An ci gaba da yi wa Maguire ihu fiye da wanda aka yi a baya

Luke Shaw ya ce an ci gaba da yi wa dan kwallon tawagar Ingila da Manchester United, Harry Maguire ihu fiye da wanda ake yi masa a baya a fannin tamaula.

Kyaftin din Manchester shi ne ya yi kuskuren da Jamus ta ci kwallo biyu a wasan Nations League da Ingila ta tashi 3-3 ranar Litinin a Wembley.

Ana ta kalubalantar kociyan tawagar Ingila, Gareth Southgate kan gayyatar Maguire da yake yi, wanda United ta ajiye a benci daga baya da fara kakar bana.

Maguire baya kan ganiya a wasannin da yake yi wa tawagar Ingila da Manchester United - an yi wa dan wasan ihu a wasan sada zumunta da Ingila ta doke Ivory Coast a cikin watan Maris.

A cikin watan Afirilu 'yan sanda suka bincike gidan Maguire, wanda wani ya yi masa barazanar dana masa bam - batun ya girgiza mai tsaron bayan United.

Haka kuma an yi wa kyaftin din United ihu a lokacin atisayen kungiyar a Australia - wanda ya buga wasa uku a Premier League ta kakar nan.

Duk da haka kociyan Ingila, Southgate ya ci gaba da bai wa Maguire goron gayyata, domin tsare masa baya, dalilin da ake kalubalantar kociyan kenan.