Abubuwan da ke faruwa a Najeriya da sauran sassan duniya

Rahoto kai-tsaye

Haruna Ibrahim Kakangi, A'isha Babangida, Umaymah Sani, Ahmed Bawage

1. 24 Yuni 2024Asuba ta gari

   Mun zo karshen rahotanni a wannan shafi na labarin wasanni kai-tsaye.

   Umar Mikail ke cewa mu kwana lafiya.

2. 24 Yuni 2024Manufofin jam’iyyu masu ra’ayin rikau na iya haifar da yaƙin basasa - Macron

   

   Asalin hoton, Reuters

   Shugaban Faransa, Emmanuel Macron, ya yi gargaɗin cewa manufofin yaƙin neman zaɓen jam’iyyu masu tsatsaurar ra’ayin rikau da na masu ra’ayin kawo sauyi na iya haifar da abin da ya kira yaƙin basasa.

   Yayin da yake magana gabanin zagayen farko na zaben 'yan majalisar dokokin Faransa da za a fara a karshen wannan makon, ya ce ɓangarorin biyu na janyo rarrabuwar kawuna a tsakanin al’umma.

   Wannan shi ne karon farko da ake amfani da irin waɗannan kalaman a yakin neman zaɓe na bana wanda hakan ke nuni da irin badakalar da ke tattare da zaɓen da ke gabatowa.

3. 24 Yuni 2024Ƴan sanda sun kama mutum huɗu kan zargin kisan babban hafsan soji a Abuja

   

   Asalin hoton, FCT Police

   Rundunar ‘yansandan Abuja ta ce ta kama wasu mutane huɗu da take zargi da hannu a kisan wani babban hafsan soji wanda ya yi ritaya a gidansa da ke birnin.

   Rundunar ta ce tana kuma neman wasu karin mutane biyu da take zargi a lamarin.

   Hakan na zuwa ne yayin da babban birnin na Najeriya ke ci gaba da fuskantar rashin tsaro da ya hada da sace-sacen mutane domin karbar kudin fansa.

   Kwamishinan ‘yan sandan birnin na Abuja, Beneth Igweh, ya kuma ce sun samu nasarar kam wasu manyan masu garkuwa da mutane da ake nema ruwa jallo da masu taimaka musu.

   Benethya ƙara da cewa wasu ɓata-gari kan aikata laifi a Abuja, sannan su tsere zuwa wasu jihohi, abin da ke janyo wahala wajen kama su.

   Sai dai, ya ce rundunar na shirye wajen tabbatar da ingantaccen tsaro a birnin na Abuja.

4. 24 Yuni 2024Kamfanonin waka a Amurka sun maka AI a kotu kan zargin keta dokokin mallaka

   

   Asalin hoton, Getty Images

   Manyan kamfanonin waka a Amurka guda uku sun maka wasu kamfanonin kirkirariyar basira ta AI guda biyar a kotu, bisa zarginsu da keta dokokin hakkin mallaka.

   Kamfanonin Universal Music Group da Sony Music Entertainment da kuma Warner Records na namen kamfanonin Udio da Suna su biya su diyyar dala 150,000 kan duk wata wakar da suka kwaikwaya.

   Sun ce kamfanonin na satar ayyukan mawaka suna amfani da su wurin samun riba.

5. 24 Yuni 2024Adadin waɗanda suka mutu a hare-haren Dagestan a Rasha ya kai 20

   

   Asalin hoton, TELEGRAM/SERGEI MELIKOV

   Adadin waɗanda suka mutu a hare-haren da aka kai a Jamhuriyar Dagestan da ke kudancin Rasha ya kai mutum ashirin - ciki har da 'yan sanda 15, yayin da mutum ashirin da shida suka jikkata.

   Maharan dai sun afka wa coci-coci da kuma wuraren bautan Yahudawa da ke yankunan Makhachkala da Derbent.

   Masu bincike sun bayyana cewa an kashe maharan guda biyar.

