Man United ta doke Plzen da gumin goshi
Asalin hoton, Getty Images
Manchester United ta samu nasarar doke Viktoria Plzen har gida da gumin goshi a gasar Europa.
Da wannan sakamakon ƙungiyar ta Ruben Amorim ta koma cikin jerin ƙungiyoyin takwas ɗin farko da ba za su yi neman gurbi ba a gasar.
A minti na 48 da fara wasan ne golan United Onana ya tafka kuskure da ya kai ga bai wa ɗan wasan gaban Plzen Matej Vydra damar jefa kwallo ta farko a ragar a wasan.
Bayan sauya Rashford da ya yi Rasmus Hojlund ya farke wa ƙungiyar kwallon da aka zura mata a mintina na 62 bayan dawowa hutun rabin lokaci kenan.
A minti na 88 Bruno Fernandes ya ƙara bai wa Hojlund dama ta sake zura kwallo a raga a daf da tashi daga wasa.
Da haka aka tashi daga wasan Manchester United ta haɗa maki uku amma da jiɓin goshi.
Yanzu Hojlund ya ci kwallo biyar kenan a wannan gasa, kuma da haka Manchester ta koma ta takwas a teburi.
United na fama da rashin tabbas kan wadanda za su riƙa buga mata wasa a kullum, wani abu da ake kallo a matsayin gyara da Amorim ke neman kawo ƙungiyar.
