Mai tsaron bayan Liverpool Bradley zai yi jinyar mako uku

Ana sa ran mai tsaron bayan Liverpool, Conor Bradley zai yi jinyar mako uku, bayan raunin da ya ji a kafa.

Bradley, mai shekara 20, ya ji rauni ne a wasan da Crystal Palce ta ci Liverpool 1-0 a Anfield a gasar Premier League ranar Lahadi.

An maye gurbinsa da Trent Alexander-Arnold, wanda ya warke daga jinyar gwiwa da ya fara tun daga cikin watan Fabrairu.

Kenan Bradly ba zai buga wa Liverpool wasa na biyu ba da Atlanta ranar Alhamis a Europa League zagayen quarter finals.

Haka kuma kuma ba zai yi wasan Premier League ba da Fulham da Everton da West Ham a cikin watan Afirilu.

Liverpool za ta ziyarci Atalanta mai buga Serie A, wadda ta ci 3-0 a wasan farko a Anfield a makon jiya.

Sai a cikin watan Mayu ake sa ran Bradly zai koma fagen daga lokacin da Liverpool za ta fafata da Tottenham da Aston villa da Wolves a wasannin da suka rage a Premier League.

Dan kwallon tawagar Ireland ta Arewa ya buga wa Liverpool wasa 22 a kakar nan da cin kwallo daya da bayar da shida aka zura a raga.

Liverpool mai maki 71 tana ta ukun teburi da tazarar maki biyu tsakaninta da Manchester City ta daya, yayin da Arsenal ce ta biyu mai maki 71.