko tun bayan da ya bar Anfield.

    Kafin fara kakar bana matashin ya bar Liverpool, wanda tun bayan da aka sanar zai koma Real Madrid, sai magoya bayan ƙungiyar suka yi ta masa ihu a duk lokacin da yake taka leda.

    Alexander-Arnold koda zai ci ƙwallo ba zai yi murna ba, kuma zai amince da duk tarbar da magoya bayan Liverpool za su yi masa ko ta lale marhabin ko akasin hakan.

    Ɗan wasan ya fara Liverpool tun daga yana matashi, wanda ya yi kaka tara a ƙungiyar.

11. 2 Nuwamba 2025Nuno Espirito Santo ya ci wasan farko a West Ham

    

    Asalin hoton, Getty Images

    West Ham United ta doke Newcastle 3-1 ranar Lahadi a wasan mako na 10 a Premier League.

    Karon farko da ta ci wasa a gida a gasar tun bayan nasara a kan Leicester City a cikin watan Fabrairu.

    Kuma na farko a bana tun bayan da ta je ta doke Nottingham Forest 3-0 a cikin watan Agustan 2024.

    Wannan shi ne karon farko da kociya, Nuno Espirito Santo ya yi nasara a West Ham, bayan jan ragamar wasa biyar da canjaras ɗaya aka doke shi fafatawa uku, tun bayan da ya karɓi aikin ranar 27 ga watan satumba.

    Nottingham Forest ce ta kori Santo, bayan da ya kai ta gasar zakarun Turai da ta daɗe ba ta halarta ba.

    Da wannan sakamakon West Ham tana mataki na 18 a kasan teburi da tazarar maki bakwai tsakani da Newcastle ta 13 a teburin babbar gasar tamaula ta Ingila.

12. 2 Nuwamba 2025Wa zai maye gurbin Pereira a Wolverhampton?

    

    Asalin hoton, SNS

    Wolverhampton na neman kociya, bayan da ta kori Vitor Pereira ranar Lahadi.

    Wasu rahotannin na cewa Brendan Rodgers yana cikin waɗanda ake tsammani za a iya bai wa aikin horar da ƙungiyar Molineux.

    Brendan ya taɓa cetar Leicester City daga haɗarin faɗuwa daga Premier League daga nan ta koma cikin ƴan shidan farko a gasar.

    Erik Ten Hag, yana zaune ba shi da ƙungiyar da yake jan ragama, tun bayan da Bayer Leverkusen ta kore shi, wanda ya ja ragamar wasa ɗaya tal a bana.

    Ɗan kasar Netherlands ya ƙwan da sanin yadda Premier League take, bayan da ya yi Manchester United da lashe kofi biyu.

    Tsohon ɗan wasan Wolves, Kevin Muscat, wanda ya yi mata karawa 200 tsakanin 1997 zuwa 2002 yana da damar horar da ƙungiyar.

    Ya nuna kansa a gasar Asia daga baya ya yi watsi da tayin da Rangers ta yi masa.

    Haka kuma Sergio Conceicao zai iya aikin, wanda ya horar da Porto da AC Milan, amma yanzu yana jan ragamar Al-Ittihad ta Saudiyya.

13. 2 Nuwamba 2025

    

    Asalin hoton, Getty Images

    Ana tunanin zai zame wa Aston Villa dole na mayar da zaman aron ɗan wasan Ingila Harvey Elliott daga Liverpool zuwa na dindindin idan har dan wasan mai shekara 22 ya buga wasanni 10 a kungiyar ta Midlands. (Independent).

