Labaran wasannin BBC Hausa kai-tsaye daga 2 zuwa 8 ga watan Agustan 2025

Rahoto kai-tsaye

Mohammed Abdu, Abdulrazzaq Kumo, da Umar Mikail

1. 3 Agusta 2025Man United ta saka Hojlund a kasuwa kan fam miliyan 30

   Manchester United ta saka Rasmus Hojlund a kasuwa kan farashin fam miliyan 30 ga duk ƙungiyar dake son sayen ɗan wasan.

   Ɗan wasan tawagar Denmark ya ci ƙwallo biyu a wasan da United ta kara da Bournemouth a Chicago ranar Laraba.

   United na fatan sayen ɗan wasan RB Leipzig, Benjamin Sesko, wanda Newcastle United itama ke son ɗauka.

   An kuma samu labarin cewar Sesco na son komawa Old Trafford da taka leda.

   Sai dai koda United za ta sayi Sesco ya zama wajibi ta sayar da wasu ƴan wasanta, domin kashe kuɗi daidai samu, wato financial fair play.

   Idan har United ta sayar da Hojlung kan fam miliyan 30 kenan ta faɗi kasuwanci, bayan da darajarsa ta kai fam miliyan 43, wanda yake da sauran yarjejeniyar kaka biyu a Old Trafford.

   Kawo yanzu United ta kashe fam miliyan 130 a bana wajen sayen Bryan Mbeumo da kuma Matheus Cunha.

2. 2 Agusta 2025Wolves ta ɗauki ɗan tawagar Norway, David Moller Wolfe

   Wolverhampton ta kamma ɗaukar ɗan wasan tawagar NorwayDavid Moller Wolfe kan yarjejeniyar kaka biyar kan fam miliyan 10 daga AZ Alkmaar.

   Mai shekara 23, ya zama na uku da koci, Vitor Pereira ya ɗauka a bana, bayan Jhon Arias da kuma Fer Lopez.

   Wolfe ya buga wa Norway karawa 12, zai kuma taka leda a ƙungiyar dake buga gasar Premier League tare da takwaransa, Jorgen Strand Larsen a filin wasa na Molineux daga kakar bana da za a fara a cikin watan nan.

   Watakila Wolfe ya fara buga wa Wolves wasa a karawar da za ta yi da Celta Vigo ranar Asabar 9 ga watan Agusta.

3. 2 Agusta 2025

   West Ham ta gabatar da tayin yuro miliyan 8 kan ɗan mai tsaron raga a Botafogo da Brazil, John Victor mai shekara 29, yayinda Galatasaray da Everton da Manchester United kowanne ya nuna zawarci a baya. (Fabrizio Romano)

   Atalanta ta yi watsi da tayin fam miliyan 36.5 kan ɗan wasanta na Najeriya daga Inter milan Ademola Lookman mai shekara 27, inda ta bukaci fam miliyan 43.5. (Fabrizio Romano)

   Middlesbrough ta amince da yarjejeniyar £3.5m kan ɗan wasan Blackburn Callum Brittain, mai shekara 27. (Sky Sports)

4. 2 Agusta 2025An kara kuɗin ladan lashe CHAN da kaso 75 cikin 100

   Duk tawagar da ta lashe gasar cin kofin Afirka ta ƴan wasan dake taka leda a gida Chan za ta karɓi ladan dalar Amurka miliyan 3.5, an samu karin kaso 75 cikin 100 daga wadda aka gudanar a baya, jimilla hukumar ƙwallon kafar Afirka za ta kashe dalar Amurka miliyan 10.4 karin kaso 32 cikin 100 kenan.

   Za a fara da wasan buɗe labulen gasar tsakanin Tanzania da Burkina Faso ranar Asabar 2 ga watan Agusta a Dar es Salaam .

   A wannan karo za a buga gasar a kasashe uku a Tanzania da Kenya da kuma Uganda.

   Za kuma a kece raini a biranen da ya haɗa da Dar es Salaam da Zanzibar da Kampala da kuma Nairobi daga 2 zuwa 30 ga watan Agusta, inda za a yi karawar karshe a Moi International Sports Centre, Nairobi.

