Yamal ne gwarzon La Liga na Agusta da koci Flick na Barca

Ɗan wasan Barcelona, Lamine Yamal ya lashe ƙyautar gwarzon matashin La Liga na watan Agusta, bayan da ya ci ƙwallo ya kuma bayar da huɗu aka zura a raga.

Haka kuma koci, Hansi Flick na Barcelona shi ne fitatce a watan na Agusta, bayan da ƙungiyar ta lashe wasa huɗu a jere da fara kakar bana.

Mahukuntan La Liga kan karrama ɗan wasa da kocin da suka fi yin bajinta a duk wata a gasar a zaben da ake tsakanin magoya baya a intanet.

A wasan makon farko da Barcelona ta je ta ci Valencia 2-1, Yamal ne ya bai wa Robert Lewandowski, ƙwallon da aka fara cin Barcelona daga baya ta lashe karawar.

A mako na biyu da Athletic Club a Estadi Olimpic, Yamal mai shekara 17 ne ya fara cin ƙwallo a fafatawar da Barcelona ta yi nasara 2-1.

Yamal, wanda ya lashe Euro 2024 a Jamus daga nan ya bayar da ƙwallo uku aka zura a rawa a wasan da Barcelona ta doke Rayo 2-1 da wanda ta caskara Valladolid 7-0.

Matashin ɗan wasan na taka rawar gani a La Liga da Barcelona a bana, wanda ya buga mata dukkan karawa huɗu da fara kakar nan.

Haka kuma kociyan Barcelona, Hansi Flick shi ne gwarzon mai horar da tamaula a La Liga a watan Agusta, bayan da ƙungiyar ta lashe dukkan karawa huɗu da cin ƙwallo 13, inda uku suka shiga ragarta.