   Tun da farko dai, mai Magana da yawun shugaba Putin, Dmitry Peskov, ya shaida wa manema labarai cewa Mista Putin ya miƙa ta'aziyyarsa ga iyalan duk waɗanda suka mutu a harin makami mai linzami da aka kai a Crimea da kuma Dagestan.

   Ya ce za a ba da duk wani tallafn da ya dace ga dukkan mutanen da lamuran biyu suka shafa, kuma ma'aikatar kiwon lafiya tana bayar da agaji ga waɗanda suka jikkata.

6. 24 Yuni 2024'Ga ni da kuɗi a asusuna, amma burodi ya fi karfina'

7. 24 Yuni 2024Gwamnan Neja bai yi mana adalci ba - Hukumar alhazai

   

   Asalin hoton, NAHCON

   Hukumar aikin Hajji ta 'kasar watau, NAHCON ta mayar da martani kan zargin da gwamnan jihar Neja ya yi mata na rashin shirya ingantaccen aikin Hajji a bana.

   Hukumar ta ce gwamnan bai yi mata adalci ba idan aka yi la’akari da faduwar darajar kudin kasar naira da kuma kasancewarta mai sa ido ce ba mai daukar dawainiyar mahajjata ba.

   Gwamna Umaru Bago ya yi zarge-zargen a Saudiyya, a wani taron manema labarai.

   Mai magana da yawun hukumar, Hajiya Fatima Sanda Usara, ta ce ƙasar Saudiyya ba ta hulɗa da jihohi a kan harkar aikin Hajji, illa ƙasashe kawai.

   'Ba zai yiwu a ce jihar Neja ta je Saudiyya don yin yarjejeniya kan alhazanta ba. Idan gwamnan ya ce a ɗauki ayyukan a mayar da su kan jihohi akwai ayar tambaya a kai," in ji Fatima Sanda.

   Ta ce " Sa ido ne kawai NAHCON ke yi ba ita take kwashe alhazai zuwa Saudiyya ba. Jiragen sama ne ke da alhakin haka.

   Dangane da zargin da gwamnan na Neja ya yi kan yanayin lafiyar mahajjata kuwa, Hajiya Fatima ta ce ba abin da ya haɗa da NAHCON da wannan saboda alhakin ya rataya kan jihohi, inda ta ce haka ne ma yake sa wani lokaci ake samun mata masu ciki da ke tafiya zuwa aikin Hajji.

   "Muna sonmu tunatrawa gwamna Bago cewa hukumomin jihohi ne ke zaɓar waɗanda za su ciyar da alhazansu da kuma irin abincin da suke so ba wai hukumar mu ba, don haka idan suka zauna da yunwa ba laifin mu bane," kamar yadda Fatima Usara ta shaida wa BBC.

   Ta kuma yi watsi da batun cewa NAHCON ta gaza a ayyukanta na gudanar da aikin Hajji.

8. 24 Yuni 2024Sudan ce ta fi yawan ƙananan yara masu gudun hjira a duniya - UNICEF

   Hukumar kula da ƙananan yara ta Majalisar Ɗinkin Duniya ta ce Sudan ce ta fi kowace ƙasa yawan ƙananan yara masu gudun hjira a duniya, yayin da ake ci gaba da gwabza yakin basasa a ƙasar.

   Shugabar UNICEF, Catherine Russell, ta bayyana cewa kusan dukkan yaran Sudan ba su zuwa makaranta.

   Ta ce kimanin miliyan tara ba su samun isasshen abinci akai-akai yayin da miliyan huɗu ke fuskantar matsalar matsananciyar yunwa.

   Ɓangarorin biyu da ke faɗa da juna sun takaita ayyukan agaji a ƙasar, lamarin da ya haifar da matsalar yunwa.

   Duk da mummunar yanayin jin kai da ake fuskanta , yunkurin Amurka na sake farfaɗo da tattaunawar sulhu ya ci tura.

