Abubuwan da ke faruwa a Najeriya da sauran sassan duniya

Rahoto kai-tsaye

Nabeela Mukhtar Uba, A'isha Babangida, Haruna Kakangi, Ahmad Tijjani Bawage and Ibrahim Yusuf Mohammed

1. 20 Fabrairu 2024An gudanar da zanga-zangar nuna adawa da ƙasashen yamma a gabashin DR Congo

   

   Mazauna birnin Goma da ke gabashin Jamhuriyar Dimokaradiyyar Congo a jiya sun gudanar da zanga-zangar nuna adawa da kasashen yammacin duniya da suka zarga da ƙara tabarbarewar matsalar tsaro a yankin da ke fama da tashe-tashen hankula, inda kungiyoyin da ke ɗauke da makamai ke kai hare-hare, in ji gidan rediyon Faransa RFI.

   RFI ta ce an ƙona tutoci da dama da suka haɗa da na Amurka da Faransa.

   Hukumomin ƙasar dai sun haramta zanga-zangar, suna masu cewa hakan bai dace ba, kuma suna cikin kasadar “kautar da hankalin hukuma” daga “yaƙin da aka dora musu”.

   Masu gudanar da zanga-zangar sun ce ƙasashen da aka ƙona tutocinsu na aiki ne tare da ƙasar Rwanda, wadda ake zargi da goyon bayan 'yan tawayen M23.

   Patrick Ricky Paluku na ƙungiyar matsin lamba ta Veranda Mutsanga ya ce "Su ne ke bai wa abokan gabanmu kudi."

   Masu zanga-zangar sun kuma yi watsi da yiwuwar tattaunawa tsakanin gwamnatin Kongo da 'yan tawayen M23 a nan gaba.

   Jami'an Congo sun ce sojojin ƙasar na samun gagarumar nasara a kan 'yan tawayen a daidai lokacin da ake gwabza faɗa a garin Sake mai tazarar kilomita 20 daga Goma.

   • Adadin wadanda suka rasu sakamakon arangama a sansanonin MDD a Dimokraɗiyar Congo ya kai 19
   • 'Da za mu yi zaɓe da mun zaɓi zaman lafiya a Dimokuraɗiyyar Kongo'

2. 20 Fabrairu 2024Masu bincike sun ce za su riƙe gawar Navalny na tsawon makonni biyu

   

   Asalin hoton, Reuters

   Masu bincike sun bayyana wa Iyalan Alexei Navalny, ɗan adawar Putin da ya mutu a wani gidan yari na ƙasar cewa ba za a saki gawarsa ba har tsawon makonni biyu.

   Wakilin Navalny ya ce an sanar da mahaifiyarsa cewa za a riƙe gawarsa ne domin yin bincike.

   Kawo yanzu dai hukumomin Rasha ba su bayyana inda gawar take ba, yayin da aka sha toshe duk wata hanyar ƙoƙarin gano hakan.

   Uwar gidan marigayin, Yulia Navalnaya ta zarge hukumomin Rasha da boye lamarin.

   A cikin wani faifan bidiyo a ranar Litinin, uwargidan ya marigayi Navalny ta sha alwashin ci gaba da aikin da ya fara na fafutukar samar da ƴantacciyar ƙasar Rasha, Yulia kai tsaye ta zargi shugaban Rasha Vladimir Putin da alhakin kashe mijinta.

   Navalny dai ya tsira daga yunƙurin kashe shi ta hanyar amfani da guba da aka kira Novichok a cikin 2020.

   • Shugabannin duniya na ci gaba da alhihin rasuwar Alexei Navalny
   • Gubar Novichok aka sanya wa jagoran adawa na Rasha Navalny - Gwamnatin Jamus

3. 20 Fabrairu 2024Zaki ya kashe mutumin da ya yi shekara tara yana kula da shi

   

   Asalin hoton, Getty Images

   Wani likitan dabbobi, Olabode Olawuyi da ke kula da gidan ajiyar namun daji na jami'ar Obafemi Awolowo ya rasa ransa bayan da wani zaki da ya shafe shekara tara yana kula da shi ya yi ajalinsa.

   Lamarin dai ya girgiza hukumar jami'ar. Kakakin jami'ar, Abiodun Olanrewaju cikin wata sanarwa da ya fitar ranar Litinin ya ce marigayin yana wurin kiwon dabbobin domin ba su abinci lokacin da lamarin ya faru.

   Olanrewaju ya ce wasu ma'aikatan makarantar sun yi ƙoƙarin kuɓutar da shi amma zakin ya riga ya yi masa illa sosai.

   

   Asalin hoton, GETTY IMAGES/OAU

   "Hukumar gudanarwar makarantar da malamai da daliban jami'ar Obafemi Awolowo da ke Ile Ife a jihar Osun, suna jimamin mutuwar Olabode Olawuyi," kamar yadda sanarwar ta bayyana.

   Bayanai na cewa Olabode yana kula da zakin ne tun yana ƙarami.

   • Bazuwar ƙwayar a-rungumi-zaki a Najeriya na tayar da hankula
   • Zuri'ar gwaggon birin da ya kusa ƙarewa a duniya 'na ta hayayyafa' a Uganda

4. 20 Fabrairu 2024Kamfanonin sarrafa siminti a Najeriya sun amince su rage farashinsa

   

   Asalin hoton, Other

   Masu kamfanin sarrafa siminti a Najeriya sun amince su rage farashinsa zuwa tsakanin naira dubu bakwai da naira dubu takwas kan buhu mai nauyin kilogram 50.

   Masu kamfanin sarrafa siminitin sun bayyana cewa a shirye suke su rage farashin nan gaba da zarar gwamnatin tarayya ta cika alƙawurranta.

   Gidan Talabijin na Channels ya ruwaito cewa an cimma wannan matsaya ne tsakanin gwamnati da masu kamfanin a wani taro da ministan ayyuka, Sanata David Umahi ya kira ranar Litinin a Abuja, babban birnin ƙasar.

   Kamfanonin Dangote da BUA da Lafarge Africa sun amince cewa farashin siminti ba zai wuce tsakanin naira dubu bakwai da naira dubu takwas kan kowane buhu mai nauyin kilogram 50 - ya danganta da yankin.

   Taron ya samu halartar ministar harkokin masana'antu da kasuwanci da hannun jari, Doris Uzoka-Anite.

   Doris Uzoka-Anite ta ce ana ƙoƙari wajen magance matsalolin da suka haifar da ɗagawar farashin simintin baka-tatan.

   • Abin da ya sa ba zan rage farashin siminti ba – Dangote
   • Ya kamata Dangote da BUA su rage farashin siminti – Osinbajo

5. 20 Fabrairu 2024Barka da Safiya!

   Daga nan BBC Hausa muke yi muku barka da warhaka.

   Muna fatan za ku kasance tare da mu tsawon wannan rana domin sanin halin da duniya ke ciki.

   Za mu kawo muku labarai da rahotannin da suka shafi rayuwarku, musamman kan abubuwan da ke faruwa a Najeriya da Nijar da makwabtansu da sassan duniya.