Abubuwan da ke faruwa a Najeriya da sauran sassan duniya

Rahoto kai-tsaye

Daga Haruna Kakangi da Aisha Babangida

1. 19 Yuni 2025Bidiyon ɓarnar da harin Iran ya yi wa ciki da wajen asibitin Isra'ila a Beersheba

2. 19 Yuni 2025Isra'ilawa na ɗaga ɓaraguzai don neman waɗanda suka maƙale bayan harin Iran

   Hukumomin Isra’ila sun ce mutum uku sun jikkata sosai sakamakon harin makami mai linzami da Iran ta harba zuwa yankin a baya-bayan nan.

   Harin ya lalata gine-gine ciki harda asibitin Soroka na Isra'ila, lamarin da ya sa Isra'ilawa da ƴan sanda da ma'aikatan ceto ke ɗaga ɓaraguzai don neman waɗanda suka maƙale bayan harin na Iran

   Wani mutum, wanda harin da makamai masu linzami da Iran ta kai ya rushe masa ɗaki ya samu ya tsere.

3. 19 Yuni 2025Wane bom mai ƙarfi na Amurka ne zai iya lalata rumbunan nukiliyar Iran?

   Daga cikin makaman da za a iya harbawa su keta ƙarƙashin ƙasa har su iso wurin da rumbunan ajiyar sinadaran nukiliyar Iran suke, daya ne kawai ba a yi amfani da shi ba zuwa yanzu, kuma Isra'ila ba ta da shi a yanzu.

   Makamin shi ne GBU-57A/B - wanda ya kasance bom marar nukiliya mafi ƙarfi a duniya - da zai iya lalata rumbunan ajiyar sinadaran ƙera makamin nukiliya, kuma Amurka ce kadai ta mallake shi a duniya.

   Wannan tsararren makami mai nauyin kilogiram 13,600 zai iya ketawa ƙarƙashin ƙasa domin wargaza rumbunan sinadaran ƙera nukiliyar Iran da ke binne can ƙarƙashin duwatsu.

   Zuwa yanzu Amurka ba ta bai wa Isra'ila makamain ba.

   To amma shi wannan makami ya yake, mene ne kuma ƙalubalen amfani da shi.

   Karanta cikakken labarin - https://bbc.com.im/hausa/articles/cly2zz221gyo%3C/a%3E%3C/p%3E%3C/div%3E%3C/div%3E%3C/article%3E%3C/li%3E%3Cli class="css-xxlek1">

   19 Yuni 2025DR Congo da Rwanda sun cimma yarjejeniyar zaman lafiya

   Jamhuriyar Dimokuraɗiyyar Kongo (DRC) da ƙasar Rwanda sun amince da yarjejeniyar zaman lafiya da nufin kawo ƙarshen rikicin da ke ci gaba da ɗaukar hankula a gabashin DRC, wanda ke da arzikin ma’adinai.

   Ministocin harkokin wajen ƙasashen biyu ne za su rattaba hannu a yarjejeniyar wadda Amurka ta shiga tsakani don warware rikicin, a mako mai zuwa, ranar 27 ga Yuni.

   Yarjejeniyar na da nufin a ƙwace makaman mayaƙa, da kuma dawo da damar agajin jin ƙai ga al’umma a yankin da rikicin ya addaba.

   Yarjejeniyar ta ƙunshi sharuɗɗa masu muhimmanci kamar girmama cikakken ikon ƙasa da iyakokin juna da haramta ci gaba da faɗa da Janyewar mayaƙa daga yankunan da suka mamaye da ƙwace makamai da kuma taimakawa wajen dawo da ‘yan gudun hijira da waɗanda rikicin ya raba da muhallansu

   Tun farkon shekarar nan ne mayaƙan M23 suka ƙwace manyan birane biyu mafi muhimmanci a gabashin DR Congo.

   DR Congo ta zargi Rwanda da bayar da tallafi da makamai ga mayaƙan, amma Rwanda ta musanta hakan.

4. 19 Yuni 2025Hotunan ɓarnar da harin Iran kan Isra'ila ta haddasa

   Ba asibitin Soroka na Isra'ila kaɗai harin Iran ya lalata ba, akwai wasu wurare da dama a Isra’ila da suka lalace sakamakon harin Iran.

   Ga wasu hotuna daga wurin da harin ya faru a Ramat Gan, yankin da ke kusa da Tel Aviv.

   Ma’aikatan jinya har yanzu na ci gaba da aiki a wurin, yayin da hukumomin agajin gaggawa na Isra’ila suka tabbatar da cewa fiye da mutum 30 ne suka jikkata.

5. 19 Yuni 2025Harin Iran ya lalata wani asibiti a Isra'ila

   Wani jami’in soja na Isra’ila ya ce Iran ta harba ɗaruruwan makamai masu linzami zuwa Isra’ila, inda suka faɗa a wani asibitin Soroka da ke Beersheba a kudancin Isra’ila da kuma wasu yankunan fararen hula.

   Mai magana da yawun asibitin Soroka ya tabbatar da cewa fiye da mutum 30 sun jikkata a harin, kamar yadda kamfanin dillancin labarai na AP da wasu kafafen yaɗa labarai na cikin gida suka ruwaito.

   Likitocin agajin gaggawa a Isra’ila sun ce suna jinyar aƙalla Isra'ilawa 32 da suka jikkata a harin a cewar hukumar agaji ta gaggawa ta Isra’ila.

   A halin da ake ciki kuma, Isra’ila na ci gaba da kai hare-hare kan sansanonin soja a Iran.

   Dakarun tsaron Isra’ila (IDF) sun bayyana cewa sun kai hare-hare kan wurare fiye da 20 na soja a birnin Tehran jiya.

   Kafofin watsa labarai na Iran sun ce Isra’ila ta kai hari kusa da wani wuri mai alaƙa da shirin nukiliyar Iran da ke Khondab.

   Wannan na zuwa ne bayan rahotannin da ke cewa Donald Trump ya amince da shirin kai hari kan Iran, sai dai har yanzu bai yanke shawarar aiwatar da shi ba.

6. 19 Yuni 2025Assalamu Alaikum

   Barkanmu da sake saduwa a shafin labarai kai-tsaye na BBC Hausa a hantsin Alhamis.

   Shafin na yau zai fi mayar da hankali ne kan abubuwan da ke faruwa a Najeriya da maƙwabtanta, da kuma sauran sassa na duniya.

   Za ku iya leƙawa shafukan sada zumuntanmu na intanet, da facebook da X da kuma whatsapp domin karanta sauran labarai da kallon bidiyo.

   Ku kasance da mu.