   Tuni aka raba tawagogin zuwa rukuni huɗu har da mai rike da kofin Senegal da wadda take da shi karo biyu Morocco da Jamhuriyar Congo da fitattu a taka leda a Afirka wato Najeriya da Algeria da kuma Zambia.

   Jamhuriyar Afirka ta tsakiya za ta buga gasar a karon farko, tana rukuni na biyu da ya ƙunshi mai masaukin baƙ, Tanzania da Madagascar da Mauritania da kuma Burkina Faso.

   Akwai wasannin hamayya da za a buga a rukuni na uku da ya haɗa da mai masaukin baƙi, Uganda da Algeria da Guinea da Afirka ta Kudu da kuma Niger.

   Rukuni na huɗu ya kunshi tawaga huɗu daga ciki da suka haɗa da Senegal da Najeriya da Congo da kuma Sudan.

   Za a buga wasan neman mataki na uku a Kampala a Uganda ranar Juma'a 29 ga watan Agusta, kwana ɗaya tsakani a buga wasan karshe a Nairobi a Kenya.

   Rukunin gasar CHAN:Rukunin farko: Kenya, Morocco, Angola, DR Congo, ZambiaRukuni na biyu: Tanzania, Madagascar, Mauritania, Burkina Faso, Central African RepublicRukuni na uku: Uganda, Niger, Guinea, Algeria, South AfricaRukuni na huɗu: Senegal, Congo, Sudan, Nigeria

5. 2 Agusta 2025Golan Ingila, Ramsdale ya koma Newcastle United

   Mai tsaron ragar tawagar Ingila, Aaron Ramsdale ya ce Eddie Howe ya taka rawar gani da ta kai ya zaɓi ya koma Newcastle United.

   Mai shekara 27 zai buga wasannin aro zuwa karshen kakar bana daga Southampton.

   Howe ya sayi Ramsdale daga Sheffield United a 2017 kan fam 800,000 lokacin da ya kociyan Bournemouth.

   Newcastle ta mayar da hankali ne wajen ƙulla yarjejeniyar ɗaukar Ramsdale bayan da Manchester City ta ɗauki James Trafford daga Burnley, wanda tun farko suka yi niyar yin zawarci.

   Shi ne na uku da Newcastle ta ɗauka a bana da ya haɗa da Anthony Elanga daga Nottingham Forest da kuma Antonio Cordero daga Malaga.

   Ranar Juma'a Newcastle ta ƙi sallama tayin fam miliyan 110 daga Liverpool domin sayar da Alexander Isak.

   Ƙungiyar dake fatan ci gaba da aiki da ɗan kasar Sweden, za ta sayar da shi ne idan ƙungiyar Anfield za ta biya fam miliyan 150.

6. 2 Agusta 2025

   Tottenham da Manchester United da Newcastle na sa ido kan ɗan wasan gaba a Paris St-Germain, Randal Kolo Muani mai shekara 26, bayan fuskantar jinkiri a tafiyarsa Juventus. (Le Parisien - in French)

   Ɗan wasan gefe a Manchester United daga Argentine, Alejandro Garnacho mai shekara 21, na son tafiya Chelsea a kokarin da ya ke na barin Old Trafford. (Fabrizio Romano)

   Chelsea na zawarcin ɗan wasan gaba a RB Leipzig, Xavi Simons mai shekara 22, yayin da ƙungiyar ke kafa-kafa kan musayar 'yan wasanta. (Sun)

   Valencia na gab da cimma yarjejeniya da ɗan wasan tsakiya a Sifaniya, Javi Guerra, mai shekara 22, wanda ke jan hankalin Manchester United da AC Milan. (Marca - in Spanish)

7. 2 Agusta 2025Mcllroy ba zai buga wasan cike gurbi a PGA Tour ba

   Rory McIlroy ba zai buga wasannin cike gurbi ba a PGA Tour da za a fara a makon gobe.

   Zakaran Masters ba sunansa da aka fitar a ranar Juma'a domin fafatawa a gasar da za a yi ta FedEx St Jude Championship da za a buga a Memphis.