9. 24 Yuni 2024Abubuwa 15 da suka kamata ku sani kan firimiyar Najeriya ta 2023-24

10. 24 Yuni 2024Za a iya ɗaukan shekaru kafin a shawo kan matsalar ƴan bindiga - Sultan

    

    Asalin hoton, DAULAR USMANIYYA

    Mai Alfarma Sarkin Muslmi, Sultan Sa’ad Abubakar III, ya ce za a iya ɗaukar tsawon shekaru kafin a shawo kan matsalar ‘yan bindiga da ta dabai-baye arewa maso yammacin Najeriya.

    Sultan ya faɗi haka ne a taro don inganta yanayin tsaro wanda ake yi a jihar Katsina yau Litinin.

    “Abin da ya kamata mu yi shi ne kalubalantar waɗannan ƴan bindiga saboda mun san irin illar ƴan ta-da-ƙayar baya ga rayuwarmu. Sai dai za a shafe tsawon shekaru kafin a magance matsalar gaba-daya,” in ji Sultan Sa’ad.

    Ya ce sarakunan gargajiya a shirye suke domin haɗa gwiwa da jami’an tsaro da kuma gwamnoni bakwai na yankin domin ceto shi daga ɗimbin matsaloli da yake fuskanta.

    Ya yi imanin cewa a karshen taron, za a samu hanyoyin rage barazanar da ‘yan bindigar ke da shi domin mutane su koma rayuwa ba tare da fargaba ba da kuma gudanar da harkokin kasuwanci.

    Taron ya samu halartar mataimakin shugaban kasa Kashim Shettima, wanda ya wakilci shugaba Bola Tinubu, da tsohon shugaban kasa Muhammadu Buhari, gwamnoni bakwai na jihohi da ke arewa maso yamma, shugabannin hafsoshin tsaro da kuma sufeton ‘yan sanda.

11. 24 Yuni 2024Al’ummar Ogurute Oombe sun miƙa sabon asibiti ga gumaka don samun kariya a Enugu

    

    Asalin hoton, COAL CITY CONNECT/INSTAGRAM

    Al’ummar garin Ogurute Oombe da ke jihar Enugu sun mika sabon asibitin da suka gina ga gumakansu domin samun kariya.

    Wannan shawarar dai ta zo ne biyo bayan yawaitar satar kayan aikin asibitin a lokacin da ake gina shi.

    A wani faifan bidiyo da BBC Igbo ta samu, wakilin al’ummar Ogurute Oombe ya bayyana takaicin mutanen kauyen tare da bayyana irin asarar da aka yi.

    Kayayyakin da aka sace sun hada da motar daukar marasa lafiya da na'urar talabijin da injin samar da wutar lantarki mai amfani da hasken rana, da sauran muhimman kayayyakin aiki da na’urorin da suka dace don gudanar da ayyukan asibitin.

    “Mutanen da suke nan a yau ‘yan asalin garin Ogurute Oombe ne, kuma wannan shi ne babban asibitin Ogurute Oombe da gwamnati ta gina mana,” in ji kakakin.

    “Gwamnati ta kawo mana kayayyakin da za mu yi amfani da su wajen kula da marasa lafiya, sun kawo injinan wutar lantarki mai amfani da hasken rana da motar daukar marasa lafiya da na’urar talabijin, da sauran abubuwa masu kyau da za ku iya tunani a kai."

    Ya ci gaba da cewa, "Amma yanzu babu wanda ya ga waɗannan kayayyakin aikin cikin kankanin lokaci bayan an kawo su, ba mu ji dadin hakan ba."

    Satar da aka yi ba wai kawai ta hana asibitin samun kayan aiki masu mahimmanci ba, har ma da kashe wa al’ummar fatar da suka sa rai da samun ingantattun ayyukan kiwon lafiya.

    Dangane da irin wadannan sace-sacen da ake ta yi ne mutanen ƙauyen suka yanke shawarar neman kariya daga gumakansu da suke bautawa.

12. 24 Yuni 2024Yadda Rangers ta zama gwarzuwar firimiyar Najeriya karo na takwas

    

    Asalin hoton, NPFL

    A ƙarshe dai ƙungiyar ƙwallon ƙafa ta Enugu Rangers ta jinjina kofin babbar gasar firimiyar Najeriya a karo na takwas bayan doke Gombe United har gida da ci 2-1.

