Wannan shafi ne da ke kawo muku abin da ke faruwa a Najeriya da sauran sassan duniya na ranar 19 ga watan Mayun, 2024.
Abdullahi Bello Diginza and Muhammad Annur Muhammad
Asalin hoton, Getty Images
Dan damben boksin na ƙasar Ukriane, Oleksandr Usyk ya zama zakaran duniya na ajin masu nauyi a karon farko cikin shekara 25.
Usyk ya doke Tyson Fury na Birtaniya bayan zagaye 12 a fatatawar da aka yi a birnin Riyadh na ƙasar Saudiyya.
Duk da rashin nasarar da Fury ya yi, shi ne zai samu kaso mafi tsoka na kuɗin da za a biya 'yan damben, wanda ake hasashen adadinsu zai kai dala miliyan 100.
Asalin hoton, Getty Images
Mai bai wa shugaban Amurka shawara kan harkokin tsaro ya tattauna da yarima mai jiran gado na Saudiyya a wani sabon mataki na shirin diplomasiyyar Amruka na ƙoƙarin dakatar da yaƙin Gaza.
Jake Sullivan ya gana da Mohammed bin Salman a birnin Dhahran a ƙasar Saudiyya.
Kamfanin dillancin labaran ƙasar ya ce tattaunawar ta ƙunshi yadda za a ɓullo da hanyoyin samar da kayan agaji zuwa Gaza.
Rahotonni na cewa akwaiyiywuwar Isra'ila ta rage zafafa hare-haren da take kai wa Rafah, yayin da Mista Sullivan ke yankin Gabas ta Tsakiya.
Ana sa ran ci gaba da tattaunawa tsakanin jami'an Amurka da na Isra'ila a cikin wannan wata.
Masu bin shafin BBC Hausa kai-tsaye, barkanmu da hutun ƙarshen mako.
Abdullahi Bello Diginza ke fatan sake kasancewa da ku a daidai wannan lokaci, domin kawo muku irin wainar da ake toyawa a faɗin duniya, musamman Najeriya da makwabtanta.
Kuna iya leƙawa shafukanmu na sada zumunta domin tafka muhawara kan labaran da muke wallafa muku