   Rabon da ɗan kasar Ireland ta Arewa ya buga ƙwallon tennis tun bayan Open Championship da aka yi a Royal Portrush a watan jiya.

8. 2 Agusta 2025Burnley tana cinikin ɗan wasan Chelsea, Broja

   Burnley tana tattaunawa da Chelsea domin a sayar mata da Armando Broja.

   Tuni aka cimma matsala kan yarjejeniyar kaka biyar, amma har yanzu Chelsea ba ta bai wa mai shekara 23 ya je ya rattaba hannu kan kwantiragi ba.

   Amma dai ana sa ran sai a makon gobe Broja zai kammala komai ya zama mallakin ƙungiyar Turf Moor.

   Har yanzu ba a fayyace kuɗin cinikin ba, amma ana cewa ya kai fam miliyan 20.

   Broja ya je Chelsea tun daga makarantar horar da tamaula a 2009 ya kuma sa hannu kan yarjejeniya a 2020.

   Ya buga wasa 38 a babbar ƙungiyar Chelsea, bayan da ya kammala wasannin aro Vitesse da Southampton da Fulham da kuma Everton.

   Ya fara ci wa Chelsea cikin Oktoban 2022 daga ya sha jinya, bayan raunin da ya ji a wasan sada zumunta da Aston Villa.

   Waɗan ne ƴanwasan Chelsea ta sayar a bana?

   • Noni Madueke to Arsenal – £48.5m
   • Joao Felix to Al-Nassr – up to £43.7m
   • Djordje Petrovic to Bournemouth – £25m
   • Bashir Humphreys to Burnley – undisclosed
   • Kepa Arrizabalaga to Arsenal – £5m
   • Marcus Bettinelli to Manchester City – undisclosed

9. 2 Agusta 2025Anisimova ta fitar da Raducanu daga Canadian Open

   Amanda Anisimova ta yi waje da Emma Raducanu a Canadian Open a wasan zagaye na uku.

   Ta yi nasarar kai wa zagayen gaba da cin 6-2 6-1.

   Ƴar kasar Amurka ta yi nasara ta 14 daga karawa 17 - fiye da kowacce a wasa a tsakanin wasannin - kuma ta yi nasara ta 50 a WTA 1000.

   Kenan za ta fuskanci Elina Svitolina a zagaye na huɗu, yayin da ƴar kasar Ukraine ta yi waje da Anna Kalinskaya da cin 6-1 6-1.

10. 2 Agusta 2025

    Lyon na tattaunawa da Liverpool kan yiwuwar cimma yarjejeniya da ɗan wasan tsakiya, Tyler Morton mai shekara 22. (Sky Sports)

    Manchester City a shirye take ta sayar da ɗan wasan tsakiya Jack Grealish mai shekara 29 da James McAtee mai shekara 22, da Kalvin Phillips mai shekara 29, da kuma mai tsaron raga a Jamus Stefan Ortega, mai shekara 32, idan ta samu tayi mai kwaɓi a bana. (Athletic - subscription required)

    Ɗan wasan baya AZ Alkmaar David Moller Wolfe, mai shekara 23 zai je Ingila domin a duba lafiyarsa a Wolves, kan yarjejeniyar fam miliyan 12 da ƙungiyar. (Sky Sports)

    Ɗan wasan baya a Inter Milan Yann Bisseck mai shekara 24, ya yi watsi da tayin Crystal Palace kan fam miliyan 28. (Gazzetta dello Sport - in Italian)

11. 2 Agusta 2025West Ham za ta ɗauki Wilson tsohon ɗan wasan Newcastle

    West Ham ta amince za ta ɗauki tsohon ɗan wasan Newcastle da Bournemouth, Callum Wilson kan yarjejeniyar zuwa karshen kakar bana.

    Wilcon, wanda ya buga wa Ingila wasa daga 2018 zuwa 2023 ya ci ƙwallo 49 a wasa 130 a Newcastle, wanda bai amince ya tsawaita yarjejeniyarsa ba.

    Mai shekara 33 ya buga wasa 18 a Premier League a kakar da ta wuce, wanda aka fara karawa da shi karo biyu daga ciki, wanda ya yi fama da jinya.