    Rangers ta samu jimillar maki 70 a gasar ta Nigeria Professional Footbal League (NPFL) kakar 2023-24, wanda hakan ke nufin ta samu tikitin zuwa gasar zakarun Afirka.

    An gudanar da bikin ba ta kofin ne a filin wasa na Jos International Stadium - inda Gome United ke buga wasa - bayan wasan mako na 38.

    Rangers ce ta fara cin ƙwallo minti uku da take wasa ta hannun Ogunleye, sannan Obaje ya ƙara minti huɗu bayan haka, kafin Hassan ya farke wa Gombe ƙwallo ɗaya a minti na 25.

    Karanta cikakken labarin a nan: Yadda Rangers ta zama gwarzuwar firimiyar Najeriya karo na takwas

    

    Asalin hoton, NPFL

13. 24 Yuni 2024Apple ya saɓa doka a manhajarsa - Tarayyar Turai

    

    Asalin hoton, Getty Images

    Hukumomin Tarayyar Turai sun zargi kamfanin Apple da laifin keta sabbin dokokin da aka tsara don sarrafa manyan kamfanonin fasaha.

    Hukumar ta ce manhajar Apple na murƙushe kasuwannin abokan hamayya, wanda ke zama karo na farko da ya sami kamfani da ke saɓa dokar Kasuwar Dijital (DMA).

    Kamfanin na fuskantar yuwuwar tarar kusan kashi 10 cikin 100 na kuɗaɗen shigar sa na duniya idan ya gaza bin ka'idoji.

    An bai wa kamfanin Apple ɗin damar yin nazari kan sakamakon binciken farko da aka samu, kuma zai iya kaucewa cin tarar idan ya dawo da wata shawara wacce ta gamsar da Tarayyar Turai.

    Kamfanin yana cajin masu haɗa manhajoji kaso 30 akan manhajarsa.

14. 24 Yuni 2024Asalin kwalara da yadda za ku kare kanku daga kamuwa da cutar

    

    Asalin hoton, Getty Images

    Yayin da damuna ke ƙara kankama a Najeriya, Cibiyar Kare Cutuka masu yaduwa ta ƙasar (NCDC) ta ce akwai yiwuwar cutar kwalara ta ci gaba da yaɗuwa tare da yin illa.

    Tuni cutar ta hallaka mutum 30 daga farkon shekarar 2024 zuwa tsakiyar watan Yunin shekara, yayin da aka zargin kimanin mutum 1,141 ne suka kamu a ƙananan hukumomi 96 da ke faɗin ƙasar.

    Tuni jihar Legas da ke kudancin ƙasar ta bayyana ɓarkewar cutar a cikinta.

    Ƙarin bayani - https://bbc.com.im/hausa/articles/c3gggenrlq0o%3C/a%3E%3C/p%3E%3C/div%3E%3C/div%3E%3C/article%3E%3C/li%3E%3Cli class="css-xxlek1">

    24 Yuni 2024'Yan majalisar wakilan Najeriya sun buƙaci Tinubu ya saki Nnamdi Kanu

    

    ‘Yan majalisar wakilan Najeriya 50 sun buƙaci shugaban kasar Bola Tinubu da ya bayar da umarnin a saki jagoran ‘yan awaren ƙasar (IPOB) wato Nnamdi Kanu da ke tsare tun shekarar 2021 bisa zargin ta’addanci.

    Ƴan majalisar sun ce ya kamata a saki Kanu domin nuna adalci da kuma bukatar hana cin zarafin doka", kamar yadda suka shaida wa jaridar Premium Times.

    Yan majalisar sun bukaci shugaban kasa Bola Tinubu da ya saki Kanu, inda suka yi nuni da cewa sakin nasa zai “karawa masu ruwa da tsaki daga yankin kudu maso gabas kwarin guiwa da su kara kaimi wajen tattaunawa ta kasa kan sabon ajandar fatan da za a samu, ta yadda za a samar da hadin kai da magance korafe-korafen da aka dade ana yi.