    Ƙungiyar ƙwallon kafa ta Paris FC na zawarcin ɗan wasan tsakiyar ƙasar Faransa N'Golo Kante mai shekara 34, wanda kwantiraginsa da Al-Ittihad zai ƙare a bazara mai zuwa. (Foot Mercato)

    Ɗan wasan gaban Mexico Santiago Gimenez, mai shekara 24, yana da har zuwa kasuwar musayar ƴanwasa ta watan Janairu don gamsar da AC Milan cewa ya cancanci ci gaba da zama a ƙungiyar idan ba haka ba za a sanya shi a kasuwa. (Gazzetta dello Sport)

    Ɗan wasan gaba na Italiya Lorenzo Insigne, mai shekara 34, ya kasance ɗan wasa mai zaman kansa bayan ya bar Toronto FC, amma ya nuna sha'awarsa ta komawa Lazio. (Football Italia)

14. 2 Nuwamba 2025Premier ta Najeriya wasannin mako na 11

    • Barau FC da Wikki Tourists FC
    • El Kanemi Warriors da Enugu Rangers International
    • Enyimba da Kano Pillars
    • Ikorodu City da Kun Khalifat FC
    • Niger Tornadoes da Abia Warriors
    • Rivers United da Nasarawa United
    • Shooting Stars da Katsina United

15. 2 Nuwamba 2025Salah ya ci ƙwallo 250 a Liverpool, ya yi kan-kan-kan Rooney

    

    Asalin hoton, Getty Images

    Mohamed Salah ya ci ƙwallo na 250 a Liverpool a wasan da suka doke Aston Villa a Premier League da yin kan-kan-kan da tarihin da Wayne Rooney keda shi.

    Ɗan kasar Masar shi ne na uku da ya ci ƙwallo 250 a dukkan fafatawa a ƙungiyar, waɗanda ke gabansa sun haɗa da Roger Hunt mai 285 da kuma Ian Rush a 346.

    Daga ciki Salah ya ci ƙwallo 188 a Premier League da guda 88 da ya bayar aka zura a raga tun bayan da ya koma Anfield a 2017, jimilla 276 ya yi kan-kan-kan da tarihin Rooney da ya yi a ƙungiya ɗaya.

    Rooney ya ci ƙwallo 183 a kaka 13 a Manchester United da bayar da 93 aka zura a raga daga karawa 393, yayin da Salah ya yi wasa 298 a Liverpool.

    A kakar 2017/18 ne Salah ya ci ƙwallaye 32, bayan da a bara yana da hannu a cin ƙwallo 47 da cin 29 da bayar da 18 a raga da ta kai Liverpool ta lashe kofin Premier League.

    Haka kuma Salah ya ci ƙwallo biyu da bayar da ɗaya aka zura a raga a Chelsea tun farko, kenan jimilla a ci 279 a Premier League.

    Kenan ya yi kan-kan-kan da Frank Lampard a mataki na uku a tarihin yawan cin ƙwallaye da bayarwa a zura a raga a Premier League.

    Lampard mai 279 jimilla, ya ci 177 da bayar da 102 aka zura a raga a wasa 609 a Chelsea da West Ham da kuma Manchester City.

    Rooney mai ƙwallo 208 ya bayar da 103 aka zura a raga har da karo biyun da ya taka leda a Everton, kenan guda 311 a 491..

    Alan Shearer ne kan gaba a Premier League mai ƙwallo 260 a raga - ya kuma bayar da 64 aka zura a raga, jimilla guda 324 a wasa 441.

    Sauran ƴan wasan da suke da hannu a cin ƙwallo 250 da bayarwa a zura a raga sun haɗa da tsohon ɗan wasan Manchester United, Ryan Giggs mai ƙwallo 109 da bayar da 162 aka zura a raga a karawa 632.

    Sai kuma Andy Cole mai ƙwallo 187 da bayar da 73 aka zura a raga a wasa 414 da kuma Harry Kane mai 213 da bayar da 46 aka zura a raga a fafatawa 320.

16. 2 Nuwamba 2025Wolves ta kori Pereira bayan kasa cin wasa a karawa 10 a Premier

    

    Asalin hoton, Getty Images

    Wolves ta kori kociyanta, Vitor Pereira bayan da ya kasa cin wasa daga karawa 10 da fara Premier League ta kakar nan.