    Ya samu ƙungiyoyin Premier da yawa da suka so ɗaukar shi da wasu dake buga gasar tamaula ta Amurka.

    Tuni dai West Ham ta ɗauki ƴan wasa da yawa a bana daga ciki har da Jean-Clair Todibo da El Hadji Malick Diouf da Kyle Walker-Peters da kuma Daniel Cummings tana kuma son sayen ɗan ƙwallon Aston Villa, Jacob Ramsey.

12. 2 Agusta 2025Bekouassa ne zai busa CHAN tsakanin Tanzania da Burkina Faso

    Alkalin wasa daga Algeriya, Lotfi Bekouassa shi ne zai fara busa wasan farko a CHAN ranar Asabar 2 ga watan Agusta tsakanin mai masaukin baƙi, Tanzania da Burkina Faso.

    Za a buɗe labulen gasar a filin wasa na Benjamin Mkapa da ke Dar es Salaam a Tanzania,

    Karo na takwas da za a gudanar da gasar cin kofin Afirka ta ƴanwasan dake taka leda a gida, kuma karon farko da kasa uku suka yi haɗakar shirya wasannin da ya haɗa da Kenya da Tanzania da kuma Uganda.

    Bekouassa, mai shekara 33 ya fara alkalancin tamaula ranar 15 ga watan Maris 2014, kuma yana da lasisin Fifa tun daga 2016.

    Wasan da za a buga tsakanin Tanzania da Burkina Faso zai ja hankalin masu bibiyar ƙwallon kafa, inda mai masaukin baƙi za ta yi fatan yin abin kirki a wasan farko a cikin rukuni.

    Za a buga gasar ce tsakanin tawagar 19.

13. 2 Agusta 2025Mbeumo zai fara buga wa Man United wasa

    Bryan Mbeumo zai fara buga wa Manchester United wasan farko a karawar da za ta yi da Everton a Atlanta ranar Asabar.

    Sai dai ƙungiyar ba ta da tabbas kan kokarin sayen ɗan wasan RB Leipzig, Benjamin Sesko.

    United ta kashe kuɗi sama da fam miliyan 130 wajen sayen ƴan wasa tare da Matheus Cunha da Mbeumo, wanda har yanzu bai fara yi mata tamaula ba.

    Koci, Ruben Amorim ya yi karin haske kan mai tsaron raga, Andre Onana da cewar zai ci gaba da zama golan United a sawun gaba a kakar da za a fara a cikin watan Agusta.

    Onana, wanda ke jinya ana sa ran zai fara yi wa United wasa a karawa da Fiorentina ranar 9 ga watan Agusta, wato ƙungiyar da David de Gea ke tsarewa raga.

14. 2 Agusta 2025Son zai bar Tottenham, bayan kaka 10 a ƙungiyar

    Ƙyaftin ɗin Tottenham, Son Heung-min ya ce zai bar ƙungiyar, bayan kaka 10 yana taka mata leda.

    Ɗan wasan tawagar Koriya ta Kudu ya koma Tottenham daga Bayer Leverkusen a 2015, kawo yanzu ya ci mata ƙwallo 173 a karawa 454.

    Shi ne ƙyaftin lokacin da Tottenham ta doke Manchester United ta lashe Europa League cikin watan Mayu, babban kofin da ta ɗauka a karon farko bayan shekara 17 a tarihi.

    Son mai shekara 33 yana da sauran yarjejeniya da Tottenham da za ta kare a karshen kakar 2026, yanzu yana tattaunawa da Los Angeles mai buga babbar gasar tamaula ta Amurka, domin ya koma can da taka leda.

    Tottenham tana buga wasannin sada zumunta domin tunkarar kakar bana.

    Tottenham za ta kara da Paris St-Germain a Uefa Super Cup ranar 13 ga watan Agusdta.

    Sai dai Son zai iya barin ƙungiyar da zarar komai kammala.

15. 2 Agusta 2025Barka da zuwa!

    Barka da zuwa shafinmu na labaran wasanni kai-tsaye na BBC Hausa daga ranar 2 zuwa 8 ga watan Agustan 2025.