Neuer ya yi ritaya daga tsare ragar tawagar Jamus

Mai tsaron ragar tawagar Jamus, Manuel Neuer ya yi ritaya daga buga wa kasar tamaula.

Wanda ya lashe kofin duniya a 2014 ya buga wa kasar wasansa na karshe, bayan da Sifaniya ta yi nasara a kan Jamus a kwata fainals a Euro 2024.

Mai shekara 38 ya buga wa Jamus karawa 124, tun daga lokacin da ya fara yi mata tamaula a 2009 da buga mata manyan gasa takwas.

Neuer, wanda ya lashe kofin duniya a Brazil, an naɗa shi kyaftin din Jamus kafin gasar kofin duniya a Rasha a 2018, wanda Ilkay Gundogan ya karɓi mukamin a bara.

A makon nan Gundogan ya sanar da yin ritaya daga buga wa Jamus tamaula - tun farko Toni Kross ne ya rataye takalmansa, bayan kammala gasar cin kofin nahiyar Turai Euro 2024.

Neuer zai ci gaba da tsare ragar Bayern Munich, wanda ya sabunta ƙwantiraginsa a ƙungiyar da zai kare a 2025.