    Ranar Asabar Fulham ta doke Wolves 3-0 a wasan mako na 10 karo na takwas da aka ci ƙungiyar da fara kakar nan, hakan ya sa take ta karshen teburin babbar gasar tamaula ta Ingila.

    Pereira ya karɓi aiki a Disambar 2024, wanda a cikin watan Satumba ya saka hannu kan yarjejeniyar ci gaba da horar ƙungiyar kaka uku.

    Kamar yadda Wolves ta sanar James Collins da Richard Walker, masu horar da matasan ƙungiyar ƴan kasa da 21 da na kasa da shekara 18 za su yi aikin rikon ƙwarya.

    Wolves ta doke West Ham da yin waje da Everton a Carabao Cup daga baya Chelsea ta cire ta a zagayen ƴan 16.

17. 1 Nuwamba 2025Bayern Munich ta ci wasa na 17 a jere da fara kakar bana.

    

    Asalin hoton, Getty Images

    Bayern Munich ta doke Bayer Leverkusen 3-0 ranar Asabar a gasar Bundesliga, kenan ta lashe dukkan wasa 15 da ta fuskanta a dukkan karawa.

    Ƙungiyar da Vincent Kompany ke jan ragama ta fara da doke Stuttgard 2-1 ranar 16 ga watan Agusta daga ciki ta yi nasara biyu a German Cup da cin wasa uku a Champions League.

    Kenan Bayern ta ci gaba da zama ta ɗaya a kan teburin Bundesliga da tazarar maki biyar da RB Leipzig ta biyu, ita kuwa Leverkusen tana ta biyar.

    Ranar Talata Bayarn Munich za ta je Paris St Germain ranar Talata 4 ga watan Nuwamba, ita kuwa Leverkusen za ta je Benfica ranar Laraba.

    Daga nan Bayern Munich ta je Union Berlin a Bundesliga ranar 8 ga watan Nuwamba

18. 1 Nuwamba 2025Vieira ya ajiye aikin kociyan Genoa cikin ruwan sanyi

    

    Asalin hoton, Getty Images

    Patrick Vieira ya ajiye aikin kociyan Genoa, bayan da ƙungiyar ke ta karshe a teburin Serie A.

    A karkashin tsohon ɗan wasan Arsenal, wanda ya karɓi aikin a Nuwambar 2024, Genoa ba ta ci wasa ba ko ɗaya a lik da fara kakar nan.

    Ya karɓi aikin horar da Genoa tana ta 17 a kasan teburin babbar gasar tamaula ta Italiya da cin karawa takwas da canjaras tara daga karawa 26 a bara, hakan ya sa ta kare a mataki na 13 a kan teburi.

    Sai dai ya yi nasara biyu a Coppa Italia da doke shi wasa shida daga tara a Serie A.

19. 1 Nuwamba 2025Pedro ya kawo karshen ƙamfar wasa 10 ba tare da cin ƙwallo ba

    

    Asalin hoton, Getty Images

    Joao Pedro ya kawo karshen ƙamfar wasa 10 ba tare da cin ƙwallo ba a Chelsea, bayan da ya ci Tottenham 1-0 ranar Asabar a wasan mako na 10 a Premier League.

    Da wannan sakamkon Chelsea ta yi sama zuwa mataki na huɗu a teburin Premier da maki 17 iri ɗaya da na Tottenham ta uku da tazarar rarar ƙwallaye.

    Tottenham ta kara rashin kokari, kenan wasa uku ta yi nasara daga 19 da ta buga a gida.

20. 1 Nuwamba 2025Barkanmu da shiga sharhi da bayanan wasanni

    Jama'a barkanmu da shiga shirin sharhi da bayanan wasanni kai tsaye tare da ni Mohammed Abdu Mamman Skipper Tw.

    Za ku iya tafka muhawara a shirin ko bayar da gudunmuwa a BBCHausa Facebook.