Kocin Focugal Santos ya ajiye aiki

Mai horar da Focugal Fernando Santos ya ajiye aikinsa, yan kwanaki bayan da Maroko ta fitar da kasarsa a gasar cin kofin duniya da ake yi a Qatar.

Mai shekaru 68 din ya yi rashin nasara 1-0 hannun Atlas Lions a zagayen Quarter-finals.

Santos ya shafe shekara takwas yana jan ragamar Focugal, inda ya ci musu kofin nahiyar Turai a 2016, da kuma na Uefa Nations League a 2019.

Sai dai an yi ta cece-kuce da ya ajiye kyaftin din kasar Cristiano Ronaldo, a wasannin karshe da kasar ta buga a gasar Qatar 2022.

Kocin ya ki fara wasa da Ronaldo ne a dalilin kalaman da ya yi bayan sauya shi a wasansu da Koriya ta Kudu.

Hukumar kwallon kafar Focugal a sanarwar da ta fitar, ta gode wa Santos kan namijin kokarin da ya yi tsawon shekaru takwas.

A yanzu hukuma ta FPF za ta shiga kasuwa don nemo wanda zai maye gurbinsa.