Lokaci na kure wa masu ceton sundukin yawon shakatawa na karkashin ruwa
Yunkurin ceto mutane biyar da ke cikin jirgin 'yan yawon buɗe ido da suka ɓata kusa da tarkacen jirgin ruwan Titanic da ke Arewacin Tekun Atlantika na shiga wani muhimmin mataki.
An kiyasta cewa yanzu 'yan sa'o'i na iskar oxygen da suka rage kadan ne - ma'ana iskar da suke shaka za ta iya ƙarewa a nan ba da dadewa ba.
Sai dai masana sun ce tsawon lokacin da iskar oxygen ke dawwama ya dogara ne da abubuwa daban-daban.
An bukaci dukkan wani jirgi da ke kewayen yankin ya kai agaji idan zai iya saboda dan karamin lokacin da ya rage.
A hirarsa ta farko tun bayan bacewar jirgin sundukin a ranar Lahadin da ta gabata, shugaban kamfanin da ya mallaki jirgin ruwan Sean Leet, ya ce suna ci gaba da fatan za a gano mutanen kuma a dawo da su gida lafiya.
Jami’an tsaron gabar tekun Amurka sun ninka wuraren binciken, kuma wani jirgin ruwa na Faransa dauke da wani mutum-mutumi da ke iya nutsewa kasan teku cikin sauki a kusan kilomita dubu shida na kan hanyar karasawa wajen.