Aston Villa ta kammala ɗaukar Maatsen daga Chelsea

Aston Villa ta kammala ɗaukar ɗan wasan Chelsea, mai tsaron baya, Ian Maatsen kan £35m.

Maatsen, mai shekara 22, ya buga wasannin aro a Borussia Dortmund, wanda ya taka rawar da ƙungiyar ta kai wasan karshe a Champions League.

Yanzu haka yana tare da tawagar Netherlands a Euro 2024, wadda ke shirin buga zagaye na biyu da Romania ranar Talata a Jamus.

Shi ne na biyu da Aston Villa ta ɗauka a yanzu haka, bayan Lewis Dobbin daga Everton.

Chelsea ta ɗauki Maatsen a 2019 daga PSV Eindhoven, wanda ya taka rawar gani a lokacin da ta tura shi buga wasannin aro a Charlton Athletic da Coventry City da Burnley da kuma Dortmund.

Ya taka gagarumar rawar da ta kai Burnley ta samu gurbin shiga Premier League a 2022-23, wanda ya ci ƙwallo hudu a wasa 39, kuma yana cikin fitattun ƴan wasa a gasar ta Championship.

Maatsen ya fara buga wasanni a kakar 2023/24 a zagayen farko a Chelsea, amma sai ya kasa samun gurbi karkashin koci, Mauricio Pochettino, duk da yin wasa 15 a dukkan fafatawa.

Daga nan aka bayar da aronsa ga Dortmund a watan Janairu, bayan da ya tsawaita ƙwantiragin kaka daya da ƙungiyar Stamford Bridge.

A lokacin da ya taka leda a Jamus, Maatsen ya yi karawa 23 da cin ƙwallo uku, inda Dortmund ta kare a mataki na biyar a Bundesliga, wadda Real Madrid ta doke ta 2-0 ta ɗauki Champions League.

Ya bar Stamford Bridge bayan buga wasa 16 a ƙungiyar da ke yammacin London.