    ‘Tun a shekarar 2021 kungiyar IPOB ta fara gudanar da zanga-zanga a yankin kudu maso gabashin Najeriya na neman gwamnati ta saki Kanu, lamarin da ya janyo hasarar rayuka da hargitsin kasuwanci.

    Kungiyar dai na neman kafa kasa mai cin gashin kanta a yankin kudu maso gabashin Najeriya, inda ta zargi gwamnatin tarayya da mayar da kabilar Igbo saniyar ware a fannin tattalin arziki.

    Yunkurin samar da ƙasa mai cin gashin kanta a baya a kudu maso gabas ya haifar da yakin basasa na shekaru uku wanda ya kawo karshe a shekarar 1970.

15. 24 Yuni 2024Ƴansanda sun kori ƴandaba da mafarauta daga fadar Kano

    

    Asalin hoton, Sani Maikatanga

    Rundunar ƴansanda a jihar Kano da ke arewacin Najeriya ta kori ƴandaba daga fadar sarkin Kano domin daƙile ayyukan dabanci a jihar.

    Ƴandaba da mafarauta ne suka kasance suna gadin fadar, wadda Sarki Muhammadu Sanusi II ke zaune a cikin ta yanzu.

    Wata majiyar jami’an tsaro ta sanar da PRNigeria cewa matakin ‘yan sandan ya biyo bayan rahotannin sirri da aka samu na kwararowar ƴandaba da ƴantauri wato mafarauta daga ƙananan hukumomi zuwa birnin.

    Yanzu haka dai ƴansanda sun karbe iko da fadar ta Gidan Rumfa da ta Nasarawa, inda aka tura jami’ai zuwa wuraren da ke da rauni domin tabbatar da doka da oda.

    Yayin da Muhammdu Sanusi II ke ci gaba da zama a Gidan Rumfa, sarkin Kano na 15, Aminu Ado Bayero na zaune ne a fadar sarkin Kano da ke Nasarawa.

    A kwanakin baya ne wata kotu da ke Kano ta ce duk wasu matakai da gwamnan jihar ya ɗauka bayan umarnin da ta bayar na kowa ya tsaya kan matsayinsa ya saɓa wa doka kuma haramtacce ne.

    Sai dai har yanzu ana ci gaba da taƙaddama kan sake naɗain na Muhammadu Sanusi II da kuma tuɓe rawanin Aminu Ado Bayero a kotu.

16. 24 Yuni 2024An ƙaddamar da taro kan rashin tsaro a Najeriya

    

    Gwamnonin arewa maso yammacin Najeriya na taro kan inganta tsaro a Katsina.

    Hukumar raya ƙasashe ta MDD ke shirya taron wanda ake fatan fito da hanyoyin da za a kawo karshen matsalar tsaro a yankin.

    Cikin masu halartar taron har da mataimakin shugaban kasa Khashim Shatima da manyan jami'an tsaro da tsohon shugaban Najeriya Muhammadu Buhari

    Taron na kwana biyu na da nufin inganta tsaro a yankin arewa maso yammacin Najeriya kuma zai mayar da hankali ne, wajen samun hadin gwiwar gwamnatocin yankin don tsare al’umma da sana’o’i.

17. 24 Yuni 2024Ana yi mana zagon ƙasa a harkar man fetur - Dangote

    

    Asalin hoton, Getty Images

    Wani babban jami’in kamfanin man fetur na Dangote ya yi zargin cewa waɗansu manyan kamfanonin man fetur na ƙasashen waje na haifar da tarnaƙi wajen hana shi samun ɗanyen mai a cikin Najeriya.

    A cewarsa, hakan ya tilasta wa kamfanin Dangote dogaro da ɗanyen man fetur mai tsada daga ƙasashen waje.

    Kamfanin man fetur na Dangote da aka kashe dala biliyan 20 ya soma aiki ne tun a cikin watan Junairu amma ya kasa cimma burinsa na tace mai ganga dubu 650 a kullum.

