Abubuwan da ke faruwa a Najeriya da sauran sassan duniya 11/09/2025.

Rahoto kai-tsaye

Daga Usman Minjibir, Aisha Babangida da Badamasi Mukhtar

1. 11 Satumba 2025Ghana ta amince ta karɓi ƴan Afirika ta yamma da za a kora daga Amurka

   

   Asalin hoton, Getty Images

   Ghana ta zama kasa ta baya-bayan nan da ta karbi mutanen da aka kora daga Amurka a wani bangare na yaki da kwararar baƙin haure da ba su da takardun izini.

   Shugaba John Dramani Mahama, ya ce a yanzu ana iya karbar 'yan kasar daga kasashen yammacin Afirka daban-daban, inda ya ce goma sha hudu sun riga sun iso.

   A watan da ya gabata ne Amurka ta kori bakin haure bakwai zuwa Rwanda. A watan Yuli, an aika biyar zuwa Eswatini, wasu takwas kuma zuwa Sudan ta Kudu.

   Ministocin Ghana biyu sun rasu a hatsarin jirgin sama

   Ɗanjaridar Ghana Godwin Asediba ya lashe gasar BBC ta Komla Dumor 2025

2. 11 Satumba 2025Koriya ta Kudu ta yi gargadin tasirin tsare ƴan ƙasarta a Amurka kan zuba jari

   

   Asalin hoton, Getty Images

   Koriya ta Kudu ta yi gargadin cewa tsare ɗaruruwan 'yan kasarta a jihar Jojiya ta Amurka ka iya yin wani babban tasiri ga zuba jari a ƙasar nan gaba.

   A wani taron manema labarai a birnin Seoul shugaban ƙasar Lee Jae Myung ya ce kamen bakin haure yan kasarsa a makon da ya gabata a wata masana'antar (Handai) Hyundai da L-G ya yi matukar kidima su.

   Ya ce hakan na iya sa wa yan kasuwar Koriya ta Kudu su yi shakkar zuba jari a Amurka.

   An aika da jirgin sama zuwa Atlanta don maido da ma'aikatan.

   Jam'iyya mai mulki ta ce shugaban Koriya ta Kudu zai yi murabus

   Dalilai uku da suka sa Vladimir Putin ke ziyartar Kim Jong Un

3. 11 Satumba 2025Qatar ta yi wa Netanyahu kakkausan martani kan kai sabbin hare-hare

   

   Asalin hoton, Reuters

   Qatar ta mayar da martani cikin fushi ga kalaman firaministan Isra'ila na cewa ƙasarsa na iya kai wasu sabbin hare-hare ƙasar idan har bata kori shugabannin Hamas da ke zaune a cikin ta ba.

   Benjamin Netanyahu ya yi gargadin cewa dole ne Qatar da sauran ƙasashen da ke ba da mafaka ga mutanen da ya bayyana a matsayin 'yan ta'adda' su hukunta su, ko kuma Isra'ilan ta yi hakan da kanta.

   Ma'aikatar harkokin wajen Qatar ta bayyana kalaman na shi a matsayin na rashin sanin ya kamata.

   Ta ce Isra'ila tana da cikakkiyar masaniyar cewa Qatar na karbar bakuncin jami'an Hamas din ne a wani yunkuri na tattauna batun zaman lafiya, kuma da sanin Amurka.

   'Iran ta ƙaddamar da hare-hare kan sansanonin sojin Amurka a Qatar'

   Me ya sa Qatar ta kasa dakatar da yaƙin Isra'ila da Hamas duk da ƙwarewarta kan hakan?

4. 11 Satumba 2025Assalamu Alaikum

   Barkanmu da sake saduwa a shafin labarai kai-tsaye na BBC Hausa a hantsin Alhamis.

   Shafin na yau zai fi mayar da hankali ne kan abubuwan da ke faruwa a Najeriya da maƙwabtanta, da kuma sauran sassa na duniya.

   Za ku iya leƙawa shafukan sada zumuntanmu na intanet, da facebook da X da kuma whatsapp domin karanta sauran labarai da kallon bidiyo.

   Ku kasance da mu.