Abubuwan da ke faruwa a Najeriya da sauran sassan duniya 25/07/2024

Rahoto kai-tsaye

Daga Abdullahi Bello Diginza da Haruna Kakangi

1. 25 Yuli 2024Trump ya soki Kamala Harris a dandalin yaƙin neman zaɓe

   

   Asalin hoton, Getty Images

   Donald Trump ya soki Kamala Harris a yaƙin neman zaɓensa na farko tun bayan da ta zama ƴar takarar da ake kyautata zaton za ta yi wa jam'iyar Democrat takara a zaɓen shugaban ƙasar da za a yi a watan Nuwamba.

   Yayin da yake jawabi ga dandazon magoya bayansa a jihar California, ɗan takarar jam'iyar Republican ɗin, ya kira abokiyar hamayyar tasa da mataimakiyar shugaban ƙasar Amurka mafi rashin cancanta a tarihi.

   Ya kuma soki manufofinta na ƴancin zubar da ciki da kuma haƙƙin mallakar bindiga, ya kuma ce ta gaza a ɓangaren baƙin haure.

   Ya ce Kamala Harris ta kasance a matsayin jigon bala'o'in da Biden ya haddasa.

2. 25 Yuli 2024Jirgin dakon mai ya nutse a Philippines

   

   Asalin hoton, AFP

   Wani jirgin dakon mai, ɗauke da kusan lita miliyan ɗaya da rabi ya nutse a ƙasar Philippines.

   Masu bayar da agajin gaggawa na ci gaba da ƙoƙarin dakatar da malalar man.

   Hukumomin ƙasar sun ce malalar man ta kai tsawon kilomita huɗu, yayin da aka samu nasarar ceto mutum 16 daga cikin ma'aikata 17 da ke cikin jirgin.

   Iska mai ƙarfi da ake yi a ƙasar na kawo tsaiko ga aikin ceton.

   Kawo yanzu dai ba a gano dalilin nutsewar jirgin ba.

3. 25 Yuli 2024Assalamu alaikum

   Masu bin shafin BBC Hausa kai-tsaye barkanmu da safiya fatan kun wayi gari lafiya.

   Abdullahi Bello Diginza ke fatan kasancewa da ku a wannans safiya, domin kawo muku halin da duniya ke ciki.

   Kuna iya tafka muhawara kan labaran da muke wallafa wa a shafukanmu na sada zumunta.