    Dangote na shigo da ɗanyen mai jirgin ruwa (kago) 10 a duk wata kamar yadda waɗansu takardun ciniki suka nuna.

    Ko dai manyan kamfanonin suna neman a biya su farashin da suka wuce kima ko kuma su ce ba su da man, in ji Devakumar Edwin, babban jami’in kamfanin man fetur na Dangote.

    Ya ƙara da cewa kamfaninsu ya biya dala shida fiye da farashin da ake sayar da mai a kasuwar mai na duniya kuma a yanzu suna dogara ne da ɗanyen man da suke sayowa daga Amurka.

    Edwin ya ƙara da cewa Najeriya ta bar kamfanonin da ke shigo da man fetur daga kasashen wajen wanda bai da inganci, a don haka a yanzu Dangote ya mayar da hankali waje sayar da tattacen mai a kasashen waje.

18. 24 Yuni 2024Ƙazamin faɗa a Rafah yana dab da kawo ƙarshe - Netanyahu

    

    Asalin hoton, Getty Images

    Firaministan Isra'ila Benjamin Netanyahu ya sanar da cewa an kusa kawo karshen yakin da ake yi a Rafah da ke kudancin Gaza amma ya jaddada cewa za a ci gaba da yakin har sai an kawar da Hamas.

    Ya kuma bayyana shirin sake tura dakaru zuwa kan iyakar ƙasar Lebanon, inda ake ƙara samun fafatawa da kungiyar Hezbollah.

    Netanyahu ya kuma yi watsi da ra'ayin cewa ya kamata hukumar Falasɗinawa mai hedkwata a gaɓar yammacin kogin Jordan ta mallaki Gaza a madadin Hamas.

    A halin da ake ciki kuma mazauna Rafah sun bayar da rahoton cewa ana ci gaba da gwabza fada, kuma an ce hare-haren da Isra'ila ta kai a birnin Gaza ya kashe daraktan agajin gaggawa na ma'aikatar lafiya.

    An kuma kai hari wata cibiyar rarraba kayan agaji da dakarun sojin Israila suke zargin Hamas na amfani da ita.

    Ministan tsaron Isra'ila Yoav Gallant zai fara ziyara a birnin Washington domin tattauna rikicin Gaza da kuma tashin hankalin da ake fuskanta sakamakon ƙungiyar Hezbollah.

    Rikicin ya fara ne bayan harin da Hamas ta kai a kudancin Isra'ila a ranar 7 ga watan Oktoba, wanda ya yi sanadin mutuwar ƴan Isra'ila kimanin 1,200 tare da yin garkuwa da 251.

    Tun daga wannan lokacin, sama da mutum 37,551 ne aka kashe a Gaza, a cewar ma'aikatar lafiya ta Hamas, ciki har da yara 14,680 da mata da tsofaffi.

19. 24 Yuni 2024Aƙalla mutum 16 sun mutu a wata gobara a Koriya ta Kudu

    

    Asalin hoton, YONHAP/EPA-EFE/REX/Shutterstock

    Aƙalla mutum goma sha shida ne suka mutu, wasu da dama kuma sun bace bayan da wata babbar gobara ta tashi a wata masana'antar batirin lithium da ke kusa da Seoul babban birnin ƙasar Koriya ta Kudu.

    Ana fargabar cewa adadin waɗanda suka mutu na iya ƙaruwa yayin da ake ci gaba da aikin ceto.

    Hukumar kashe gobara ta Koriya ta Kudu ta ce a yanzu an shawo kan gobarar, kuma tana mai da hankali kan ƙokarin ceto waɗanda suka makale a cikin masana'antar.

    Batura lithium suna da saurin kama wa da wuta.

    Sama da batura dubu talatin da biyar ne aka ruwaito an ajiye su a cikin ginin.

    Har yanzu dai ba a san musabbabin tashin gobarar ba.

    Koriya ta Kudu dai ta kasance muhimmiyar mai ƙera batura gami da waɗanda ake amfani da su a cikin motocin lantarki.