Wannan shafi ne da ke kawo muku abubuwan da ke faruwa a Najeriya da sauran sassan duniya.
Nabeela Mukhtar Uba, Haruna Kakangi and Ibrahim Yusuf Mohammed
Asalin hoton, Charlie Omba
Rahotanni na cewa an tarwatsa wasu rumfunan zaɓe a cibiyar ilimi ta Higher Pedagogical Institute da ke ISP Bunia a Congo.
Kawo yanzu ba a san girman ɓarnar ba.
Lamarin ya faru ne yayin da wata tawaga ta mutanen da suka ɗaiɗaita waɗanda suka kasa zuwa ƙauyukansu na asali a yankin Djugu domin yin zaɓe suka so su bayyana rashin jin daɗinsu.
Al'umma a Jamhuriyar Dimokraɗiyyar Congo sun soma kaɗa ƙuri'a yau Laraba a zaɓen shugaban ƙasa da na ƴan majalisar dokoki.
Masu kaɗa ƙuri'a sun fusata a Kinshasa, babban birnin ƙasar sakamakon rashin buɗe wasu rumfunan zaɓe a kan lokaci.
Hukumar zaɓe ta ƙasar Congo ta ce a shirye take ta gudanar da zaɓen duk da tarin ƙalubale musamman daga yankunan da ƴan tawaye ke damalmaya lamarin da ke hana yin zaɓe.
Shugaba Felix Tshisekedi zai fafata da yan takara 18 da ke neman kujerar ta shugaban ƙasa.
A karon farko, al'ummar Congo da ke zaune a kasashen ƙetare biyar har da Belgium da ta reni ƙasar - za su jefa ƙuria.
Asalin hoton, EPA
An samu koma baya a ƙokarin da kwamitin tsaro na Majalisar Dinkin Duniya ya ke wajen cimma yarjejeniyar samar da wani daftari da zai yi kiran a dakatar da yaƙi a Gaza.
Ƙuri'ar da aka yi niyyar kaɗawa a ranar Litinin, an ɗaga har zuwa yau Laraba.
Masu shiga tsakani na ƙoƙarin amincewa da buƙatun da Amurka ba za ta ƙi amincewa da su ba misali, wajen samar da kalmar da za ta maye batun tsagaita wuta da gaggauta dakatar da garkuwa zuwa bayar da damar rarraba kayan agajin da ake matuƙar buƙata.
Wakliyar BBC ta ce Amurka da Isra'ila ba sa goyon bayan tsagaita wuta, sannan kuma sun hau kujerar naƙi a kan matakin da kwamitin ya buƙata tun da farko.
Asalin hoton, REUTERS
Kotun ƙoli a jihar Colorado ta Amurka ta yanke hukuncin cewa tsohon Shugaban ƙasar Donald Trump bai cancanci tsayawa takara ba a jihar kuma ba zai iya fitowa a zaɓen fidda gwani na jam'iyyar Republican a shekara mai zuwa ba.
Kotun ta ce saboda abin da tsohon shugaban ya yi a ranar 6 ga Janairun 2021 - ranar da aka kai hari kan ginin majalisa - Capitol hill – da aka yi wa kallon yunƙurin tayar da zaune tsaye.
Ofishin yaƙin neman zaben Trump ya kira hukuncin kotun a matsayin abin da ya saɓawa dimokradiyya, sannan kuma ya ce zai ɗaukaka ƙara zuwa kotun ƙolin tarayya.
Za a jingine hukuncin har sai kotun tarayya ta yanke nata, to amma duk da haka jami'an zaɓe a Colorado sun ce akwai buƙatar a yi abin da ya dace kafin nan da 5 ga watan Janairun 2024.
Hukuncin bai hana Trump tsayawa takara ba a sauran jihohin Amurka.
Masu bibiyarmu a wannan kafa, assalamu alaikum. Da fatan mun wayi gari cikin ƙoshin lafiya.
Kamar koda yaushe, za mu wallafa muku labarai da rahotanni na abubuwan da ke faruwa a Najeriya da Nijar da sassan duniya a wannan shafi na Kai Tsaye.
Nabeela Mukhtar Uba ce tare da ku a wannan lokaci. Za ku iya zuwa shafukanmu na sada zumunta domin karanta wasu labaran da ma kallon bidiyo.
