An karbe ragamar Bundesliga a hannun Bayern Munich

Bayan Munich ta yi rashin nasara a hannun Bayern Leverkusen da ci 2-1 an karbe ragamar teburin Bundesliga a wajenta.

Ranar Lahadi suka buga wasan mako na 25, inda Bayern Munich, wadda ta kai ziyara ta fara cin kwallo a minti na 22 ta hannun Joshua Kimmich.

Bayan da suka koma zagaye na biyi ne Leverkusen ta farke biyun ta hannun Exequiel Palacios, kuma dukkansu a bugun fenariti.

Da wannan sakamakon Bayern ta koma ta biyu a teburin Bundesliga da tazarar maki daya tsakaninta da Borussia Dortmund, wadda ta koma ta daya.

Dortmund, wadda ta caskara Kohl 6-1 ranar Asabar a Bundesliga ta hau kan teburin Jamus a karon farko tun bayan 2019.

Leverkusen, wadda Xabi Alonso ke horar da ita, wanda ya taba yin Bayern, ya ci wasa biyar a jere a dukkan fafatawa.

Dortmund da Bayern za su kara a tsakaninsu a karon farko a bana ranar 1 ga watan Afirilu a gasar Bundesliga.